eigentlich wär's andersch plant gsi: de laufstartplatz isch bueched und de siebti doppelstart plant gsi. aber mis chnü hät nid welle. sit em frühelig han ich problem mit de patellaspitze, nach em inline-renne vo einsiedle han ich s training igstellt und mich probiert uf d erholig vom chnü z konzentriere. bis dato aber noni mit durchschlagendem erfolg. ich laboriere no immer dra umenand.
de berlin-marathon han ich mir dennoch nid näh la. immerhin de 19. in folg. ob s chnü mitmacht und ich praktisch ohni traning no halbwegs mithalte chann, han ich nid gwüsst. warmlaufe isch jedefalls nid gange. a de startlinie isch denn s adrenaline gnueg hoch gsi, dass ich nüm gross as chnü denkt han. und mit em trainingsrückstand sind denn au bald d bei s grössere problem gsi als d chnü. ich bin also "normal" mit em c-startblock los und han mich im peleton ghalte, wo sich e lugge uf de zweite rundi es paar positione vor mir uftue hät, han ich die nüm gschlosse, im nachhinein viellich en fehler. s renne isch zwar nid easy gsi, ich hab aber erstuunlich guet mit möge. d bedingige sind das jahr wohl super gsi, agnehm warm aber nid heiss und kein wind. im ziel e zeit völlig im "rahme vom normale", als ob ich gesund gsi wär: 30 sekunde langsamer als vor zwei jahr, 50 als letscht jahr. nur zeiged ziite vo mine trainingsgspändli, dass mit gsundem chnü und normalem training no viel meh drin gsi wär. aber wer weiss, viellich git's nächst jahr ja wieder gueti bedingige und denn hoffentlich wieder mit meh training und gsunde chnü.