linthmarathon 2008

druf gfreut han ich mich zwar scho lang, dennoch han ich bis gester abig nid gwüsst, ob ich gange: d begleitig hät gfehlt.

de matthias hät sich denn erbarmet und so bini bi wolkeverhangenem himmel deht acho. han s dress azoge und denn s fitnessrenne gluegt. das isch s erschte highlight vom tag gsi: di erschte beide han ich beidi persönlich kennt us ITL trainings! im schlussspurt hät sich de matthias mit me spektakuläre spagat knapp gege de fabian duregsetzt...

de matthias isch denn ziemlich dure gsi aber trotzdem e halbstund später wieder mit mir an start cho. chum isch de schuss gfalle, han ich en natürlich nüme gseh. ich han mich probiert an andi, wo ich vom short track kenne z hefte. da ich wieder emal mit nur marginalem ilaufe gstarted bin, han ich uf de erschte rundi en ultimativ harte kampf gha. de andi isch nach enere halbe rundi wäg gsi und ich han mit de nächste zwei wo vo hine cho sind agfange e neui gruppe bilde. und das mit erfolg, bald scho sind mir z füfte gsi. im wietere velauf vom renne isch es e riese gruppe worde.

ab de zweite rundi sind alli ähnlich verlaufe: im start-ziel-gebiet han ich immer chli müesse kämpfe, bis nach de kurvene und em schlechte belag zwüsched de hüser am tuggener dorfrand. nacher han ich mich uf de zwei lange geradene mit fiinem belag chli erhole chönne. de andere isch es glaub ähnlich gange. jedefalls isch das de gfühlt schnellsti teil vom renne gsi. nacher hät sich d strecki gege de wind dräht. de isch hüt nid z unterschätze gsi! denn de churzi aber steili astieg. natürlich isch de au recht id bei gange, han aber uf de erschte vier rundene problemlos mit de gruppe deht mitghalte.

vo rundi zu rundi isch es mir eifacher vor cho. han nach drü rundene denkt, es wäri schad, wenn s jetzt scho fertig wäri. wägem drohende räge han ich mir no churz überleit fitness z fahre. aber es isch bis z letscht troche bliebe und ich z friede mit minem entscheid.

wo mir uf di letachti rundi iboge sind, hät sich de matthias üs no aghänkt. er hät drü rundene mit de spitze gfahre, bis er sich i di zweit gruppe zrugg falle la hät müesse. mit dere isch er au no e rundi gfahre und isch denn use. churzentschlosse isch er also no mit üs uf di letscht rundi cho.

er hät zersch emal am alonzo und em andi, wo mir mittlerwile wieder igholt händ, "hoi" gseit, isch denn locker näbed mir her gfahre und hät mir sini story verzählt und hät sich denn irgendwo hinder mir igreit.

di letschti rundi isch aber taktisch schlecht glaufe für mich. im letschte teil vo de gegewind strecki bin ich dra gsi mit füerigsarbeit mache. am fuess vo de stiegig het ich die öppe chönne abgä. aber was denn? d füerig abgä und mich z hinderst wieder ireihe? denn hetti e schlechti usgangsposition für de schlussspurt gha. ich han denkt, ich probiere de berg vo de spitze us in agriff z nä, um dobe mich a zweiter, dritter oder vierter stell i z reihe. denn händ es paar am afang vo de stiegig aber scho agriffe, unter andere au de andi, wo ich eigentlich im aug bhalte han welle. ich han dene sofort probiert na z cho, han s aber fasch nüme gschafft. de matthias hät all sini afüürigs künscht und ich mini ganzi liedensfähigkeit brucht, zum obe am berg no mit de vorderste debie z si. han s no in es chlises grüppli gschafft, han aber au wärend de abfahrt und am afang vo de flächi extrem biesse müesse. han aber en guete "vorderma" gha. de hät no es paar überholt und au de andi isch immer nächer cho. wo ich mich wieder halbwegs guet gfühlt han, isch de andi scho fasch igholt gsi. aber es isch z spat gsi, ziellinie isch scho z näch gsi...

de kampf am letschte berg hät sich aber dennoch glohnt: uf die wo deht nid mitmöge händ, händ mir uf em letschte kilometer knapp 20 sekunde usegholt.

wo mir denn frisch dusched us de garderobe cho sind, hät s grad afange rägele. au wettermässig isch es also guet gange. ich glaube, me chann vonere glungene hauptprob für berlin rede!