obwohl d skating-saison scho vor sechs wuche agfange hät, isch das fühlt s erschte mal richtig skate gsi. so viel trainings sind usgfalle oder vorziitig z end gsi wäg em rege. und au am renne isch e graui wulchedecki über üs gsi. sie hät aber dicht ghalte!
es hät sich bald nach em start e grossi gruppe bildet mit zwei drü trainingsgspänli, eis devot hät sogar s gliche vereinsdress treit wie ich. a das han ich mich ghebed und so isch es irgendwie gar nid so schlimm gsi, dass d bei scho bald weh tue händ. ich bin debil gsi und han en tempohaas vor mir gha. das hät zählt! ich han mich schön hinter ihm versteckt und so sind d rundene verbi gange, wie im flug. all rundeziite sind super gsi, was d motivation höch ghalte hät. uf öppe de siebte rundi sind mir vonere andere grössere gruppe überrundet worde. das hät zu chi konfusion (oder falschem ehrgiz) bi gwüssne gfüehrt. sie händ gmeint, sie müssed dene nah fahre und promt isch es zu me sturz cho. ich han en ghört, aber lang nid gseh. no rechtzeitig, zum chönne auswieche.
uf de letschte rundi denn hät plötzlich neimert meh welle füherigsarbeit mache. all händ welle sich für de schlussspurt schone. als ob's uf dem niveau drufa chämti. ich han denn s tempo azoge und so di andere chli us de reserver glockt. wohl wüssentlich, dass mir das all chance im schlussspurt nimmt. de isch mir aber ohnehin chli suspekt gsi bi sonere grosse gruppe und me kurvige zielilauf. und deht han ich mir denn au gar nüm grossi mühe gäh. im nachhinein chli schad, wil so würklich gspurted isch niemer meh. aber was isch scho de unterschied zwüsched em 42. und 45. platz? ich bin jedefalls zfriede gsi mit dem insgesamt schnelle renne durch das ich am schluss doch recht problemlos durecho bin.