ich weiss, einigi warted no immer uf de bricht vom engadin...
de chunnt aber wohl nüme, zu lang isch es scho her. nur no so viel: es isch mis zweitschlechtischti resultat (bi de glichziitig beste platzierig!?) gsi, wo ich je gha han. formtüf, übermüedig, chrankheit und gegewind sind wohl d killermischig gsi. dass ich nid meh drüber schriebe, liet nid am resultat, sondern a de ziit. han scho denkt, dass es so usechunnt und han drum no im zug uf em heiwäg schriebe welle. d gspräch mit em jan und em markus sind aber zu interessant gsi.jetzt lueg ich aber lieber füre! viellich hät s de fruscht brucht, zum die 500 stutz locker z mache. jedefalls bin ich hüt endlich au uf de hütigi "standard" vo 4 100mm-räder umgstiege. di erschti griefeseerundi hät sich, trotz füechte passage, ganz guet agfühlt. vor allem bi de badi uster, deht hät hät s viel weniger gholpered als früehner. ich hoffe, es git am dunnschtig no e zweiti test-rundi, wil am samschtig isch de erschti "ernschtkampf" planet...
update, 17. juli 2009 00:17
nach 10 tag chann ich säge, dass ich de chauf vo frame und rädli nid bereut han. mit ihne isch nid nur d motiviation, sondern au d freud am skate exponentiell gstiege. dezue here s ego und d leistigsbereitschaft. so het ich nie denkt, dass die räder nach nur 10 tag i minem bsitz bereits 200km (= 636'620 umdrehige!) abgspueled händ. zudem sind d streckene immer länger worde:
tag 1, zieschtig, 7. juli, 20km: 1x griefesee.
tag 3, dunnschtig, 9. juli, 45km: 2x griefesee + wäg zum bahnhof stettbach.
tag 5, samschtig, 11. juli, 37.3km: 1x sic zugersee. di erste 100 sind gschafft!
tag 8, zieschtig, 14. juli, 45km: 1x usfahrt vo chloote bis uf waiach und zrugg.
tag 10, dunnschtig, 16. juli, 55km: 1x griefesee mit zuesatzschlaufe über egg, mönchaltdorf, gossau, wetzike, uster. und das wäred die zweite 100 gsi...