nach meh als zäh jahr isch das inline-renne wiederbelebt worde. zäh runde, uf de guete, alte panzerpiste sind z absolviere gsi. fasch topf ebe, eigentlich ohni kurve, für min gschmack nid wahnsinnig spannend. dass es frühener andersch gsi isch, han i aber erst später gmerkt.
ich han s gfühl gha, ich heig mich guet ufgwärmt und mich parat gfühlt. denn isch es los gange, wie immer vollgas. wobei, d spitzenfahrer wohl eher gemächlich gstartet sind. s feld isch jedefalls relativ lang zäme bliebe, was mir denn wohl zum verhängnis worde isch. nach öppe drü viertel vo de erschte rundi bin ich abgfalle. es chlises bitzeli z frühe, genau deht hät sich s feld nämlich afange teile. ich han mich gfräged, wieso ich nid no chli durebisse han und mich scho gseh, no nün rundene ällei fahre. aber es isch ganz anders, viel besser cho!
churzi ziit später holded mich zwei skater i und ich chann iistiege und mitfahre. er isch scho mit üs in liechtestei gfahre, sie han ich nid kennt. und er isch hüt guet in form gsi. ich bin praktisch immer hinter ihm gsi, füherigsarbeit isch uf mich praktisch keini abgfalle. isch au guet gsi, s tempo wo mir gfahre sind, isch für mich no immer hoch gsi, han mich nid wie susch oft i sonere situation erholt und später glangwielt. es isch streng bliebe. ich han mich drum chli gfärged, was los isch. immerhin sind bi dene, wo ich verlore han au sotigi debi gsi, wo susch öfters hinter mir sind.
über das han ich aber scho uf de vierte rundi kei gedanke me chönne mache. deht hät üs d spitze vom fitness-feld überholt und es hät grad es paar usgsteinled. die händ mir denn igsammlet und bald au mal d füherigsarbeit mache lah. so isch di füft rundi nomal recht schnell gsi. denn sind sie fertig gsi und mir wieder z dritte wieter.
und denn uf de zweite hälfti vo de siebte rundi gsehnd mir plötzlich zwei vor üs. ich han's schnell erkennt. die zwei, wo susch ambig au hinter mir gsi sind, händ mit de de schnellere doch nid mitmöge und sind so sehr abgfalle, dass mir's no vor em endi vo de siebte rundi igholt gha händ. so sind mir denn di letschte zwei runde z füfte gfahre und ich bin ganz zfriede gsi. offensichtlich sind die beide a dem tag nid so viel besser gsi. wo mir denn langsam uf s ziel chömmed, han ich mal uf d uhr und de kilometerzähler glueged. deht sind ersch 35 gsi. ich han mit öppe 39 grechnet! han drum mehrmals gfräged, ob di andere sicher sind, dass mir fertig sind. sind sie sich gsi, ich han debi aber chli de start vom schlussspurt verpasst und uf de verzichtet. so sind di andere zwei glich no vor mir im ziel gsi, wenn au nur no um sekunde. han ich ihne aber gönne möge. ich han gwüsst, dass ich am nächste tag no en lange lauf als vorbereitig für de berlin marathon uf em programm han.
di hei han ich nomal d garmin date vom renne 2012 und 2013 studiert und debi festgstellt, dass deht de kurs liecht andersch gsi isch und eimal sogar elf runde uf em programm gsi sind. darum isch deht s renne länger gsi.