SIC Bodensee

usflug i d kategorie "Team".

s renne in chrüzlinge isch eigentlich nid i minem kalender gsi. nach dem de roman aber sin verzicht wäge ferie bekannt gä und mir sini startnummere abote hät, hät sich mini meinig afange ändere...

so bin ich denn als roman schumacher am 14:45 i de kategorie "Speed Team" uf de startlinie gstande. ziemlich agspannt, wil ungwüss, was uf mich zue chunnt. es isch denn aber nid ganz eso schnell los gange, wie ich denkt han. am afang isch es e chli durue gange und ich han de jan no immer vor mir gha. nur zwei basilisker sind no dezwüsched gsi. de einti vo beidne hät denn abriesse la ich bin hinter ihm bliebe. das isch wohl kei schlechti entscheidig gsi, au wenn mir s renne deht no relativ langsam vorcho isch.

es hät sich denn e gueti vieregruppe bildet, mit dem basler, einem vo "brasil varanus" und einem mit me schwarze dress ohni team-beschriftig. zu beginn vo de zweite rundi hät de basilisk-skater i de ufstiegig mühe übercho zum mit hebe. zudem hät üs deht d frauespitze igholt. das hät zu chli konfusion gfüert und s tempo isch völlig zäme broche. de basler hät defür nomal ufschlüsse chönne. so sind mir denn z vierte uf di langi gerade cho und händ vor üs zwei einsami skater gseh. wenig später händ mir die igholt gha. s eini isch de kurt vo de zuger gsi, mit dem ich am one-eleven ja scho e chli es speziells rendez-vous gha han, s anderi isch e frau gsi. ich han denkt "super jetzt werded mir schneller, wil mir üs bim windschttefahre me abwechsle chönnd". d freud isch ebr vo churzer dur gsi. de basler hät denn irgendwenn ufgä und au d frau isch bald nüme ume gsi. so sind mir denn halt wieder z vierte gsi, wo s uf di dritti rundi gange isch. immerhin händ mir recht guet harmoniert und einigermasse regelmässig gwechslet. vo deht a isch s renne nacher recht cool gsi. ich han alles i allem guet mit möge, bin aber au nid unterfordered gsi.

uf de lange gerade händ mir amig die vor üs entgege cho gseh. das isch im wesentliche ei grossi gruppe gsi mit em jan drinne. de abstand zu dere gruppe isch aber vo rundi zu rundi grösser worde. schlussendlich händ mir genau siebe minute verlore. so bin ich denn doch froh gsi han ich vo afang a de "hinder basler" gwählt gha. siebe minute schneller wäri sicher nid drinne gläge. eini wohl scho, viellich au no zwei, aber definitiv nid siebe!

s einzigi wo a dem renne nid guet gsi isch, isch de schlusspurt gsi. zersch quasi en taktische fehler: ich han uf em letschte teil vo reguläre rundi no füere müesse. denn han ich i de abfahrt und em s unter de unterfüerig dure nid so d optimallinie verwütscht. han wohl scho zu sehr suuri bei gha zum gnueg tüf abe z ga. und denn isch es natürlich schwierig us dere position use en agriff z kontere. so isch de kurt und de im schwarze dress denn wäg cho. ich han s zwar no probiert, aber ich han s nüme hole chönne. de misslungeni konterversuech hät no s letschte restli energie kosted. so hät mich am schluss au no de varanus-typ überholt, obwohl ich wärend em ganze renne s gfühl gha han, er isch am meiste am limit vo üs allne.

so han ich s wettkampfglück z letscht nüm uf minere siete gha. es hät aber de allgemein glungeni tag nüme trüebe möge.