di erschte paper sessions und party
bin wieder frühe uf gstande, so han ich vor em start vo de paper-sessions no en notitzblock poste chönne. übermässig brucht han ich en zwar nid, aber das isch ja nüt neus...di erschti session hät "computational photography" gheisse. s erschti paper hät sich um d "frankencamera" ghanled. es framework zum digitalkameras z programmiere. wieter isch es gange mit enere kamera wo um accelerometer und gyroscops erwietered worde isch. so hät d kamerabewegig wärend em fötele gmässe und di optimale deblurring-parameter abgschätzt werde chönne. di folgende beide talks (eine devo nomal um deblurring, eine über coded aperture für projektore) han ich denn nüme richtig mitübercho...
denn isch e keynote dra cho. de redner (don marinelli) hät es rechts spektakel bote, aber isch au inhaltlich recht guet gsi, han ich gfunde.
aschlüssend han ich zuefällig de matthias troffe, wo mit enere grössere gruppe uf em weg go ässe gsi isch. mich händ s grad au no mitgno is espn-restaurant, grad vis-à-vis vo üsem hotel. s ässe hät chli lang dured, so händ mir d hälfti vo de erschte nomittags-session verpasst. isch sowieso nid so us minem bereich gsi.
di zweiti session wo ich gwählt han, (faces & capture) isch defür sehr interessant gsi. es isch um s ufnäh und wiedergä vo gsichter und persone gange. sehr cooli sache und au gueti präsentatione, jedefalls bi drüne vo vier.
z'nacht hät's denn mit paar bekanntschafte vom mittag gä, die sind alli vo de ETH und em disney-lab. aschlüssend sind mir no an e party gange. isch nid so de bringer gsi. aber was erwartet me au, wenn me en huufe informatiker in en ruum sperrt, wo ziitewies s bier ufgaht und luuti aber schlechti mussig hämmered?