fluege, checks, schuel und anderi erschti irdueck...
so, da bin ich jetzt also, in kapstadt. sid chli me als 24h bin ich da. nach guet 18h reise bin ich glanded. aber ich saege eu, so lang reise isch de horror! bin kein flug-fan worde! und d ziit in amsterdam, ueber 2 stund: nur warte, warte, warte. de horror! und denn haet de flug erscht no verspoetig gha! ueber drue viertel stund. aber in kapstadt sind mir nur mit es paar minute verspoetig glanded. in johannesburg haet s no e zwueschelandig gae. deht sind eifach alli die usgstige, wo uf johennesburg sind oder anderi innlandflueg gha haend. denn sind nur no mir "kapstaedter" ueberig blibe. und de ganzi riesigi jumbo isch so guet wie leehr gsi!
in kapstadt haet mich, wie abgmacht de "driver" abgholt und ad duddley road bracht. aber d pamela isch nid di hei gsi! ich bin eifach zu ihrne nachbere gange, isch voll easy gsi. da ich am koffer s fehle vom schloessli bemerkt han, han ich sofort denkt: oh mann, mini reisechecks! und ich has tatsaechlich nueme gfunde. aber de commi tuet au da, und ich han es telefon hei gae...
denn isch d pam cho und mir heand zersch no chli was gaesse. si haet mir mis zimmer zeigt. es isch chli, haet aber es doppelbett, zwei schraenk und no e kommode mit schublade, also eigentlich viel z viel platz. no en chline pult, zum mini ufgabe mache.
nacher sind mir ad waterfront, es riesigs ichaufszentrum direkt am meer. aber es isch vorallem fuer touriste. mir haend deht was z aesse kauft und das denn di hei kocht.
nacher han ich min koffer uspackt, und rated emal, was ich gfunde ha? richtig! mini travelerchecks. muss denn emal luege, ob ich die weider entsperre chann...
s wetter isch im moment recht chalt ("it's a coldfront" haet pam gfunde und mich an sigi erinnered...) ich bin bim dusche und rasiere am abig schier erfrore! und denn schnell is warmi bettli ghuepft.
huet morge isch denn d schuel losgange. und ich han natuerlich grad emale verpennt! ich bin zwar nid z spat cho, han aber ohni morgeesse ga muesse und bin grennt. aber easy ich wohne uuu huere naech a de schuel. bin i 2 oder 3 minute da gsi!
usser dass ich huger gha han und s ziitewies recht chalt gsi isch, isch d schuel aber ganz in ordnig. natuerlich kenn ich noni so viel luet, das aendered aber sicher bald. einigi kenn ich scho. haet huere viel schwiizer und duetschi. mir reded aber trotzdem, au i de pause, mehrheitlich englisch!
jetzt isch de erschti schueltag verbi, am 3 han ich vorerst emal us. und natuerlich bin ich grad mal nach me internet-kafi go luege. und es haet sogar im gliche huus, wie d schuel isch, e internet-lounge. d stund isch 20 rand, macht in etwa 5 CHF. also durchus bezahlbari konditione!
und jetzt wott ich mal luege, ob da mini admin-area au tut, wo ich di hei no in aller eile proged han. hoffed mir s mal...
ach ja, wenn s irgendwo es y haet, wo keis aneghoert, denn waeri a dere stell sicher es z. die beide buechstabe sind naemelich genau vertuscht da! und denn fehled natuerlich no d ae mit de puenktli. d oe und d ue. bin mich also am umgwoehne.