berlin marathon 2008

es isch es prachts wetter gsi das jahr. d sunne hät bi herbschtliche temperature gschunne, de traum vo jedem skater!

gstarted bini mit em franco, em markus, em roman sim kolleg roman, und em paul. nach em erschte mal zrugg luege nach de Siegessäule han ich aber nur no de paul und de markus gseh.

i de erschte richtige kurve händ sich denn di erschte spzialitäte vom berlin marathon zeigt: all bremsed und händ panik, sobald s nüme grad us gaht. statt dass all hinterenand bliebed. so händ mir i de erschte rechte kurve de markus verlore. ihn hät s in e anderi gruppe "gspüelt" wo en tick schneller gsi isch wie mir. später händ mir en denn wieder i- und überholt.

da s bi mir amig es wili brucht bis min motor warm glaufe isch und s bi dem renne fasch nid möglich isch sich uf z wärme, han ich scho recht frühe müesse chli biesse. bin drum froh gsi, han ich de paul vor mir gha.

ziitewies isch es chli müesam gsi zum fahre. d mengi vo 5000 skater hät nid nur ihres positive. es sind bis zu drü "schlange" näbedenand gfahre. das hät immer wieder für hektik gsorgt. skater wo vo de eine i di ander gwechsled händ und denn ersch i de kurve wo di dütsche nid fahre chönnd... deht händ mir amig uf de innebahn immer wieder platz gfunde zum mit üserer überlegene technik wieder 10 bis 20, oder au meh, z überhole.

irgendnwenn han ich denn s gfühl gha, das renne isch aber scho no lang. han au kein blasse dunscht gha, wo mir öppe sind. kenne d stadt und d strecki nonig so guet und han au überhaupt nid chönne d umgebig aluege. han mich viel zu sehr uf s renne, di andere skater und d strass müesse konzentriere. doch denn isch d zwüscheziit cho und ich han gwüsst, mir sind i de hälfti. vo deht a isch es fasch vonällei gange. viellich isch es ja liecht durab gange. jedefalls isch plötzlich d 30km-marke a üs verbie grauscht. mini uhr hät grad ei stund azeigt, de fahrplan hät perfekt gstumme!

denn isch de Potsdamer Platz cho, km 38, und e riese menschemengi hät üs wieter schwung verleit. ich hans chli ironisch gfunde, dass grad nach de neuste und modernste sehenswürdigkeit vo berlin en abschnitt mit schlechtem strassebelag cho isch. aber vier kilometer vor em ziel seht me über das hinweg.

es paar scharfi kurve und de erschti unmittelbar vor üs stürzendi später isch es vor üs erschiene: s Brandenburger Tor! ich han denkt nüt wie los und bin us de kurve use gsprinted, gisch was häsch. bald han ich müesse merke, dass das en fehler gsi isch. es isch no ewig wiet bis is ziel. di andere ITLer händ mir am abig lachend erklärt, dass es vo deht us nomal en ganze kilometer isch. zudem hät no es liechts gegewindli gweht.

ich han also s tempo nomal müesse verringere. de paul han ich zwar deht abghänkt gha, aber das han ich denn fasch chli bereut. so hät s gar keis duell meh gä uf de zielgerade. übehaupt bin ich nach em Brandenburger Tor chli hin und her grisse gsi: nomal um di letschte sekunde spurte oder di super geili stadion-atmosphäre gnüsse? bevor ich s mir überleit gha han isch s ziel verbie gsi und d medaille um de hals baumeled.