berlin maratathon 2021: doppelstart

nach de verregnete usgab 2019 (und em usfall 2020) sind d wetterprognose ziemlich warm und au schön gsi.

trotzdem händ mir am samschtig recht lang um e trochenigs inline-renne biebered: über mittag isch us em graue wolkedeckel wo über berlin ghange isch en liechte nieselräge worde. würklich, scho wieder räge? nei, es hät ufghört und no weitgehend abtröchnet. nur bim ifahre uf de start-strecki hät‘s nassi stelle gha. im renne isch das keis problem gsi. de B-startblock isch recht chli gsi, han nie d hoffnig gha deht würklich mithalte z chönne. bin denn minem verrinsgspänli gfolgt so lang ich han chönne. irgendwo han ich ihn verlore und bin inere andere gruppe bliebe. später han i en wieder igholt. no dütlich vor de hälfti sind di erschte vom C-block cho, mit dene händ mir üs gmischt und ich han uf es schnells renne ghofft. i dere grössere gruppe mitsegle isch ganz guet gange. aber leider nid bis am schluss: inere kurve wo ich nid d optimallinie gno han wil zu viel chaos dem ich uswieche han welle, hät de vor mir nachher d lugge nid sofort geschlosse. ich han si denn es wili probiert zue z mache, isch aber nüm gange. so sind mir also abghänkt worde. d gruppe isch aber glich no gross gsi (oder worde) mir händ bald wieder es ordentlichs tempo gha. bi öppe 34 km hät en velofahrer gmeint er müess d strecki quere, es wär fasch zu me unfall cho. de erschti vo de gruppe isch hät grad no rechtziitig d kurve kriegt, im wahrsten sinne des wortes, und isch vo de strecki weg in e sietestrass, quasi mit em velofahrer zäme. ich han glück gha, für mich isch es wieter gange. ich han aber gmerkt, dass ich au nüm so sicher uf em rechte schuhe stahne. hät sich de schuebändel liecht glöst? oder de fuess zämezoge? eigentlich sötti doch s gegeteil de fall si. isch aber es problem wo ich de summer scho öfters gha han. nur: im training git‘s immer mal wieder d möglichkeit d schuhe neu binde. im renne halt ebe nid. wo churz später woh e wieteri gruppe us em C-block cho isch, s chaos und s tempo wieder gstiege han ich nüm ganz mit möge oder welle. ich han mis verrinsgspänli us de auge verlore und mich irgendwo hine i de gruppe igreiht. hauptziel: unfallfrei is ziel z gho. und dass das ersch im ziel gschafft isch, isch mir churz vor em brandenburger tor vorgeühert worde: en sturz churz vor mir, ich han chönne uswieche aber d  warnig verstande. jetzt wo alles guet gange isch, denk i aber trotzdem chli schad: 1:24 han i nur um wenigi sekunde verpasst. mis vereinsgspänli hät uf dene letschte paar kilometer gar no e minute usegholt.

am sunntig morge han ich mich ganz guet gfühlt. d bei zwar nid frisch, aber nüt hät weh tue. d sunne hät gstrahled, ich han im startgländ no vo öppertem sunnecreme übercho. isch nötig gsi. ich bin das mal pünktlich im startblock gsi, han de startschuss sogar mitübercho. sehr emotional gsi. langsam hät sich d masse in bewegig gesetzt. ich han probiert mis tempo und min rythmus z finde, isch aber nid eifach gsi, immer mal wieder (wohl vieh z viel) en blick uf d uhr, d pace isch mal bi me 6er und denn wieder bi me 5:20er gsi. debi hett‘s am anfang en 5:45er si sölle. a de getränkeständ denn immer wieder ahalte. es isch nid eifach gsi a wasser z cho. und irgendwie han i au mühe gha z trinke. zweimal han i mi verschluckt und no lang ghuestet. bis zu 20km isch das alles aber einigermasse gange. aber deht sind scho d zwiefel cho, dass es für unter 4h lange wird. bi 25km isch klar gsi, es wird wohl nüm gha, ich hetti recht tempo drucke müesse und das isch irgendwie eifach nid möglich gsi. ich han innerlich ufgäh. bin denn nach de getränkeständ immer länger glaufe und han s natürlich au immer schwieriger gfunde, de rythmus z finde. en tüfelschreis. aber ich han irgendwie nid drus usegfunde, wohl wüssentlich, dass alles nur im chopf isch. aber irgendwie han ich kein weg gfunde, s richtige „mindset“ i z stelle. so isch d uhr erbarmigslos wieter glaufe und ich chli jogged und denn wieder spatziert, vo getränkestane zu getränkestand. z friede bin i selbstverständlich nid gsi. aber wieso no mich quäle wenn ich‘s ziel sowieso nid erreiche? de vorteil isch, dass i hüt, am tag nachher, ziemlich beschwerdefrei chann laufe, sogar ufstah und absitze.