SIC Zug

eigentlich bin ich frühe z zug gsi. han denn aber plötzlich doch no stress übercho.

aber de reihe na: han scho am igang bekannti gsichter troffe, bi de startnummere-usgab und natürlich bim ITL-zelt. han mit allne chli gschwätzt und denn immer no chil vorigi ziit gha. won ich den d skates han welle alege, han i gmerkt, dass ich ja no d rolle wechsle muen. sind no immer die vom trainig druf gsi. schnell, schnell, schnell hät s müesse gah. denn bini doch no rechtziitig bereit gsi. bin mit em stephan, em erwin und em martin go ifahre. und sind denn au zäme im startblock agstande. nach de guete erfahrige vom engadin, han ich denkt, halt ich mich an martin. han mich denn bim start di ganzi ziit nur uf in konzentriert. am start isch s amig fasch am schwerste zum zämebliebe. vor allem in zug. wil s renne deht noni ?frei gä? gsi isch und dur engi gässli - sogar über pflastersteig - gfüert hät isch d masse ziemlich zäme bliebe. wäge baustelle sind die umwäg nötig gsi.

sobald mir denn, nach zwei, drü kilometer, uf de richtige strecki gsi sind, isch es denn es chlises bizeli besser worde. es händ sich denn immerhin agfange gruppene bilde. die sind aber immer no sehr, sehr gross gsi und oft isch es au es chaos gsi. wenn gruppene enand überholt ufgholt oder wäg zie händ welle, denn sind alli immer wieder hin und her gwächslet. au de ?handorgeleffekt? isch immer wieder uftauch. für mich isch das aber gar nid so schlecht gsi. ich bruche ja e immer chli ziit, bis min motor warm glaufe isch, so isch mir de langsam start entgege cho. und die intervall-training ähnlichi phase isch sicher au nid unbedingt e schwächi vo mir. wie vermuetet hät sich denn im ufstieg z immesee d lag aber beruhigt. deht sind d felder usenand gheit und d gruppene chliner worde. bin überigens ziemlich erstuunt gsi, wie schnell mir deht ue gfahre sind! han nie s gfühl gha, es gängi würklich durue. au vom fahrstiel her, han ich immer s gfühl gha, es isch no de ?flach-fahr-modus? drinne!

dobe denn di grossi ernüchterig: kei getränk! und das bi dere riese hitz! immerhin isch es denn durabe gange. mir sind inere guete gruppe gsi und händ i de abfahrt e anderi gruppe chönne überhole. i dere andere gruppe isch de rené, en fitness-team-fahrer vom ITL gsi. überhaupt händ mir bis deht ane scho s halbi fitness-team überholt. de franco scho mega frühe, denn bald zwei fitness-fraue und de stephan au no vor em ufstieg. das han ich z zug no nie erlebt! scho gar nid so frühe scho so viel mit dress überholt! darum hani denkt, dass mir, trotz chaos und ?handorgle? schnell unterwägs gsi sind.

nach de erschte abfahrt isch de hügligi teil cho. deht händ denn de martin, ich und no en dritte zersch für s tempo gsorget. wobi mir nid lang müesse händ. es hät üs, wo ich mich grad ablöse la han welle, e chlises grüppli vo hine her überholt, dene sind di andere nah und ich han mich chli wieter hine wieder igreiht. direkt hinter em martin. so sind mir denn au bliebe bis fasch am schluss.

de unmuet über de coni altherr, de SIC-organisator isch mit de zuenehmend trohne mühler stetig gstiege. bis denn, bim fun- und juniors-start doch no wasserfläsche abgä worde sind. reichlich spat, aber immerhin...

d juniore und d fun-fahrer müends grad gstarted ha, nach dem mir verbi gsi sind. di erschti junioregruppe hät üs denn ziemlich bald überholt. immerhin isch eine vom ITL debi gsi. es zweits chlises grüppli, bestehend us drü ITL-juniore isch au verbi gfahre und vor üs hie. die händ denn es wili lang für üs s tempo gmacht. irgendwenn händ vorne dra aber es paar abriesse la. das isch sehr schad gsi, ich hetti dene sicher guet nah möge. han s zu dere ziit i üserer gruppe nie me als astrengend empfunde. au de martin hät nacher gmeint, es seigi chli schad, dass mir uf de letschte zeh kilometer chli bummled seiged. aber wenn me inere gruppe a de viellich zehte position isch, chann me fasch nüt mache. bis me führe gfahre isch, hät me chum me d energie, zum s tempo hoch halte. im letschte dorf vor zug händ mir no de derschti speed-team fahrer vom ITL igholt, de markus. ?hallo säge? isch aber nid gange, wil s fasch zu me umfall cho wäri. en andere isch in en orange töggel inegfahre, wo e strasse-sperri markiert hät.

eigentlich han mich mir vorgno, frühe a z griefe, grad nach de scharfe rechtskurve. deht isch denn de strassebelag recht schlecht gsi und ich han s glich bliebe lah. für ein moment isch s mir denn au i de gruppe nomal gnueg schnell fürschi gange. wo de besser belag cho isch bini au no chli bliebe. es hät es paar 100 meter vor em ziel no e munzig chlini abfahrt unter enere isebahnbrugg dure. de schwung han ich denn grad usgnutz und no zu me hammermässige sprint agsetzt für d mitfahrer us de gruppe wohl ziemlich unwiderstehlich gsi. ich bin links use und han gseh, dass es lang niemert hät. bin füre gsprinted und han denn uf di rechti siete gwechslet, wil s deht me platz gha hät. so en schlussspurt wie dä han ich scho lang nüme anegleit!

natürlich hät im ziel grossi z?friedeheit gherrscht. kein sturz, super wetter und e gueti ziit. han si öppe uf 1:18 gschätzt. dass de martin und ich bi glägeheit wieder zäme fahred, isch nach dem renne schnell e abgmachti sach gsi! di würklich grossi freud han ich aber erscht gha, wo ich genaueri resultat gseh han. ziit isch no besser gsi als erwarted: 1:16.16,94. han mini bestziit um über vier minute verbessered! au gegenüber dene jahr, wo s renne no guet drü kilometer chürzer gsi isch. s ziel vom 30er-schnitt isch au erreicht und es hät en neue punkterekord gä. de han ich zwar scho nach em engadin verkündet, han aber vorher gseh, dass das deht blufft gsi isch. im 2003 han ich am sempachersee scho 755 pünkt gha. das han ich jetzt uf 756 gsteigered. natürlich bezieht sich das nur uf d SIC renne, wo au immer internationali spitzeathlete mit am start sind. ohni die han ich scho mal 761 (linth 2003) und i de fitness-katerogrie mal 757 (züri 1999) pünkt gha.