SIC Engadin

frühe hani müesse ufstah. und das nach dem s gester nid eifach gsi isch, i z schlafe nach dem glorrieche schwiizer WM-sieg. aber schlussendlich hät sichs gloht.

d reis hät bestens klapped. de matthias hani im zug über de seedamm troffe und d sabine hät üs im zug uf chur plätz reserviert. das mir mit em langsamere, aber früenere zug uf chur sind, hät sich uszahlt. mir händ üsi plätz i de RhB chönne ussueche. wo de direcktzug vo züri cho isch, sind plätz aber schnell mangelwar worde. d zugfahrt vo chur uf st. moritz isch aber au so no s schlimmschti vom tag gsi.

z st. moritz sälber sind mir nur churz bliebe. mir sind ziemlich schnell uf maloja, wo mir im startgländ über e stund sünnele und üs vo de reisestrapaze erhole chönne händ. d rennvorbereitig isch au scho seriöser gsi, vowäge ilaufe und so. aber mini füess han ich dick taped, d blatere vo züri sind noni verheiled gsi. im renne händ mir d füess aber nie weh tue, au s chiselschteinli wo ich im schuhe gha han, und z spat bemerkt han, hät mich nid beiflusst.

im startblock han ich denn doch no zwei ITL-fahrer gfunde wo speed breitesport gfahre sind. beidi händ als ziel e ziit zwüsched 1:10 und 1:15 agä. das, hani denkt, isch guet für mich. han mich am start ine aghänkt. de martin händ mir uf de erschte meter verlore. am simon bini dra bliebe. genau wie letscht jahr. und genau wie s letschti jahr isch er wiet füre gfahre. zu wiit für mich. i einem vo dene chreisel han ich nid ganz d ideallinie verwütscht. die lugge wo entstande isch, hani nid chönne schlüsse und ich han en teil ällei müesse fähre. mit de nächschte oder übernächscht gruppe han i denn wieder mit chönne. und deht isch de martin drinn gsi. mit dene bini denn dur st. moritz grauscht und uf d charnadüra zue. vor dere han ich recht respekt gha. ich stahne denn scho noni so sicher uf mine neue, tüfe schuhe. mini gruppe, ich bin z?hinterst gfahre, wil ich ehrlicherwies zum teil scho chli bisse han müesse, isch nid uf de teppich. ich han drum nur de churzi stuck gno, s erschti mal bi minere siebte teilnahm! es wird denn scho recht schnell, und mini bei händ ziietewies recht gfladdered. und bald au brennt. wer meint, zum bremse oder so, ständi me ufrecht i sonere abfahrt, de verstaht nüt vom sakte und vo de physik. i d hocki ga bringt stabilität. me isch kompakter und so chönnd d hebelgsetzt weniger stark würke. zudem isch de schwerpunkt tüfer am bode. trotz dem schwere bei han ich s i de ebeni denn guet gschafft, de aschluss ad gruppe wieder z finde und han mich dhet sogar chli usruebe chönne. au am afang vom liechte ufstieg nach pontresina. s luschtigi deht isch, dass me uf de gegesiete gseht d lüt entgege cho. jenschti speed-team-fahrer hani gseh, wo füf minute vor mir gstarted sind. usser em jan, em schnellste ITL-skater vom tag, han ich s ganz ITL-speed-team a mir entgegecho gseh. da hani gwüsst, dass ich nid all zu schlecht im renne liege. das han ich mir denn au bewusst mehrmals gseit. han ja bereits eimal müesse e gruppe ga lah, und nach de erfahrige vo züri, han ich sehr uf mini ?luune? gachted. han überigens au s relativ problemlose, aber doch sehr nerve kitzelnde abefahre vorher als erfolg gwerted. natürlich chann me säge ?glück gha?. ich han s aber eher als es zügnis vo starche bei agluegt, wo deht d schue immerhin no gnueg ruhig händ chönne hebe, dass nüt passiert isch.

