es schöns saisonendi, han ich mir vorgno. aber ohni kämpfe und chli liede gaht's ebe glich nid. au im 7te saisonrenne nid...
agfange hät's denn au nid grad guet. mir, de fredy und ich, händ nur welle ga, wenn s wetter guet isch. für e voramäldig hetted mir üs am dunnschtig abig müesse entscheid. und usser am dunnschtig isch de wetterbicht für de sammschtig immer guet gsi. jedefalls am mittwuch, am fritig und am samschtig sälber. da s wätter denn am samschtig morge guet gsi isch, händ mir üs entschide, doch no z ga. halt mit voramäldig und entsprechende gebühre.
vor em start han ich no de christoph troffe, wo ich mit de sabine scho diversi mal atroffe han. es mega tier. so isch es cho, dass mir recht vorne im startblock gstande sind. für mich sicher z wiet. und denn isch es ab gange. de christoph han ich grad nüme gseh. am fredy bin ich aber dra bliebe. han allerdings kämpft und nie richtig min rythmus gfunde. wo s gege s endi vo de erschte rundi gange isch han ich denkt, ich muess denn wohl abrisse la, aber erscht wenn ich s ei rundi lang probiert han. bi de kurve, vor em schlussufstieg han ich aber wiedermal e chlini lugge zum fredy gha und de hinder mir hät überholt und die zuegmacht. ich han denkt, es seigi eine wo was weiss ich vo wo chunnt und ihn ine la. wo ich gschnallt han, dass er sich sorge drum macht, dass ich de aschluss verlüre (und er somit au) isch mir klar gsi, dass ich wohl langsam ga la muss. interessanterwies isch keine vo dene vier herre hinter mir a mir verbi zoge und so hät sich e neui vierergruppe bilded.
im lauf vo de wietere rundene isch die gruppe gwachse und gwachse. vo vorne und vo hine, han ich s gfühl gha. jedefalls hät s vor mir immer me lüt gha, obwohl ich nie hinder gheit bin. z viel lüt vor einem isch aber au nid guet, ganz und gar nid. es git denn so chi de "handorgel-effekt". das isch, wenn me mal z schnell isch und fasch bremse muss, denn wieder mega gas gä, zum dra bliebe. das choschted au energie. aber ich han chönne dra bliebe, bis fasch am endi vo de vierte rundi. deht händ, i de stiegig, vier herre abrisse la, de eint hät sich sogar churz vorher no vor mir ine quätscht! vier han ich nid überhole möge und vorne wieder ufschlüsse. ich han s zwar probiert, han die vier i de abfahrt nach em ufstieg zunere schnelle abfahrtstruppe zäme gno und han im flache une alles gä, aber ich bin nid ane cho. han mich a de spitze ablöse la, will ich nach dem effort k.o. gsi bin. (es hät ziitewies recht gwinded) und das isch denn de fähler gsi. ein, zwei kilometer spöter bin ich erholt gsi und han mich bi de andere glangwielt. d gruppe vor mir, ca. 10, 15 meter, z wiet zum zrugg hole, ich han s probiert, bin de andere problemlos wäg gfahre, aber a di vordere nüme ane cho. han mir lang überleit, ob ich söll mich wieder zrugg falle la oder äleigei wieter kämpfe, es isch ja nüm so wiet gsi, zum zum schluss. da sind plötzlich drü fraue a z brause cho. han zersch denkt, ich lässi die ihres eignigi renne fahre, da s lizenzierti fahrerinne debi gha hät. han denn aber gmerkt, dass hine dra no en typ gsi isch, denn han ich mich dene aghänkt. und die händ es rechts tempo druf gha. au nid so konstant, immer wieder mal schneller, mal langsamer, han ich s gfühl gha. und wo s tempo denn endlich gstumme hät, lat de ander plötzlich die fraue ga, ich han z spat reagiert oder d chraft nüme gha, zum wieder uf z schlüsse. so bin ich denn mit dem andere, wo mich also grad mitabghänkt hät, no de schluss-ufstieg ue und d abfahrt durabe. nach de abfahrt händ mir nomal alles gä. ich han sin schritt aber nie gfunde und nie ganz i sin windschatte schlüpfe chönne. es isch immer öppe en halbe meter offe bliebe. und uf de zielgerade isch er au immer wieder vo links nach rechts und zrugg gfahre. extra, dass ich kei windschatte han? wo ich en denn wenigi meter vor em ziel doch no fasch han chönne überhole, hät er nämlich au nomal zue gsetzt. vo wo hät er plötzlich nomal d energie gha, nach dem er bi de fraue abrisse la hät? aber es isch en packende, interessante, geile fight gsi!
d ziit isch mit 1:12.16,57 nid ganz so guet, wie gwünscht. mit 1:10 hett ich s ziel (30er-schnitt) erreicht gha. aber es isch no klar under em minimalziel vo 1:15 und viel, viel schneller als s letschti jahr, 1:21.01,2. mit 761 pünkt bin ich au relativ zum sieger so guet gsi wie no nie gsi. allerdings muss me gseh, dass es es mini sic renne gsi isch. und nid emal di ganzi nationali spitze gatarted isch. so isch natürlich s tempo nie so höch, wie a de "normale" sic renne. aber zum saisonabschluss isch das grad guet gsi: es macht hunger für s nächschti jahr und laht mich bereits mit de 800er grenze liebäugle. wer weiss, viellich schaff ich s a me chlinnere renne. dadefür wäri gester allerdings e ziit vo 1:08.45 nötig gsi...