2 täg, 2 sightseeing toure, 2 brugge, 43 hüggel und unzähligi windböe.
nach dem mir zersch emal usgibig im hotel gfrühestückt händ, händ mir scho wieder müesse packe: mir händ üses schöni zimmer im 30. stock mit ussicht über di halbi stadt müesse gege eis im vierte stock itusche. s anderi händ mir nur übercho, wil üsi zimmerkategorie bi eusere akunft überbueched gsi isch.de nomittag händ mir denn mit enere sightseeing tour verbracht. de tourbus hät üs dur di halbi stadt a fasch allne sehenswürdigkeite verbie bracht. vier mal händ mir aghalte und usstiege chönne. uf twin peaks händ mir chli wetterpech gha. grad wo mir deht acho sind, isch de nebel wieder ufzoge und me hät nur halb so viel gseh. de buschauffeur hät aber gmeint, es chönni no viel schlechter, aber ebe au besser si. d überquerig vo de golden gate bridge hät sicher s highlight dargstellt. weniger highlight sind defür di eher chüelere temperature, wo vorallem vom wind verursacht werded und s abigässe, höchscht durchschnittlich und super-amerikanisch, gsi.
au de zweiti tag hät mit me usgiebige frühestück im hotel agfange. s einzigi was am buffet gfehlt hät, isch brot. wie chann me nur ohni brot z'morge ässe? muffins und ähnliches als ersatz? keis wunder platzed d amis us allne nähte.
eigentlich hetted mir denn mit de berühmte cablecars welle wieder ad fisherman's wharf fahre welle. nach dem eis cho wo übervoll gsi isch, sind mir z fuess ad entstation gange, i de hoffnig deht eher istiege z chönne. denkste: e super langi schlange. di vorderste händ uskunft gä: sit zwei stund seiged s am astah! und das für e tram-fahrt, wo mie z fuess hetti chönne i höchstens de halbi ziit de weg zrugg lege. de programpunkt isch sofort gstriche gsi!
mir händ üs denn i mene riesige ichaufszentrum verirrt... mit schal für mich, kosmetik für d olivia und wasser für d allgemeinheit sind mir denn irgendwenn wieder vor em igang gstande. da das recht viel ziit brucht hät, händ mir es taxi an hafe gno. deht händ mir e bootsfahrt dur d bucht gmacht. nach dem mir scho über d golden gate bridge drüber sind, isch es jetzt no une dure gange. und alcatraz händ mir au us nächschter näch gsi. uf "the rock" sälber, händ mir nid chönne. die toure sind bis am 10 august usbueched gsi. denn sind mir längstens in new york.
z fuess isch es denn dur china town gange, was sind name würklich verdient hät. am andere endi sind mir direkt is bussiness-viertel cho, i dem mir de yerba buena garden bsuecht und gnosse händ. nach em z'nacht deht sind mir no am moscone west verbi zrugg uf in richtig hotel. uf em weg sind mir no am san francisco apple store verbi cho. er hät (zum glück?) scho zue gha, aber de blick dur d glasfenster hät üs d grössi abschätze la. mir sind nid sicher gsi, ob de z züri grösser isch oder nid. aber ich glaube, de da isch grösser.
nach dem mir no de union square beguetachted händ, isch es zrugg is hotel gange. schliesslich händ mir scho wieder packe müesse, de nächschti tag vorbereite, fotene aluege und au die zeile händ de weg id öffentlichkeit no gfunde.