SIC Sursee (Sempachersee)

de tag hät mit enere überraschig agfange: de matthias hät aglüte. das isch e überraschig gsi, wil ich nid gwüsst han, das er mini telefonnummere hät. so bin ich unverhofft zunere reisebegleitig cho.

zäme sind mir uf sursee, wo mir bi bestem wetter no vieli anderi ITL-skater toffe händ. unter anderen de urs, de christian, de simon und de erwin. mit dene bini den an start vo ?speed breitesport?. de matthias isch zu de fitnss-skater gange.

de christian fahrt normalerwies bi de team-skater und isch nur usnahmswies bi de breitespotler gfahre. leider isch üses grüppli scho am start verlore gange. ich han mich denn ad ferse vom christian ghefted. de hät als erschts mal festgstellt "das isch nöd euses niveau" und hät afange überhole. so sind mir immer wieter füre cho, bis er mal bi me grüppli bliebe hät welle. hani au nüt degege gha. han scho es erschts mal bini bei gspürt. im windschatte hani mi aber prima erhole chönne. wo mir denn gfühlsmässig uf de andere seesiete gsi sind, hät s denn langsam aber afange asträngend werde. trotz de tatsach, dass ich mich immer schön han chönne hinter em christian verstecke! han deht denn überigens au no eine ?troffe?, wo ich vo letscht jahr kenne. us em grüppli vo de yvonne, wo mich z züri zoge hät und au am zugersee gholfe hät. aber eigentlich hani ja welle devo schriebe, dass s liede bereits agfange hät. ich bin denn jedefalls gottefroh gsi, wo mir endlich uf d ziel-gerade ibogge sind. so hani gwüsst, dass mindistens d hälfti dure isch! nach em ziel e scharfi links kurve, nomal eini und denn mit voll speed dur s village dure. das isch natürlich es highlight gsi, wil s deht am meischte lüt gha hät. mir händ d chance gnutzt und chli ?d show abzoge?: mir sind wohl uf de ganze strecki nie so schnell gsi, wie deht!

natürlich händ mir aber bald d bei wieder weh tue. aber de ?hiewäg? isch au das mal ringer gsi. überhaupt isch es mir einiges schneller vor cho, als vorher. sind mir schneller unterwägs gsi? oder isch s eifach dra gläge, dass ich scho alles kennt han? wie au immer... plötzlich taucht no e anderi gruppe näbed üs uf und eine rüeft ?hey ITL?. es isch de simon gsi. üsi gruppe händ sich denn gmischt und mir sind wieder drü ITL-fahrer gsi.

wo mir abboge sind zum am endi vom see uf di anderi siete z fahre, hät de christian nomal gas gäh. bin nid ganz drus cho, ob er no hät welle weg fahre oder eifach di andere fahrer teste. ich bin natürlich mit, aber bald sind di andere au wieder bi üs gsi und mir händ üs denn doch lieber wieder wieter hine igreiht, wo s windgschützter gsi isch, als a de spitze.

denn hät s zersch mal wasser gä, was ich dringend brucht han. han denn aber doch zuesehends mühe gha, a de gruppe dra z bliebe, vor allem wenn s dezwüsched wieder passage gä hät, wo s tempo azoge worde isch. so isch mis ziel denn gsi, eifach mit dere gruppe, am liebschte grad hinter em christian, is ziel z cho. gege de schluss isch es chli hügelig worde. bi irgend einem so me hügel han ich de simon hinter mir rüefe ghört ?ich mag nüme?. wo ich nacher hintere gluegt han, isch hinter mir au niemert me gsi. er hät wohl deht abriesse la und mit ihm di ganzi schlange hinter ihm. ein, zwei ufstieg später händ denn au mir d bei so weh tue, dass ich schreie hetti chönne. ich han für en churze moment ufgä. d gruppe isch gange, vier anderi fahrer sind au no zrugg bliebe, dene hani denn grad no aghänkt. wo s hügeli gmeistered gsi isch, hani müesse feststelle, dass es en grosse fehler gsi isch, nid uf zäh bisse z ha! mir sind nämlich viel wieter gsi, als ich denkt han. nach em astieg isch es grad wieder durabe gange, wo ich mich nomal erhole han chönne. en wietere astieg später und mir sind uf de langi schlussspurt i boge. deht chunnt bi mir immer nomal en energie schub, uf das chann ich mich erfahrigsgemäss verlah! so isch mir im windschatte vo mine mitfharer z locker gsi. ich han drum denn uf de lange zielgerade d füehrig überno.

bis is ziel han ich zwar nur 20 sekunde uf de christian verlore, aber s ziel, mit im is ziel z cho, isch trotzdem verpasst gsi. drum bini denn zersch nid so z?friede gsi. erscht di hei han ich genauer chönne analysiere: platzierig isch einiges besser gsi, als letscht jahr. ziit isch zwar langsamer gsi, gegenüber de spitze bini aber au besser gsi als letscht jahr (plus 27 pünkt). so isch es denn doch keis schlechts renne gsi. nei, eigentlich isch es sogar es guets gsi: es guets resultat, kein sturz, fast immer windschatte und beschts wetter bi agneheme temperature!