one-eleven

nach füf verpasste one-elevens han ich das jahr wieder emal d useforderig agno. vor sechs wuche no unvorstellbar, jetzt aber ei erfolgsstory.

di lange trainings a de vergangene sünntig mit em jan händ s selbstvertraue und di nötigi grunduusdur bracht. am letschte mögliche tag han ich mich denn agmäldet. mit em vorbehalt, bi räge no immer uf de start verzichte z chönne.

en startverzicht isch denn aber zu keinere ziit me zur diskussion gstande. wo d öv-fraktion vom ITL (jan, markus, thomas, ich) am samschtig abig in st. galle acho isch, hät si bestes summer-wetter atroffe. zäme mit em erwin und em später dezuestossende christian händ mir s üs im garte vo me italiener i de st. galler altstadt guet ga la.

mit übervollem pizza-buch sind mir uf di 10i i di horizontali, zunere ziit, wo bi mir normlerwies de abig erscht afangt. s nachtlager i dere turnhalle hät mich chli an e besseri militärunterkunft erinnered. han lang nid chönne ischlafe und bin bereits am halbi füfi vo irgend me andere wecker gweckt worde. trotz em wenige schlaf han ich a de unterkunft nur d temperatur z bemängle gha: im schlafsack isch es z heiss gsi und ohni z chüel...

am 5i bin ich denn ufgstande und direkt is ITL-dress gschlüpft. no chli schlaftrunke han ich mich am z'morge-buffet bedient: komischi, supergsundi cornflakes, zwei schiebe brot, es gipfeli, butter, confi, milch und ovi-pulver. mit ovi chann me s bekanntlich ja nid besser, aber länger. und für eimal isch es um s "lang chönne" gange...

bis ich mich dur di langi wc-schlange kämpft und d füess taped han (das ding hät eifach nid richtig welle deht hebe, wo ich welle han), bini scho chli knapp dra gsi. für es paar meter skate, en wietere wc-bsuech und zweimaligs schuhe binde hät s aber no glanged. trotzdem sind d schuhe irgendwie nid bequem gsi. aber s wüsse, au das stammt vo de lange usfahrte, dass sich d füess scho dra gwöhne werded, hät mich denn am 7i trotzdem einigermasse ruhig starte la.

am vorabig händ mir eigentlich no e drüerallianz mit em thomas und em paul gschmiedet. mir händ di 114,5 kilometer welle zäme bestriete. alli drü händ als di erwarteti ziit 4:30 agäh. ich han insgeheim uf 4:15 ghofft. am start han ich denn aber nur de thomas gseh. mit dem bin ich denn au los gfahre. wenn s mir am start ziitewies chli z schnell gange isch, han ich bedenke amig mit em gedanke "de thomas weiss was er macht, er hät scho vieli one-elevens bestritte" weggschobe.

uf de grosse brugg händ mir de paul doch no troffe. er hät aber nid i üsi gruppe wechsle welle, so händ mir en überholt. wo mir denn us de stadt dusse gsi sind, händ mir e recht ordentlichi gruppe zäme gha mit me agnehme tempo. es isch au eine debi gsi, wo in biel scho i minere gruppe gsi isch. das hät zuesätzlichi sicherheit gä, dass de fahrplan stimmt.

nach de erschte schöne ussichte bi de morgesunne isch di gfürchteti abfahrt cho. de thomas und ich sind si chli vorsichtiger agange und händ am afang de teppich gno. allerdings händ mir defür d gruppe verlore. mit de neue gruppe wo sich bildet hät, händ mir nid welle fahre. mir sind drum usgrisse und es wili s zweite gfahre. später händ üs di andere wieder igholt und mir sind doch mit dene gfahre. si sind jetzt aber au konstanter und weniger nervös gsi. binere wietere stiegig hät de thomas en unglaubliche zwüschespurt ane gleit. ich han ihm nur knapp folge chönne. warum genau verstahn ich immer noni, nacher händ mir nämlich es rechts wieli ällei fahre müesse. aber au deht hät üs e gruppe igholt und mir sind bald druf abe wieder a dere ihrere spitze gsi und händ mitgholfe ihres tempo hoch z halte. so sind mir denn langsam em wendepunkt entgegegfahre. d frauespitze und chli später de christian sind üs deht entgege cho und denn sind au mir wieder uf em rückweg gsi.

