trotz me gfühlsmässig churze renne, s schlechtischte saisonresultat!
am morge han ich zersch no en hockey-match gha. wo die schlacht denn gschlage, resp.
verlore gsi isch, hät s grad mal für en brunch glanged undzum packe, bis ich uf biel han müesse.
natürlich sind das super vorussetzige, mit so me spiel, em spinning am abig vorher und wenig schlaf
für es race. ich bin für eimal nid voragmäldet gsi, also händ mir mich no nagmälded. dank
swiss-skater-card und eme mirgros-guetschi isch s renne am schluss uf 50 stutz cho, wobi ich säge muss,
ich finde s eigentlich verdammt viel, was die da abzocked, für das wo s büted. jedefalls isch d suechi
nach enere garderobe erfolglos bliebe, genau so wie die nach me effekte-deppot. so händ mir üs halt
irgendwo umzoge, wie meischtens am SIC und d täschene händ mir denn under en lastwage im village gstellt.
denn es hät es wili lang nach räge us gseh.
vor em start händ mir, mitcho isch überigens d sabine, no eine troffe, wo mir vo de renne vo bern
kenned. und ich han no de fredy gseh. mir sind aber no chli go ifahre, de fredy glaub nüm, und so händ
mir üs wieder verlore.
d füess händ mir, trotz resp. wäge pflaster scho vo afang a we tue. trotzdem isch mir s renne irgendwie churz vorcho und ich bin sälte am limit gsi. han irgendwie au nid so de grossi wille gha zum biesse. viellich wil ich scho mit de füess han müesse uf zäh bisse, viellich au wil ich chli wiet hine gstarted bin und de zug so scho abgfahre isch, bevor s richtig los gange isch. am afang hät aber mini uhr no ganz flotti ziite zeigt. s ziel, wie immer, de 30er, wäri mit 12-minute-rundene z erreiche gsi. bi de zweite zielpassage sind mir mit 25 minute au nid schlecht im renne gsi. au nach de dritte hät sich de schade in grenze ghalte, 38min. denn isch d gruppe, wo ich ab deht gha han, aber nüme so schnell gsi. lang sind mir z vierte underwägs gsi. immer di gliche beide händ gfüert. es hät scho stelle gä, wo ich biesse han müesse, aber au langi, i dene ich usruebe han chönne. nach dem d fitnessfahrer wäg gsi sind (händ nur 3 rundene gmacht), sind d strasse leer worde, was guet gsi isch wägem platz, aber de nachteil gha hät, dass ich i minere gruppe festklemmt bin. ich sälber hetti nid für es viel höchers tempo sorge chönne, die wo vorne gsi sind, sind aber, logischerwies immer müeder worde. und so au üsi rundeziite langsamer. aber si hetted nie jemand anders d füerigsarbet verrichte la! nach de füfte start/ziel-passage isch klar gsi, dass es kei gueti ziit gä hetti. statt de avisierte 60 sind s 64 minute gsi.
mitte letschti rundi sind denn plötzlich no es paar a üs verbi gfahre. ich han denkt, es seigend
pros wo am ufwärme sind. aber nur di vorderschti isch e lizenzierti fahrerin gsi (erkennt me am dress),
die zwei hine sind au im renne gsi. die chance han ich mir nid entga la und die bald gholt. eine isch mir no
gfolgt us de vorherige gruppe. es isch en blitzschnelle entscheid gsi, ganz untypisch für mich. und ich
han s gschafft, mich dene no a z hänge, was au nid selbstverständlich isch. aber usdruck devo, dass
ich vorher sicher nid am limit gsi bin. mit dene han ich denn recht bisse müesse, bin au bis viellich 200m
vor em ziel, wo d strass wieder schlecht worde isch und sich i kurvene e lugge uftue hät, a dene dra bliebe.
uf de ruche strass han ich denn d lugge nüme schlüsse möge. en blick nach hine, wo gähnende
leere gsi isch, hät mir au gseit, dass stresse nüme gross nötig isch. ich hasse das zwar, eifach
so is ziel rolle. han denn scho nomal probiert chli gas z gä, aber es isch nur no halbherzig gsi. di offizielli
ziit isch 1:18.37, was en schnitt vo no 27.47km/h git. es isch so s klar schlechtischte renne gsi, mindischtens die
saison. aber ich han au vor keinem andere renne no en hockey-match gha. und bin wohl au nie mit scho lädierte
fuessglänk oder andere körperstelle an start gange.
ach ja, d fuessglenk: de witz deht isch, dass ich wohl z viel oder z hart pflastered han. denn d spure vom one-eleven sind völlig unberüert bliebe. es hät defür neui gä, wo wohl s plaster, resp. sin rand i mine fuessglänk hinderla hät und mindischtens so schlimm sind, wie die vom one-eleven...