am SIC züri isch es entweder verdammt heiss oder es regnet. hüt isch es heiss gsi, wetter wie a de street parade, bestens zum bade, geignet. go skate wär ich aber hüt ohni de SIC sicher nid...
 am start: "iipaaaaa", gäll jan ;-)  und scho händ di erschti d startschlaufe hinter sich  de bär häts richtig gmacht: badhose und sunnehuet, alles anderi isch z viel gsi a dem tag!  skater uf de quai-brugg  die fotene hät überigens d sabine gmacht, danke!  hm... wer isch denn das!? |
no uf de erschte rundi, wo mir s zweiti mal dur s tunnel sind, hät s e lugge vor üs gä. de stephan hät gseit "musch ga, ich mag mit dere gruppe nid mit". tja, dem "befehl" han ich denn mal ghorcht. "musch ga", hani denkt, und en zwüschespurt anegleit und mich bi dere gruppe mit kämpft. ich han s es wili verfluecht und hinterfräged, ob das ächt guet gsi isch. aber bald isch es chli langsamer gange, zum teil händ mir nur no rolle la und gstosse. und so isch es denn lang wieter gange. immer wieder fahre la, schiebe und gschobe werde, und denn wieder en stuck ziemlich gas gä, dass ich chli am limit gsi bin. bald hät sich usegstellt, dass d yvonne i dere gruppe mit fahrt und ich han mich hinter ihre i greit. deht bini au bis zum schluss bliebe, zum teil uf usdrücklich ihren wunsch. ich han denn mal gmeint, wenn das bis is ziel so wieter gächi, schuldi ich ihre denn en kaffi, ich provitieri so viel vo ihre. si hät gmeint, nei nei, ich chönni defür was lerne. und das i minem 34. SIC renne. tatsächlich hät si mir im ziel no es paar gueti tricksli verrate. die bahlt ich jetzt aber für mich. :-)
de SIC züri isch au das jahr es würklichs heim-renne gsi. mehr denn je! als ersts han ich de roger frensch gseh, uf em hockey-platz en gegner, i dem fall aber e untersütztig, er isch am seefeld a de strass gstande. d sabine isch uf de quai-brugg gsi und am bürkliplatz isch d olivia mit ihrne eltere gsi. uf de letschte rundi han ich denn au no mini eltere entdeckt. jaja, de erfolgsdruck isch schwer uf mir glasted! ;-)
mit üsere stop-and-go-gruppe sind mir aber eigentlich doch no guet vora cho. han unterwägs zwar fasch nie uf d uhr gluegt. nur nach de erschte rundi emal. und trotzdem isch es nie so ganz richtig hart gsi. ich han ziemlich viel trunke, susch isch es es tendenziell eher lockerers race gsi. zu beginn vo de vierte und letschte rundi han ich mini bei denn mal chli gmerkt, das isch denn aber au nomal verbigange. d yvonne hät mal unterwägs gmeint, si probieri mir en guete schluss-spurt vor z bereite. han deht nur zur antwort gä, "mal luege, ob ich denn überhaupt no hinter dir bin". das bini au no gsi! bi de letschte wendi bide china-wiese hät si ihri ganzi klass und ihres taktische talent ufblitzela. weiss nid genau wie s gange isch, aber si hät s gschafft, dass mir nach de kurve positone drü und vier gha händ, optimal zum uf di langi zielgerade i z büge. deht hät sich denn langsam au d gruppe ufglöst, wer chönne hät, hät nomal zuegleit. mir sind bestens mit debi gsi, aber de spurt vo üserer gruppe händ mir nid grad gunne. irgendwie hät au de biss gfählt, um deht um di letschte sekunde z kämpfe. oder bin ich doch me kapput gsi? ich bin jedefalls schön hinter de yvonne bliebe und han ich, verhältnismässig, locker is ziel zie la. und deht gmerkt, was mir für e hammer-ziit glaufe sind. s datasport-SMS han ich no nie so sehnlichst erwarted wie hüt und wer weiss, wie lang s no uf minem handy si wird! 1:08.19.54, de kategorie-rang, speed men breitesport zwüsched 20 und 30: 9! mini wohl ersti top-ten-platzierig am SIC. vo de breitesportler bin ich 65 worde vo öppe 239, dezue chömmed natürlich no die, wo ufgä händ...
endlich isch au in züri de 30er-schnitt erreicht. gegenüber em letschte jahr han ich mich um 130 plätz, drüehalb minute und 30 punkt verbesseret.