SIC Biel 2004

au 2004 chann ich in biel nid mit mine leistige z'fride sie. abgseh vo de ziit, isch es aber en schöne saisonuftakt gsi.

d sunne hät gschunne und d areis wie au s abhole vo de startnummere und de "tools" isch problemlos von statte gange. au das jahr pass ich no guet in es s-SIC-shirt ine, de trinkgurt isch erneut schlechter worde, wil no grösser

d frauespitze git vo afang a vollgas

und schwerer. d fläsche-qualität hät ebefalls naglah, defür hät s en rucksack (nur: für was bruch ich dä!?) gä, wo no gueti qualität isch. und flip-flops, wobi ich mich fröge, ob de trend nid letscht jahr scho dure isch. jedefalls han ich jetzt au "strings für d füess".

de früelig bini noni oft im "schnelle schue" gstande und han drum bim ifahre d liechtigkeit gschätzt. es isch schön gsi, fasch widerstandslos über de asphalt z gleite. und so isch es denn au los gange: schön und gmüetlich. uf de erschte drü rundene isch s ganzi für mich me es sunntigs-fährtli als es renne gsi. erscht am schluss vo de dritte rundi isch s race richtig lanciert worde, wo di eine los gsprinted sind, während ich no e wasserfläsche gno han, da für d fitness-fahrer s renne z end gsi isch. nach de ziel-durchfahrt isch denn plötzlich nur no es grüppli

d mannespitze

vo öppe 3 herre ume gsi. das hät sich denn mit de ziit wieder öppe uf 5, 6 vergrössered und isch au einigermasse zäme bliebe uf de verbliebende drü rundene. es hät, zu minem lei, au nüme viel anderi möglichkeite gä, da s feld deht scho recht lang zoge gsi isch.

leider isch aber das grüppli nid ganz so schnell gsi, wie ich s mir gwünscht hett. viellich isch es au am starke wind gläge. sobald ich tempo mache han müesse, isch es mir denn gli gnueg schnell gsi. und tempo han ich je länger je öfter müesse mache, denn ich bin absolut nid z fride gsi mit de ziite, wo mir anegleit händ. obwohl ich nie genau gwüsst han, wie mir stönd. aber mir sind churz vor em ziel immer wieder anere uhr verbi gfahre, uf grund vo dere me ziit einigermasse hät chönne schätze. und ebe, sobald ich windschatte gha han, isch es mir z langsam gange. ca. 2km vor em endi, bim letschte chreisel, händ sich en andere und ich plötzlich ällei

d breitesportler gönd chli weniger verbisse ad sach ;-)

wiedergfunde. hinter üs hät sich e lugge von es paar meter uf tue, wo anschienend niemert me gwillt gsi isch z schlüsse. so han ich denn zum andere gmeint "mir chönnd die sach glaub unter üs usmache", was mir denn au gmacht händ. uf de letschte meter sind mir no um d "ehr" gspurted, zu üserer und em publikum sinere freud. es isch au super knapp gsi, hetti sicher en foti-entscheid brucht. aber ich denke, er isch am schluss denn doch eher im vorteil gsi. aber das isch denn ja egal gsi, wil s isch eifach geil gsi!

weniger sexy find ich di nackte zahle: gegenüber em letschte jahr han ich fasch ei minute ziit verlore und 60 rangliste-plätz. aber, wenn ich richtig grechnet han, hani ziit zu de spitze guet gmacht. das chönnti me wohl "biel'sches paradoxon" nenne. jedefalls fräg ich mich jetzt chli, warum ich am afang nid chli me muet gha han und chli "aggressiver" gfahre bin. naja, am nächschte renne wird ich mir die frag chum me stelle müesse. denn wird wohl wieder de silvan mit debi si, und dem sini schnell-starts kenni ja mittlerwile.