bis obe am ufstieg nach pontresina, hät sich denn e recht e gueti und vor allem e grossi gruppe bildet. di erschte fitness-team-fahrerinne han ich deht überigens au scho überholt. mit dere grosse gruppe bini denn id abfahrt, was natürlich e gueti sach gsi isch. i de ebeni une, nach em chreisel, isch es mir aber fasch z langsam gange. vo zwei anderi usgrisse sind, han ich dene probiert nah z fahre. ich han aber viel z spat reagiert. ich han sicher en kilometer oder meh kämpft, no mit me andere. aber ich han di vorder gruppe nüme chönne hole. ich han das unterfange abbroche und han mir mühe gä, möglichscht locker und energiesparend z fahre, zum di nächschti gruppe näh z chönne. han no en andere einsame skater atroffe. s zweite sind mir bim getränkestand verbie grollt. das hät de vorteil gha, dass ich in aller ruhe han chönne e fläsche näh, obwohl ich mich bim versuech di alti fläsche z leere, grausam verschluckt han und mege hueste han müesse. irgendwenn isch denn doch no e gruppe uftaucht, die hät aber nid würklich schneller welle fahre als mir! die hät us mal igholt gha, aber denn au wieder verlore. erscht wo no e wieteri gruppe vo hine cho isch, isch es zügiger gange. für mich isch es aber problemlos gsi, deht i z stiege. und wer isch i de gruppe gsi? de martin und de simon. ich muss beidi mal überholt ha, ohni s gmerkt z ha.

die gruppe hät recht guet funktioniert. es isch sicher au de schönschti teil vom renne gsi. no immer prächtigs wetter, es super tempo und s ganzi ohni übermässigi astrengig. en blick uf d uhr hät mich hoffe lah! unter 1:15 sötted mir doch bliebe... und chli später, wo s ziel vo wietem scho sichtbar gsi isch, isch au 1:10 in griefbari nächi scho. de schlussspurt hani denn grad chli z frühe azoge. han öppe 50 meter vor em ziel nüme richtig zie möge. unter em ?boge? no schnell en blick uf d uhr, und wohl ziemlich s erschti mal am SIC richtig gjublet! 1:10 isch unterbote gsi!

de matthias han ich im ziel ziemlich bald gseh, zersch aber no vieli anderi bekannti. zäme händ mir denn üsi und de sabine ihri täsche gsuecht. das isch wohl de nachteil, wenn me bi de schnellere isch: me muss sis züg us me no viel, viel grössere huufe go sueche gah. au em matthias isch es guet gange und d sabine isch au ziemlich z?friede gsi. nach enere duschi und enera bratwurcht sind mir no mit me wietere ITL-skater uf de zug. de hät mega verspätig gha, aber d aschlüss sind bis chlosters gwährleischted gsi und bis denn hät er au d verspätig wieder ufgholt.

churz vor malans han ich denn als erschte vo üs s ersehnti datasport-SMS übercho. unglaublichi 1:08.57,70! de matthias hät hei aglüte und sini muetter hät ihm sis resultat im internet nahgluegt. er isch definitiv de gfiireti held gsi, für di reschtlichi zugfahrt. er hät nur grad 1:06.55,29 brucht und isch gar sechste(!!!) vo de kategorie fitness-breitesport worde!

ich bin mit mir aber au sehr, sehr z?friede gsi. di hei han ich sofort müesse am computer go s renne analysiere und d ?abrechnig? mache. es isch di mit abstand besti ziit vom engadin. e verbesserig vom rekord um fasch zeh minute! d platzierig isch au spitze, nomal 150 räng besser als letscht jahr. und au de abstand zu de weltspitze (es isch es WIC-renne gsi) isch chlinner worde. han mit 742 pünkt mit rekord vo bern (2004) um zwei püntkli überbote. dass es au bezüglich de gschwindigkeit (36.54 km/h) s schnellschti bisher gfahrni renne gsi isch, muss ich ja wohl nid ufschriebe. es gaht im engadin ja leicht durabe und de wind hät üs das jahr netterwies in wieder rugge blase.