SIC Biel

zwar mit enere super form und de immer no adurende euphorie vo de seerundfahrt, aber eigentlich eher zu trainingszwecke bin ich uf biel greist.

de matthias und sini muetter händ mich mit em auto mit gno. das hät mich mega gfreut, so han ich endlich mal wieder mit ihm länger plaudere chönne.

z biel isch es zwar wolkeverhange, aber troche gsi. da s nid all zu heiss gsi isch, sind s eigentlich super bedingige gsi. s teilnehmerfeld hät mich allerdings bedänklich chli dunkt. so bini recht wiet vorne und trotzdem au hine gstarted. isch komisch gsi. han gar nid gwüsst, wie und wo ich mich iordne söll. und denn isch es au scho los gange. wie immer sind alli ab wie vo de tarantle gstoche. ich bruche ja immer chli, bis ich uf toure chumme. dennoch han ich s aber in e recht gueti gruppe ine gschafft. scho gege s endi vo de erschte gegewind-strecki hät die en guete rythmus gha. im windschatte vo de andere han ich denn bald mit möge. naja, ich han scho gspürtm dass s tempo horrend isch, aber dennoch, es isch recht guet gange. s besti dra isch gsi, dass die wo für s tempo gsorged händ immer wieder vor mir igstiege sind. nid direkt vor mir. deht isch no eine mit enere world-inline-center-hose gsi. aber vor dem sind s igstiege. vier oder füf sind s gsi.

wo zu beginn vo de dritte rundi denn de vor mir usstiege und sich zrugg falle lah hät müesse, isch es denn au für mich schwerer worde. em tempo händ nämlich no anderi tribut zollt. vor mir hät s immer weniger lüt gha. und die wo d füerigsarbeit gmacht händ, sind je länger je meh au wieter hindere und nüme vor mir igstiege. afangs vierti rundi bin ich denn zweitvorderst gsi und ich han recht mühe gha zum mitcho. de gedanke dra, bald z vorderscht z sie isch gnueg belastend gsi zum us de gruppe usstiege. mentali schwächi nennt me sowas. und das bim aktuelle selbstvertraue!?

chum sind di andere weg gsi, han ich mich au scho drüber gärgered ufgäh z ha. doch scho bald isch di nächsti grösseri gruppe cho. deht isch au de mit de inline-center-hose wieder gsi. ich bin hine ad gruppe ane und han afangs mühelos chönne folge. überhaupt han ich deht sälte müesse uf zäh bisse. wil s liecht ghanorgeled hät und ich uf kein fall han welle abghänkt werde bin ich denn mal chli füre gfahre. bis z vorderst bin ich aber bis fasch am schluss nid cho.

uf de letschte rundi, scho ziemlich frühe, isch denn d hektik usbroche. uf de "gegegerade" hät die denn de höhepunkt erreicht: de vorderscht isch links wäg, und de zweiti hine dra bliebe. de dritt und viert sind denn rechts gfahre. offesichtlich händ sie sich um d füherig gstritte, als ob s bi üs no um en glorrieche sieg gange wär!? ich han mich fürchterlich ufgregt. bin denn aber blitzschnell zwüsched de striithän dure und han e schöni, chlini lugge gmacht. i de angscht, ich chönnti abhaue, händ si sich denn wieder zämegrauft und churz druf abe han ich di ganzi gruppe wieder hinter mir gha. nach dem ich denn es wili gfühert han, isch es au keis problem meh gsi, d führeig am nächste z übergä. leider bin ich denn aber e chli wiet hine wieder igstiege. eigentlich han ich ab dem ziitpunkt unbedingt welle d gruppe "günne". nach em motto, "wenn ihr da so wichtig tüend, vermies ich das eu mal mächtig". es hät denn nid ganz glanged zum alli z schla. aber es sind sicher einigi meh hinter mir gsi als vor mir.

im ziel bini denn nid ganz z friede gsi. das isch denn erscht di hei cho, wo ich mini ziit in relation zu de vorherige bieler renne gseh han: fasch 8 minute schneller als 2003. gar 10 minute als 2005!

da sich d sunne erscht nach em renne richtig afange hät zeige, han ich no luscht uf meh übercho. so bin ich mit de elite nomal gstarted. s ziel isch eigentlich gsi, mit em jan und em roman no ei rundi z absolviere. das isch aber gründlich misslunge! bi nur öppe anderthalb kilometer wiet cho. si sind eifach z schnell und ich no z'wenig erholt gsi vo mim renne.

das ganzi hät mich aber nid devo abghalte es bizeli später mich nomal uf de kurs z schlieche. han au bald es einsams opfer vom rasende tempo i dere kategorie gfunde. hinter ihm han ich denn gfühlt gmüetlich no chli skate chönne. bald händ mir no zwei wieteri einsami seele ufgläse, wobie di einti devo ziemlich am aschlag gsi isch. so bin ich denn nomal ganzi zwei rundene mehrheitlich i dene ihrem windschatte mitgrollt. denn hett ich langsam gnueg gha. aber si händ mir zusehr leid tue, als dass ich s no ällei uf di letschti rundi schicke hetti chönne. so bin ich halt uf die au no mit. und dademit noni gnueg. über en grosse teil vo dere han ich denn no für sie s tempo gmacht...

s luschtige am ganze: selbst die ziit wo die drü herre gha händ, überigens di letschte wo vo de speed-team-kategorie no is ziel cho sind, hätti mir no glanged, für e neui biel-best-ziit! au wenn nur um es paar sekunde. z biel han ich vorher definitiv kei gueti resultat abgliefered.