nach enere lange winterpause isch es hüt los gange. wie fit bin i ächt de summer?
de start isch nid mini sach, und bi dem renne no chli weniger. es gaht nämlich grad ufe. prinzipiell sind d stiegigie scho für mich, aber so isch de start buechstäblich steil gsi und di erschti rundi mega härt. han leider mit zweine nid chönne mithebe, wo ich welle han. eine vo dene händ mir aber später wieder ufgläse. de ander hät eh nur di halbi distanz gmacht.
nach de erschte härte rundi sind drü chli lockereri cho. ich han mich es bizeli erhole chönne. di füfti rundi isch denn wieder hektisch worde, vieli i de gruppe händ nur de halbmarathon gmacht. han denkt, die bringed sich in position für de schlussspurt und nachher wird's ruhiger. bin aber dopplet falsch gläge. schlussspurt isch das chum gsi, was die gmacht händ. und ruhiger isch es au nid worde. für de rescht vom renne, also nomal füf rundene, han i müesse recht uf zäh biesse. bi de stiegig han i aber immer guet mit möge, nachher isch es chli abe gange und hät erholig gä. im lange flache teil han i immer wieder chli uf zäh biesse müesse. uf de zweitletschte rundi, churz vor em ziel denn mis grosse, dopplete glück. unmittelbar vor mir sind zwei gstürzt. wie sich nach em renne zeigt hät, sogar heftig. ich han aber grad no chönne uswieche. das wär s erschti glück gsi. s zweiti: mit dem schock im nacke (oder isch es de erhöhti adrenalinspiegel gsi?) isch d gruppe chli langsamer worde für en moment. ich han mich nomal chli chönne erhole und alles i allem e relativ lockeri letschti rundi gha. bim schlussspurt han i aber nüme chönne mitmischle und ich han uf de letschte 15 meter usrolle la.