SIC Zug 2004

eigentlich wäri s ja es jubiläum gsi, s 30te. statt desse aber eher e entschüig und viel wasser...

4300 skater am start, was neue rekord für de zugersee isch!

agfange hät de samschtig ja guet: bi sommerlicher hitz sind mir in züri in zug gstiege. in zug bim usstiege us em zug :-), hät s wätter scho chli weniger fründlich us gseh. früe sind mir im startblock gsi, und händ de dicke, schwere gwitter-wuchel zuegluegt. si s nächer und nächer cho sind.

wo s üs denn endlich uf d strecki gschickt händ, am 18:36, isch es no troche gsi. zersch dur zug dure, kürvli und schmali strässli. wohl chli en umwäg gegenüber de andere jahr, wil s uf de "originalstrecki" am baue gsi sind. mir händ los gleit, wie di verruckte. für normal bini nid so de schnell starter, aber dasmal bini früe am limit gsi, es hät sich glohnt und d taktik isch, wenn me so säge chann, ufgange. ich han ziitewies ächt glitte, han aber gwüsst, dass nach öppe 20 km, also de helfti, e stiegig chunnt, dass ich deht stercher bin als di meischte wo mit mir so fahred und dass es nacher durab gaht und eher locker wird. das sind halt d vorteil, wenn me d strecki scho 3 mal skated isch.

de silvan, wo hüt sini diesjährigi inline-premiere gfiired hät (zersch, spöter denn glaub eher erlitte), han ich scho am start verlore, für eimal han ich en deht hinter mir la. churz vor de stiegig isch er mit sinere dehtige gruppe a mir verbi zoge, mir sind es stückli zäme gfahre, es hät glanged, zum üs gegesietig mit z teile, dass mir beidi voll am limit sind. zu dere ziit hät s überigens scho lang liecht grägeled. no sind d strasse halbtroche und guet zum befahre gsi.

di gliche 4300 chli spöter...

im ufstieg, öppe bi küssnacht oder immesee, hät sich denn das aber gändered. deht isch de räge denn richtig cho, d strasse sind total nass gsi. de silvan hani denn deht au wieder verlore, da ich, wie ich mir das vorgstellt han, im ufstieg eher schneller gsi bin als d mitfahrer. endlich dobe, hät sich no e gueti gruppe bilded, wo s denn id abfahrte gange isch. vo deht a, han ich s renne würklich mehrheitlich als locker empfunde, han denn fasch nie me müesse biesse und ziitewies sind di schöne "speed-feelings" cho, für die sich di ganzi asträngig lohnt. nur, zum würklich gnüsse z chönne, isch s wetter eifach z schlecht gsi.

uf de letschte kilometer hät s denn plötzlich en huufe vercher gha, da händ s anschienend d fun-fahrer und d juniore scho los la, bevor mir verbi cho sind. die relativ langsam skatende fahrer sind nid ganz ungfährlich gsi, han ich gfunde. a engere stelle hät s üs sicher au no chli ziit kosted. bi de letschte scharfe kurve, zwüsched cham und zug, isch denn no cho, was scho lang wieder ziit gsi isch: ich han bekannschaft gmacht mit em asphalt. jetzt also au mal no in zug. es isch aber ganz und gar nid schlimm gsi, bin nur mit chnü, händ und ellböge chli am bode gschliedered, wobi s de händ nüt gmacht hät. es isch au e ehre langsami, wil gfählrichi, stell gsi. ich bin sofort wieder uf de skates gsi, denn hani s fahre aber nomal als verdammt asträngend gfunde. es dured halt amig es wili, bis ich min rythmus gfunde han. han aber wieder zu de vorherige mitfahrer chönne ufschlüsse. nur hani mi denn natürlich nüme getraut no z spurte am schluss, eimal umgheie langed!

de Mikael Lannezval (grüen-blau) und de Thomas Boucher (gäl) nach 10km. warum nur häts kei bilder vom schluss-spurt bi iguana uf de homepage gha? chönntis viellicht am wetter gläge ha, wo ja lut iguana am sic immer super schön isch? :-)

im ziel hani mi zersch no über d ziit gfreut, han denn spöter müesse feststelle, dass ich mich total verrechnet han - und sowas studiert mathi! mit de facts channi nid z friede si: bin langsamer gsi als s letschte jahr, han au ziit gegenüber de spitze ibüesst (nur 686 pünkt!) und s ziel vom 30er-schnitt wiet verpasst. debi hetti de 30er doch guet zum 30ste renne passt, oder? immerhin, de rang isch in etwa glich wie im vorjahr, sogar no es mü besser. di verloreni ziit laht sich dur de räge und de chlini umwäg am afang erchläre, die 21 verlorne pünkt aber nid. höchschtens demit, dass d profis chli früener händ chönne starte und drum chli länger trochni und somit schnelli strasse gha händ.

letscht endlich zellt ja aber vor allem de spass-faktor. de isch nid optimal, ober doch no immer uf de guete siete gsi.