alles isch guet usser em wetter und em esse
so, langsam chum ich da chli z recht. han erschti luet kenne glernt und kenne min schuelwg. guet, de isch au voll easy, und vorallem churz. und trotzdem bin ich jede morge z spat. aber ich han ja au i de schwiiz uf de zug renne muesse. also, was soells...
klass isch easy. mir sind. hm... am morge amig siebe, inklusive mir, plus no en lehrer oder e lehrerin. wobi vo dene siebe nie all da sind. aber egal. zersch haend mir amig zweimal 50 minute grammar bim gavin. und denn zweimal 50 minute wo mir me reded. also eigentlich nur. bi de susan.
am nomitag, han ich amig no zwei lektione, bi de hm... naja, kei ahnig wie me s schriebt. me sprichts wie peter, es isch aber e si. definitiv! am nomittag waered mir eigentlich fuef. wobi mir no nie all gsi sind. wie also au am morge... so chunnt me no viel zum rede und ich han s gfuehl mis englisch macht fortschritt. aber es isch no schwirig z beurteile.
als grammar-book haened mir au s headway (cetko laesst gruessen!). sie kopiered amig grad di aktuelli lektion. im moment isch das unit 10. irgendwie isch es fuer mich langwilig. wil all die so sehr interessante gschichtli, wo i dem buech sind, kenn ich ja scho. aber s grammatik-niveau isch sicher nid schlecht fuer mich.
wohne tuen ich, wie atoent, oepe 2 minute vo de schuel. und recht naech am mehr. vom balkon us chann me grad knapp zwuesched de hueser dure es chlises spickeli vom meer gseh! aber wer denkt, ich mache da une badeferie isch ziemich falsch! sid ich da bin regnets. und chalt isch es au. und zwar verdammt! naja, so chalt isch es nid. aber es chunnt einem chalt vor. s problem isch au nid wuerklich, dass es chalt isch. sondern eher dass d erfindig vo de heizig noni bis dahi cho isch. so isch es recht unagnehm z dusche. han mir au e chlini vercheltig igfannge. aber was solls. de august isch glaub de schlechtischti monet vom ganze jahr! aber d luet da sind glaub no recht froh ab em raege, wil s e huere langi duerreperdiode gha haend. so gits wieder chli wasser. (und das direkt am meer?!)
di meischte luet a de schuel sind duetschi und schwiizer. aber mir laerned trotzdem recht fliessig englisch! mir reded naemli immer englisch. au im usgang!
tja, de usgang. zieschtig und mittwuch sind mir gsi. am zieschtig im kino (bridget jone's diary, oder sowas) naja, de film isch grad no so gange. nacher sind mir no in es pub. und ich han mich als erschts emal gwundered: cuba libre, 13 rand. (durch vier git CHF!) aber au s kino isch billig gsi. 14 rand. aber am zieschtig isch bi ihne so wie bi ues de kinomaentig.
ueberhaupt. s aesse da une isch billig! s maximum wo ich je zahlt han, sind chli me als 20 rand. also, oeppe 5 CHF. aber es isch au in etwa so guet wie d raemi-mensa... han de halbi tag lang hunger. es git au irgendwie nid so viel. aber me gwoehnt sich a alles...
gester abig, mittwuch, heand mir was luschtigs gmacht. mir sind im drum cafe gsi. di halbi schuel. oder fasch. zahlsch itritt und denn kriegsch e so es afrikanischi drum. all sitzed i me halbchreis und denn isch eine cho, wo chli zeigt haet, wie s gaht. mir heand zwei grundrythme glernt. denn haend mir mit dene gspielt. isch no recht luschtig gsi, usser dass jetzt allne d finger weh tuend...
soviel mal fuer de moment. meld mich naechscht wuche wieder. wenn, weiss ich noni, je nach dem, was di andere vo de schuel so mached. denn wenn die weg goend, gan ich mit. aellei weg ga isch erschtens langwilig und zweitens nid so agnehm. denn ganz kapstadt isch in etwa so, wie in zueri s langstrassequartier...