MINI SIC Tuggen (Linthmarathon)

s letschti schwiizer renne isch nach em motto "klein aber fein" gsi. nur paar hundert teilnehmer, defür händ s für die guet gluegt: dusche, getränk, pünktliche start, klare startort und schöns wetter. wänn am SIC au imme

defür isch es nid so eifach gsi, zum uf tugge z cho mit em zug. aber me chann halt nid alles gha. nach enere guete stund sind de jan und ich aber bi de post z tugge a cho. und nach wietere guete zeh, eher füfzeh minute sind mir im village itroffe. grad bim ziel händ aneri ITL-mitglieder es zelt ufgstellt. super! wo mir ach so sind, sind d fittness-skater grad gstarted. d sabine und de matthias händ mir denn bald verbieflize gseh und susch händ mir no einigi anderi troffe. mit em roman und em jan bin ich mich go ilaufe. zum mit ihne go ifahre hät s mir nid glanged, han z lang brucht zum d füesse z tappe und d schuhe a z lege. han defür mit de sabine und em matthais, wo mittlerwile fertig gsi sind, no e halbi rundi dreht. si händ mir di heikle stelle uf em erste strecketeil zeigt. de zweiti isch problemlos gsi. uf em weg zum start hani nomal müesse umchere, han d nummere vergässe...

de start isch chli schwierig gsi. da ich scho lang keis MINI SIC-renne me gfahre bin, han ich nid so richtig gwüsst, wo ista. han denn am start recht gas gä und bin in e gruppe ine cho, wo mich zersch no guet dunkt händ. ei gruppe wieder vorne währed no de jan und de roman gsi. han mir am afang no überleit, zu dene uf z schlüsse probiere. han s aber bliebe la. was guet gsi isch, wie sich denn usegstellt hät. die gruppe nach ihne isch mir nämlich denn au chli z schnäll worde, han ich müesse merke. am endi vo de erschte rundi hät üs no en schnellzug überholt. a de hät sich die gruppe aghänkt. s neui tempo isch mir denn aber z schnell worde und ich han afangs zweiti rundi die gruppe zie lah. das hät mich im erschte moment recht ufgregt. ich han au recht lang müesse warte, bis e nächschti gruppe cho isch. mir dere han ich denn aber guet mit möge, de stephan isch no drinne gsi. ich han mich hine aneghänkt und zersch gar chli glangwieled. aber d gruppe isch relativ gross gsi und es hät nid so guet funktioniert. es hät recht "ghandorgeled". i de ufstiegig han ich de moment gnutzt und bin innerhalb vo de gruppe wieter füre gfahre. das hät sich au glohnt, de gruppe isch nämlich nacher chliner worde, ich han aber mit em vordere teil guet mit möge.

di dritti runid isch gfühlsmässig di schnellschti gsi. ich han mich aber guet i de gruppe halte chönne, am endi vo de dritte und afang vo de vierte rundi bin ich denn au mal no mit füerigsarbet mache dra gsi. han mich denn relativ wiet hindere falle la und han wieder vom windschatte vo de andere profitiert. nach dem mir bi de zielpassage nur ganz knapp em überrunde vo de mannespitze entgange sind, händ üs zwei kurve später d fraue i gholt, wo zwei minute nach üs gstarted sind. die händ üs nid nur i sondern au überholt. aber di vorderste lüt vo üserer gruppe sind dene grad na. so händ mir also d frauespitze als tempomacherinne gha. zersch isch es natürlich recht guet fürschi gange, gege de schluss isch es denn müesahm worde, wil die ladies afange händ ihri taktische spieli spiele. vor em schlussufstieg isch es ziemlich "stop and go" mässig gsi. de ufstieg isch zackig gange und ich han müesse luege, dass ich no guet i de gruppe id abfahrt chumme. deht hani glaub es paar plätz verlore. nach de abfahrt oder scho während de abfahrt händ d fraue de spurt azoge, was vo üs wohl au einigi mache hetted welle. das hetted mir aber natürlich bliebe lah söll, d fraue händ ja wohl au es recht uf ihres eignigi renne. zersch händ s en schöne chline vorsprung gha. denn hät aber eine vo de manne au no zum spurt agsetzt, was ihm wenig netti kommentär ibracht hät und so e art en "halbspurt" usglöst hät. i dem han ich aber wenig z bstelle gha für eimal. bin mit de letschte vo de gruppe is ziel cho, was ich mich eigentlich nid so gwohnt bin.

trotzdem bini aber meh als z friede. han welle unter 1:06 bliebe, wil deht de 30-er-schnitt gsi isch. im ziel han ich uf minere uhr grad öppe e stund gha. und di hei isch d freud no grösser gsi: weniger als ei stund! scho unterwägs han ich amig uf d uhr gluegt und bald gmerkt, dass de "gruppe wechsel" nid schlecht gsi isch für mich. die nächschti grösseri gruppe, also wohl die, wo ich ursprünglich drinne gsi bin, isch meh als drü minute schneller gsi. mit dene hett ich wohl würklich nid mit möge. au d punktezahl isch hammermässig: s erschti mal han ich es achti z vorderst gseh! aber natürlich isch das mit vorsicht z gnüsse, vo de hütige 14 chöpfige spitzegruppe würded wohl chum ei hand voll i me A-renne au id spitzegruppe ghöre. aber es gseht natürlich i minere statistik schön us. :-)