bereits zum zehnte mal bin i für das inline-high-light und de saisonschluss uf berlin greist.
s wetter hät sich passend zu dem jubiläum au vo sinere beste siete zeigt. d chleiderwahl isch isch schnell troffe gsi, d rägerädli han i gar nid erscht mitgno. defür di letscht jahr in berlin kaufte, und bisher no nie bruchti special edition, inklusive neue chugellager. wo ich zum hotel us bin, han i fasch nid chönne glaube, wie ruhig und luutlos d skates grollt sind.
nach dem i mini ITL-gspänli troffe han, s gruppeföteli knipst gsi isch, sind d startvorbereitige glaufe: chleidersack abgäh, wc, iifahre um d siegessüüle und uf em weg in startblock nomal uf's WC. denn isch d spannig gstiege, hellsbells dur d lutsprecher gschallt und s renne isch für d elite-fraue, chli später d elite-manne und denn plötzlich für üs los gange!
de start isch wenig elegant gsi, hät en heftige stolperer drinne gha, aber meh als en zuesätzliche adrenalinschub hät's nid gä. wenig später em erschte gstürzte uswiche und de teamspänli hinterher fahre, wo die sich im feld wieter füre kämpft händ. eigentlich hett i recht gueti startvorussetzige gha, wil hinter me grosse rugge gstartet, han die position aber nid chönne verteidige.
nach füf kilometer öppe hät's agfange löcher gä, ich han welle in e gruppe näbe dra wechsle und han de aschluss verpasst. scho so frühe, mit dem hett i nid grechnet, trotzdem han ich's aber eher gelasse gno. bald scho hät sich e neui gruppe bildet, mit me thunliner und no öppe zeh andere skater. die gruppe hät recht guet funktioniert, s tempo isch immer no im gewünschte bereich gsi und ich han über 10km chönne ruhig skate. ziemlich grad nach de 20km-marke händ üs di erschte vom startblock C igholt. mir händ probiert i die gruppe z wechsle, was mir aber irgendwie nid glunge isch. han debi aber glück gha, hine dra sind scho di nächste cho, wo mich mitgno händ. so bin i bereits wieder guet unterwegs gsi, bevor i han chönne frustriert si, und bevor d halbmarathon-marke cho isch. zwüscheziit isch mit 39:39 au no ideal gsi und d hoffnig, s ziel unter 1:20 z erreiche hät chönne wieterbe.
nach de 30km-marke sind no anderi gruppene (vo hine?) cho, und es isch zum grosse zämeschluss cho. eigentlich alles wie immer. nomal eme sturtz uswieche, und bald isch de potsdamer platz uftaucht. e liechti rechtskurve und s grosse tohuwabohu isch los gange. au das isch wie jedes jahr, und für mich unverständlich. günne chann me deht weder sekunde no positione, wil d strass relativ unebe isch und denn au no parallel verlaufendi tramschiene hät, isch es nur gfährlich.
chli später isch es (gfühlt) ruhiger worde. eigentlich wäri das denn de moment für de grossi agriff. ich han's aber unterlah, bin guet mitcho und han mi dademit z'friede gä. ersch uf de zielgerade, s brandenburger tor in sicht, han i nomal probiert en gang höcher z schalt und über di linki siete no es paar z überhole.
im ziel isch d entüschig über d ziit denn doch gross gsi. mir händ uf de zweite hälfti fasch zwei minute verlore gegnüber de erschte hälfti, obwohl sich's guet und schnell agfühlt gha hät.
d freud das renne gschafft und schadlos überstande z ha, hät im ziel denn doch überwiegt, s schöne wetter hät sis übrige dezue bitreit. fazit: d vorfreud uf s nächsti jahr isch bereits wieder gross und ich sötti mir wohl chli öfters neui rädli und chugellager gönne.