guetsli bache

gester, samschtig, und hüt, sunntig, isch s lang abgmachti guetsli-bach-wuchenendi gsi.

am samschtig am halbi zwei händ mir agfange guetsli ussteche. da de papi au no mitmache hät welle, händ mir zwei (de papi und ich) afange brunsli ussteche. stracciatella-guetsli sind au recht schnell gmacht gsi, de teig-block hät nur i schiebe gschnitte wärde müesse, dass me schöni chlini viereckli gha hät. denn han ich mit em mami d rolle gmacht, für es zweifarigs guetsli. nach me wili chalt stelle (wobi mir s schier vergässe händ use z nä) hät me s nur no chönne i schiebli schniede und hät schöni wiess-schwarzi schnäggli gha.

mittlerwile sind d claudia und ihren fründ uftaucht und si händ sich de schoggi-guetsli, de liebling vo de claudia, gwidmet. ich han denn no mandelguetsli gmacht. han denkt, mach ich chli rational und han e schablone gno, wo mit einem mal

de papi inspiziert di usgstochne guetsli...

ussteche grad öppe 20 drüeggigi guetsli gha häsch. nur isch es verdammt schwer gsi, de guetsliteig us de schablone use z nä. wenn ich s einzel usgstoche hetti, mit chli eifachere förmli, wär s sicher grad so schnell gange. ich han vor luter kampf mit dene guetsli fasch vergässe d olivia am bahnhof z hole. han ebe unbedingt no die guetsli fertig mache welle, di letschte zwei hät denn aber s mami us de schablone use operiert, bis ich mit de olivia zrugg gsi bin. mir ihre han ich denn no meiländerli gmacht, usgsoche und bepinslet. denn hät s scho z'nacht gä.

de white russian isch aber hoch verdient!

mit volle büch isch es denn no ad zimetsterne gange. da hät d olivia en richtige ehrgiz entwickled und mir händ kompliment für di "schönste zimetsterne wo mir je gha händ" üebrcho. s mami und de papi händ in zwüsched zitroneherzli usgstoche und claudia und de thomas händ ihri schoggi-guetsli verziert.

gege mitternacht händ mir denn also 8 sorte guetsli gmacht gha. i migros-teig-einheite sind das öppe 14 teig. so genau chann ich das aber nid säge, da s mami es paar teig sälber gmacht hät.

hüt, sunntig, han ich mit de olivia denn no d chräbeli gformt. die sind jetzt no am "füessli mache". denn sind mir entlah gsi, während s mami no vanillgipfeli gmacht hät. d olivia und ich sind ebe no zu me chlaus-ässe bi kollege iglade gsi.