das jahr isch d seerundfahrt unter em motto
am halbi elfi sind mir los gfahre. mitcho isch de matthias. das isch grad au nomal es novum gsi. er isch de erschti wo zweimal mit chunnt, und es isch au s erschti mal wo mir zwei skater gsi sind.bis uf rappi isch es ganz guet gange. mir händ locker agfange und uf de erschte ein, zwei kilometer no chli gschwätzt. nach üerike hät de matthias gfunde, es seigi wieter bis uf rappi, als me denkt. trotzdem sind mir mit me gfühlt guete tempo unterwägs gsi. d uhr hät das z rappi nid bestätiged, aber au nid dementiert. 42 minute isch e normali ziit für de erschti abschnitt.
bevor mir uf de seedamm cho sind händ mir no en unschlüssige carfahrer halsbrecherisch überholt. wenn er eifach abgfahre wäri, wäred mir schön hinter ihm bliebe. wil er sich das nid getraut hät, händ mir ihn, wohl zu sinem erstune churzerhand überholt.
uf de andere seesiete händ mir üs denn starchem gegewind usgsetzt gseh. schnell isch es au mit em regelmässige wechsle verbie gsi: de mattias hät je länger desto meh gfüert, ab und zu wohl zu lang. ich bin aber froh gsi um sin windschatte, wärend er sich es paar mal so en "richtig grosse roman" vor sich gwünscht hät...
vor horge, uf de holprige, unbelüchtete strass isch es das jahr würklich dunkel gsi. mir händ das für en pinkelstopp benutzt.
z horge händ mir 96 minute uf de uhr gha, was en vorsprung vo 4 minute uf de drü-stund-fahrplan, wohl aber en rückstand uf di beste ziite. so genau weiss ich das vo de vorjahr ehrlich gseit nüme. drum schrieb ich s jetzt uf!
de wind hät nach horge nüme ganz so starch blased. d seeststrass isch deht vo hüser besser gschützt. d bei händ aber glich afange schwerer werde. trotzdem hät s no glanged, zum vor kilchberg en velofahrer z überhole. denn hät üs de schoggiduft vo de lindt&sprüngli z chilchberg wieter ad stadtgränze triebe. das isch mir recht schnell vor cho. defür han ich i de stadt ine ziemlich kämpfe müesse. deht isch es susch amig fasch vonällei gange.
am bellevue denn de ernüchterndi blick uf d uhr: mit 2:18 sind alli träum vo neue rekordziite begrabe gsi! nach me wietere blase-entlärigs-halt händ mir denn no drum kämpft unter drü stund z bliebe. für mich isch das allerdings zwenig areiz gsi zum nomal richtig uf zäh z biesse. uf dem abschnitt händ mir drum sicher nüme s maximum usegholt. immerhin hät s glanged zum unter de drü stund z bliebe.
e knappi stund später sind mir dusched bi üs im wintergarte gstande und händ uf di ander seesiete glueged. es bizeli sind mir denn scho vo üs beidruckt gsi, wo mir die ewig schienendi liecherchetti wo d laterne entlang de seestrass bildet, gseh händ. trotz de chli enttüschende ziit.
s fazit sind näbed schmerzende füess, dass es nid nur e gueti form, sondern au e windstilli nacht brucht, wenn me di jetzige bestziite no verbessere will. di nächschti chance chunnt aber bestimmt!