deht isch denn de grossi shock cho: da jan, langsam rollend am strasserand. bim verbie fahre hät es öppis vonere zerrig gseit. de thomas hät gmeint "de holt üs denn scho wieder". ganz unrecht hät er nid gha: de jan isch vor üs im ziel gsi, aber mit de sanität.

mir händ denn d abfahrte gnüsse chönne und sind als grossi gruppe a de punkt cho, wo viel erfahreni gstöhnt händ: "s liede fanget a". es hät e steili stiegig uf üs gwarted. deht händ mir grad e anderi gruppe chönne überhole. eini, wo en zuger-gspänli vom paul drinne gsi isch. er hät s chum chönne fasse, dass mir ihn überholt händ. verdutzt hät er gfröged "vo wo chömmed denn ihr?". ich han denn denkt, ich sägi lieber nüt, abgrechnet wird denn am schluss. di szene hät aber energie für meh als nur grad di aktuelli stiegig gä.

di stetige aber sälte steile stiegige han ich aber je länger desto besser gmeistered. s einzige problem wo ich gha han, isch d ungwüssheit gsi, wo mir denn sind. di letschti kilometer-agab woni gseh han isch d 80er-tafle gsi. ich han denn es paar mal denkt, wenn jetzt denn erscht d 90km-marke chunnt, denn isch d motivation am endi. ich han denkt, mir händ öppe 100km. tatsächlich isch denn irgendwenn d "noch 10km"-tafle cho. wie ich s streckeprofil in erinnerig gha han sind di letschte 5km eher flach gsi. also no 5km und denn nur no "usrolle"...

viellich isch genau de gedanke falsch gsi. d 5km-tafle isch jedefalls bald und relativ mühelos erreicht gsi. aber denn hät s liede würklich agfange. bereits wieder in st. galle, de langi abschnitt de befahrene strass entlang hät mich ziemlich viel nerve kosted. d sunne hät erbarmigslos abebrennt. trinke isch bim durue fahre unmöglich. d füess händ gschmerzt, de rugge au. d bei sind schwer worde und de mage hät sich überleit d farmer wieder zrugg z gä statt z verdaue... ich han chli gflueched und mich immer wieder, liesliger und lüter, gfräged: wie wiit isch es no?denn, endlich d abbügig in e flachi, schattigi quartierstrass. nomal e chli schnell fahre und fahrtwind gnüsse. denn isch d 1km tafle cho. mir sind um kurve und händ nomal e stiegig vor üs gha. i dem moment tut sich e lugge vor mir zum thomas uf. si isch schnell uf öppe 2 meter agwachse. das isch denn z viel gsi. ich han doch no ufgä. d gruppe hät mich überholt und ich han mich ällei de berg ue kämpft. wo ich fasch z'oberst bin ghör ich d chilleuhr schlah. isch tatsächlich erscht 11i? denn bini dobe gsi, han a de bushaltistell uf d uhr gseh: 11i! de speaker vom zielgländ han ich au scho ghört. schnell no di letschte paar flache meter und liecht durab, dur s ziel. isch das würklich nomal en ganze kilometer gsi? im zeil han ich no ghört, wie de speaker min name, wie bi allne wo s ziel erreiched, abeliest und unmittelbar nacher seit, dass d uhr jetzt 4 stund und 2 minute azeigt. ich han s chum chönne fasse!

4:01.55! fascht e halbstund schneller als s minimalziel. e knappi viertelstund schneller als di insgeheim erhoffti ziit. und nur 4 minute langsamer als de christian, wo a normale sic-renne uf em niveau vom jan und em roman isch und mir deht uf e chürzeri wettkampfziit meh absoluti ziit abnäh chann.

rundum glücklich han denn s rivella im ziel gnosse und bin zwei stund später mit de andere wieder uf de zug, während die letschte abkämpft no is ziel grollt sind.