SIC Sursee 2008

mit chli verspätig schrieb ich glich no es paar zeile zu dem renne. i de letschte täg bin ich mit iPhone-installiere und mich a quatico z gwöhne eifach nid dezue cho...

as renne han ich aber usgruebed chönne, sind doch die zwei täg vorher frei gsi, da mir d brugg über 1. mai/uffahrt gmacht händ. womer im zug gsi sind, isch de himmel zwar no bedeckt gsi. wärend minem erschti renne vo de saison 2008 hät denn aber nid nur s neui dress glänzt, sondern au d sunne hät gschunne.

an start bin ich mit em thomas. ich bin devo usgange, dass ich ihm im renne nid nah mag. scho relativ frühe hät s usgseh, als wür das stimme. ich han mich enere gruppe agschlosse, wärend er no wieter füre gfahre isch. schlussendlich aber nur bis an afang vo de gruppe. wärend de ganze erschte rundi han ich ihn gseh, zwar meistens eher vo wietem, aber immerhin. so bin ich recht z'friede gsi mit de gfühlte ziit vo de erschte hälfti. das hät sich denn i de ranglischte au bewahrheitet.

gege de schluss vo de erschte rundi han ich denn eimal es recht es grosses loch zuetue müesse, was aber no guet gange isch, obwohl ich erschti müedigkeiterschienige verspürt han. trotz em windschatte isch es nid so easy gsi i dere gruppe z fahre. si isch riesig gross gsi und nid alles sind technisch und taktisch gueti fahrer gsi, so hät s immer wieder "ghandorgeled". ich han mir überleit, dass ich vielich chönnti probiere innerhalb vo de gruppe füre z fahre, aber es hätti einerseits recht viel zuesätzlichi unruhe id gruppe bracht, anderersiets han ich au nüme so möge.

zu beginn vo de zweite rundi, usserhalb vo sursee inere stiegig han ich denn eifach ugfä. weiss scho gar nüme so genau, wieso. natürlich, wil s härt gsi isch. aber zu dem ziitpunkt bini eigentlich no guet i de gruppe inne gsi...

ich han denn "gwarted". später sind denn zwei anderi skater vo hine cho, dene ich mich aghänkt han, en dritte händ mir ufglade, de eini vo de erschte beide "weggefährte" isch denn uszoge und chli später händ mir en neue vierte ma gfunde. mit dem grüppli isch es recht lang guet gange, bis mir uf de zweite seesiete vonere grosse gruppe igholt worde sind. mit dere händ mir denn aber guet mitmöge, ich uf jede fall. bis gege de schluss vom renne bini jedefalls wieder so fit gsi, dass ich de sprint vo dere gruppe glaub öppe als dritte beendet han. wäge de netto-ziit bini aber sogar de gruppe-sieger gsi, wenigstens das.

susch isch ziit nid so de hammer. au punktemässig isch es eher es weniger guets renne. sogar s schlechtischti vo allne bisherige um de sempachersee. andersch ume, chann ich mir nid so viel vorwürf mache. ich bin wohl eifach opfer vo de sinkende teilnehmerzahle worde. denn zwüsched minere und de vorherige gruppe hät s es grosses loch. wär ich mit dere gruppe is ziel cho, hett ich en neue streckerekord ufgstellt und hätti mit lüt s ziel erreicht, wo susch normalerwies klar schneller sind als ich. andersch ume isch es s schlechtischti renne gsi. dezwüsched hät s nüt gä!