berlin marathon 2011

s erlebnis "berlin marathon" hät am fritig morge, 5:15 agfange. 5:44 isch de bus gfahre, am 9i sind mir z berlin gandet.

de weg id stadt ine ischzir geduldsprob worde, es hät chaos pur gherrscht. anschienend wil diversi strasse gsperrt gsi sind, damit de papst au ja sicher an flughafe chunnt... nach dem d wohnig am alexanderplatz bezoge gsi isch und mir üsi wg-gspänli troffe händ, sind mir ad mess go üsi startnummere abhole und zum teil nö mit material (rädli und schruube) idecke. zudem hät mir deht no di andere ITLer troffe, zwei zuger und überhaupt, gfühlt di halbi inline-schwiiz. zum z'nacht sind denn alli ITLer zäme zum italiener.

de samschtig isch ganz im zeiche vom renne gstande. noch me chline z'morge isch es denn scho bald wieder zum italiener gange. pasta händ d cholehydrat-speicher gfüllt. es isch e rieseportion gsi. bis am start isch si aber guet verdaut gsi.

nach em ässe händ mir üs grad für s renne parat gmacht. denn sind mir zum startgländ skatet. deht hät's diversi fotene gä, mit de ITLer und de thunliners. denn isch ifahre rund um d siegessüüle agseit gsi.

zum erschte mal bin i im startblock B gstartet. chli mit gmischte gfühl, vor allem zwiefel, dass ich deht ane ghöre. denn isch es los gange, und wie so oft, chum ich am start nid guet weg. de jan, de roman und de markus sind zwar unmittelbar vor mir gstande, aber scho nach 100 meter sind mir nüme zäme gsi. s tempo isch für mich recht hoch gsi, so han ich nid würklich handligsspielruum gha zum ufhole oder mini position z ändere. de roman isch chli hinter mir gsi, au uf ihn "warte" hät nüt gnützt. chum verbie, au scho wieder weg. nüt mit windschatte.

so han i mi denn nach viellich füf kilometer entschiede, sie ga z la und mis eigene renne z fahre. ich han denn mich zrugg falle la und bin in e anderi gruppe wieder igstiege. die isch mir zersch chli z langsam gsi und ich han mich erhole chönne. mit de ziit isch es aber schneller worde. wie's dezue cho isch, isch schwierig z säge ständig chömmed schnelleri vo hine oder langsameri werded ufgholt. gruppe wachsed, schrumpfed, misched und teiled sich. immerhin, nach dem uf de erschte füf, zeh kilometer i meh oder weniger regelmässige abständ lüt umgheit sind, hät s renne diesbezüglich extrem gruhiget.

um d hälfti ume isch e gruppe näbed üs uftaucht, wo en art en guide gha hät. de hät gseit, er fahri genau 1:20. das wäri für mich guet gsi. ich han drum immer chli uf ihn glueged. leider han ich s aber nie richtig gschafft, i sini gruppe i z stiege. scho gar nid gnueg wiet vorne. irgendwenn müend mir die gruppe wohl verlore ha. wenn und wie s gange isch, weiss i nid.

um 30km isch denn s alljährliche high light cho. es gaht ganz liecht abwärts uf superfiinem belag. deht isch s tempo jedes mal horrend und trotzdem chann me sich erhole! unmittelbar nachher isch e gruppe us em C-block a üs verbie. eine hät mir grüeft, grad no rechtziitig zum d gruppe wechsle z chönne. bi nächster glägeheit bin i denn zu ihm füre gfahre. näbed ihm, en thunliner, hät's no e basiliskerin i de gruppe gha. churz druf abe hät denn d schlusshecktik agfange. sogar no chli vor em potsdamer platz. interessanterwies hät sich die aber nomal e chli beruhigt.

denn isch d linkskurve cho, wo de "wendi" bedütet hät. und nomal links und deht isch es passiert: es isch minim abwärts gange es hät e lugge vo ca zwei, drüm meter gä, ich han denkt "nei, nid no so churz vor em ziel abhänke la, aber es isch z spat gsi. im chopf han i scho ufgä gha und d gruppe isch weg gsi. ich han mi bis is ziel drüber gärgered, was schad gsi isch. es hät so chli s eigentlich ganz ordentliche resultat überschattet. mit 1:22.06 han i mini bisherigi bestziit um e gueti minute unterbote, und das mit de aktuell eher mässige form. de "hänger" am schluss hät mi näbed em guete gfühl no 30 sekunde kostet. defür han i di sagehafti kulisse uf de zielgerade so z'säge für mich ällei gha.

über s renne händ mir denn wie jede's jahr im 12 apostel bi überdimensionierte pizzene diskutiert. s glungeni wuchenendi händ mir denn uf em heiwäg trotz volle büch no mit me hägen-dasz-glacé usklinge la. min rückflug isch am sunntig vor em mittag gsi. wo'n ich d wohnig am viertel vor 9i verla han, isch d hälfti vo eusere temporär-wg no schlafe gsi...