mit em neue schuhe und neuer motivation und hoffnig isch es hüt uf zug gange.
s einzige wo d luune chli trüebt hät, isch tatsach, dass mir im training am dunnschtig wohl chli über d sträng gschlage händ. ohni s schwümme am fritig mittag het ich am samschtig wohl nüme chönne d stäge abelaufe. aber so hani mi vor em start ganz guet gfühlt.bi herrlichem summer-abig-wetter isch es denn uf d strecki gange. vo afang a han ich mich an markus ghalte. ich bin eifach hinter ihm bliebe, egal was passiert isch und so guet s gange isch. nach dem sich s feld chli ufteilt hät, sind mir inere riese gruppe gsi. aber ziemlich wiet hine. de nachteil vo dene grosse gruppe isch immer di enormi unruhe. es handorgeled extrem. uf zwüschespurts folgt unweigerlich s uffahre uf de vorderma. immer wieder han ich löcher müesse zuefahre und das bi gfühlt starchem (fahrt?)wind. irgendwo nach arth isch wieder so e situation gsi. ich han si cho gseh aber kei luscht und energie me gha, zu me wietere zwüschespurt. da händ jetzt wohl d cyclings gfehlt. wo ni no regelmässig gsi bin, sind die stop-and-go-renne keis problem gsi für mich.
ich han denn recht lang uf e wieteri gruppe müesse warte. d fitness-breitesport-spitze hät mi deht glaub überholt. denn isch wieder e gruppe mit blaue t-shirts cho und ich bin mit. deht isch es denn recht guet gange. die händ es schön konstants tempo gha. je länger ich debi gsi bin je meh han ich mich erholt und wieder afange guet fühle.
bi immesee händs d strecki gegenüber de letschte jahre verändered. si isch jetzt wieder, wie ganz am afang, über en schmale, holprige feldweg gange. deht isch es churz heftig durue gange. es hät aber scho glanged zum die gruppe z sprenge. deht han ich aber guet mit de vorderste vo de gruppe mithebe möge. i de aschlüssende churze s-förmige abfahrt wo me bremse muen, bin i chli vorsichtiger gsi als di andere. drum isch denn nomal en zwüschespurt nötig gsi zum s wieder ihole. de isch aber au keis problem gsi. und vo deht a han ich bis is ziel ununterbroche en schöne windschatte gha.
es malheure isch mir aber no am getränkeposte passiert. die wasserfläschene wo s das jahr abgänd (und ich dringend nötig gha han) sind normali pet-fläschene mit drehverschluss. ich han denkt, ich seigi schlau und fülli si i mini nuggi-fläsche (wie au immer me die richtig nennt) um. ich han im fahre beidi fläschene göffnet, d deckel i de täsche vom dress versorged und s wasser umgleert, d pet-fläsche furt grüert und de deckel vo de velo-fläsche us de dress täsche usegfingerled. ich hetti de deckel nur no müesse druf schrube und s kunststück wäri fertig gsi. doch schwups, und de deckel hät sich verabschiedet...
s wasser hani denn meh oder weniger alles uf eimal drunke. es hät aber nid gschadet. han jedefalls s gueti tempo wo mir denn bis is ziel druf gha händ gnüsse chönne. deht han ich denn aber nid gwüsst, ob ich mich eher über s nid halte vo de pace vom markus ärgere, oder mich am schöne wetter, de unfallfreie und uf de zweite hälfti agnehm schnelle fahrt hett sölle freue. de blick id ranglischte hät denn s halbvolli glas über s halbleeri gwünne la: dank de chürzere strecki hät s e persönlichi bestziit gä. ;-) aber au di neutralere wert wie km/h und pünkt sind ganz ordentlich usgfalle: zweit- bzw. drittbests resultat vo mittlerwile acht teilnahme a dem renne.