SIC Zürich

scho am morge, woni di hei gange bin, hani mi gar nid guet gfühlt. überhaupt han ich dem renne chli skeptisch entgege gluegt. zwenig gschlafe und z viel sport gmacht, i de ganze wuche vorher. so chann me doch nid fitt si.

und denn hät no d sunne erbarmigslos abebrennt: de start isch am nomittag am halbi zwei gsi. aber eigentlich bin ich mich das ja gwohnt, me muss scho recht wiet zrugg ga, i de gschicht vom SIC (WIC) züri, bis me uf e usträgig chunnt, wo s nid extrem heiss gsi isch, hani s gfühl.

zersch sind no d fitness-fahrer und -fahrerinne dra gsi. näbed vielne andere vom ITL sind das au d sabine, wo endlich wieder mal mit mir an es renne cho isch, d olivia und de matthias gsi. si händ mir nüt guets z verzähle gwüsst, vo ihrem renne: es heigi nüt z trinke gä und di unzählige flick uf de strass seiged vo de hitz bereits am mittag so warm, dass es weich und chleberig worde sind. es isch also üssersti vorsicht bote gsi bim fahre und trotzdem mit vielne stürz z rechne gsi.

mit em stephan, em urs und em erwin bini an start. und wo s los gange isch, bini grad au recht loszoge. wohl zu sehr, han aber eigentlich nid denkt, dass ich s so übertriebe han. viellich aber scho. die, wo am strasserand glueged händ, händ mir nacher verzählt, ich seigi uf de erschte rundi i de dritte gruppe gsi. naja... viellicht hett ich no chli me uf zäh bisse, wenn ich das gwüsst hetti. oder au erscht recht nid. jedefalls, nach einere rundi, uf dere mir bereits bei chli weh tue händ, isch es bi de spitzcheri am zürihorn zunere chli unschöne wendi cho. ich bin chli z wiet use gfahre, und han so churz de aschluss ad gruppe verlore. han denn aber scho deht de biss und de wille nid gha, die lugge wieder z schlüsse. warum genau, weiss ich au nid so recht. es isch eifach nid so min tag gsi. mit de nächschte gruppe wo cho isch, bini wieder mit, han denn deht eine kennt, han denkt, das motivieri und halti mich deht. aber ich bin denn au nid i dere gruppe bliebe. weiss gar nüm wenn, wo und warum genau. han aber sicher no zwei wieteri mal d gruppe zie lah und an e nächschti aghänkt. mindistens zweimal isch es wäge stürz vo fahrer vor mir gsi, wo d gruppe usenand grisse händ, und ich nid möge oder welle han, d luggene z schlüsse und de aschluss wieder z schaffe. uf de dritte rundi, wo s scho wieder uf s ziel zue gange isch, aber no vor em bürkliplatz, bini wieder druf und dra gsi e gruppe a mir verbi gah z la, das isch glaub nach em zweite sturz unmittelbar vor mir gsi. ich bin a dritter position skated, de erschti hät s gno und di zweiti mitgrisse. ich han glück gha, wie no wieteri zwei mal, wo s mich sälber fasch gno hetti. aber ebe, eigentlich bini ja debi gsi z schriebe, wie ich vor em bürkliplatz uf de dritte rundi, fasch au die gruppe gah la hetti. aber denn han ich de erwin entdeckt. das isch wohl no d rettig gsi. ich bin de gruppe nagrennt und han mich direkt hinter ihm igreiht. und so bini gfahre, e ganzi rundi lang. und das isch denn au nid schlecht gange. oder es isch halt gsi wie immer: am schluss magi plötzlich nomal chli. jedefalls han ich obwohl ich a de spitzcheri im horn no ziemlich z hinterst i de gruppe gsi bin, uf de zielgerade locker mithebe möge und bin sicher i de ?mitti? vo de gruppe is ziel cho.

deht bini zersch mal extrem unzfriede gsi. es isch es langs liede gsi. ich han mir paar mal überleit, uf z gäh. wenn ich s gfühl han, ich liegi nid guet im renne, laht d motivation schnell na und es wird schwer für mich, uf zäh z biesse. schlussendlich isch aber ziit gar nid so schlecht gsi. es isch immerhin s zweitbesti ergebnis vo züri und s minimalziel vo me 30er-schnitt hani au erreicht. wer weiss, ob ich nid unterwägs s eini oder anderi mal chli me uf zäh bisse hetti, wenn ich das gwüsst hett... für mich isch irgendwie s renne glaufe gsi, nach dem ich di erschti gruppe, die wo ich mir gemäss minere taktik ?usgwählt? han, nid hebe möge han.

ziit und liede hin oder her, chann ich mich eigentlich aber doch zu de sieger zähle. mit zwei fast stürz, mehrere stürz vor mir, devo eine unmittelbar vor mir, chann ich mich glücklich schätze, dass ich mini huut buechstäblich unversehrt is ziel rette han chönne! und das isch doch au was, wenn nid s wichtigste, oder?