sydney

am schluss vo de reis sind mir wieder am afang gsi: in sydney. das mal aber nur no zu ferie zwecke und ohni jetlag.

dennoch sind mir chli müed gsi nach de akunft, d nacht isch churz gsi und de business-class-flug zu sehr ufregend, um en z verschlafe. so sind mir ganz glücklich gsi, isch üses zimmer i de sydney city lodge scho parat gsi. au recht chli, aber e chli grösser als das im metro hotel am afang. und nüme ganz so im stadtzentrum. aber da mir jetzt ja d weg e chli kennt händ, isch das scho fasch eher en vorteil gsi.

nach dem mir üs startklar gmacht händ, sind mir zersch dur de hyde park und denn de botanische garte gschlendered. vo dem sinem endi us hät me en einmalige blick uf's operehuus und d harbour bridge. zum fötele isch d sunne aber falsch gsi: gegeliecht. dennoch sind mir deht vonere film-crew agsproche worde, wo en (interne) werbefilm dräht hät. mir händ ja ziit gha und drum üs es t-shirt vo ihne gä lah und sind dur ihren "shot" glaufe. sie händ üs au es dankeschön versproche, aber ob das jemals bis id schwiiz chunnt, wird sich no zeige.

mir sind denn wieter uf "the rocks", di eigentlichi altstadt vo sydney. deht isch am wuchenendi märt. de märtstand wo mir gsuecht händ, isch aber nüm deht gsi, pösteled händ mir aber dennoch. und wil denn bi ibruch vo de dunkelheit en sturm ufzoge isch, händ mir üs in es kaffi verzoge. nach dem mir üs chli gstärkt händ, sind mir dur de wind bis is ian thorpe hallebad glaufe und einigermasse verfroore acho. s wasser isch aber warm gsi. au deht hät's höchstens zwei persone pro 50m-bahn gha. das land isch de traum vo jedem schwümmer. und s hallebad mit sinem geschwungene dach isch au für anderi en blick wert.

uf em rückweg sind mir dur de darling harbour cho, wo's für mich es subway-sandwich gä hät (di einzigi konsumation inere internationale chetti i de ganze drü wuche) und, als ob mir's planed hetted, wieder s fürwerk. i grosse schritte isch es denn zrug id lodge gange, z'nacht isch es würklich chalt, im australische winter.

für de sunntig morge isch e operehuus-tour agseit gsi. di erschti, am 9i, mit earlybird-rabatt. naja, uf de eine siete isch das e gueti sach gsi, wil mir so i relativ churzer ziit i ziemlich all interessante rüüm inecho sind. vom informatiomsghalt her isch es aber eher mässig gsi. die frau wo d füherig gmacht hät, hät nid viel me z verzähle gwüsst, wie's wohl i jedem operehuus uf dere welt z verzähle gäb. di interessantischte informatione sind i de beide videos gsi, wo si zeiged hät. so zB, dass es statt drü, 14 jahr duured hät, sie z baue und statt siebe hät's über 100 millione dollar kostet. das kenned mir ja vo andere projekt au (operehuus hamburg lässt grüssen, neat ebefalls). interessant isch no gsi, dass de dänischi architekt zum tüfel gjagt worde isch, bevor de bau fertig gsi isch, und er nie meh uf australie zrugg cho isch, also sis werk nie vollendet gseh hät. aber wahrschienlich wäri au das uf wikipedia gstande. e opere oder es ballet isch i dere ziit wo mir in sydney gsi sind, aber nid glaufe wo üs zuegseit hetti, zum s opera house in action erlebe z chönne.

mir sind denn mit de fähre übere uf manly go em brunch näh. de restaurant tipp isch aber bloss medium gsi, was mich eimal meh a so restaurant-bewertigs-websites (urbanspoon i dem fall) zwiefle lah hät. de ässensgschmack isch eifach zu sehr individuell, als das me sich uf sotigi guides verlah chann. mir händ denn en spatziergang entlang de promenade vom manly beach gmacht. es isch e ziemlich frischi biese gange und mir sind i jagge verpackt gsi, während paar unverwegeni surf-lektione (wohl für afänger) gno händ. mir händ no zueglueged, und üs mit ihne gfreut, wenn's emal e welle verwürscht und uf em brett stah chönne händ. so lang, bis mir zu sehr chalt gha händ, und in es kaffi gange sind go brownie-pizza und frozen yoghurt mampfe. bevor's zrugg gange isch, hät's für de herr no zwei "land and water shorts" gä. genau s richtige, wil er nid gwüsst hät, ob sin chleiderschrank eher shorts oder badhose nötig hät...

zrugg in sydney sind mir no i de "o bar and dining", im 47. stock vo me hochhuus am hafe gsi. wo mir deht am Fenster platz gno händ, han i zersch denkt, ich seigi scho betrunke, bevor ich was bstellt han. denn han i aber gmerkt, dass sich s restaurant drähet. i einere stund eimal rund ume. d ussicht uf s liechtermeer isch herrlich gsi, d drinks fein und d rechnig gsalze. aber sowas gönnt me sich ja nid jede tag.

de letschti ganzi tag händ mir nomal mit me sight seeing run gstartet. meh denn je zuvor hät de begriff zuetroffe. mir händ diversi knips-stopp igleit. de erschti nomal am ussichtspunkt nach em botanische garte, zum bi jetzt richtigem liecht no e foti z mache, wo sowohl operehuus als au harbor bridge druf sind. zum die in chaste z kriege, händ mir aber en car voll asiate abwarte müesse. wieter isch euse run um's operehuus ume gange (endlich mal no d sicht vo vorne), dur the rocks uf d harbour bridge ufe (die stäge sind asträngend gsi!) und über di ganzi brugg ine, mit chline ussichts-pause. aber immer nur churz, für de wind deht obe sind laufchleider denn doch chli wenig gsi. uf de andere siete händ mir üs überleit, ob mir grad wieder zrugg sölled oder nid. zum glück sind mir nid! grad unter de brugg hät's no en chline park, vo dem us me die viellich besti sicht uf d skyline vo sydney hät: operehuus, hafe mit CBD-hochhüser de hinter und de brugg. alles uf ein blick. und ganz ohni grossi touri-masse. genau zwei anderi hät's gha, eine devo ebefalls en "touri-runner". denn händ mir natürlich alles wieder zrugg müesse. am hafe (circular quay) händ mir aber no was luschtigs erlebt: deht hät d aktion "dry july" joghurtsrinks mit beeri und kokosnuss verteilt. genau s richtige für zwei müedi jogger. und sehr fein isch de drink au no gsi!

frisch dusched händ mir üs uf gmacht zu de swiss bakerz, dasmal nid uf grund vonere online-empfehlig, sondern wil d yasmin es brot vo dene i de lodge umeliege gseh hät. und es hät sich glohnt, isch würklich feins brot gsi, wo s deht bached. und au de ganzi rescht vom Sandwich, inklusive heisser schoggi dezue und em muffin zum dessert sind lecker gsi.

denn händ mir üs uf gmacht id innestadt. händ no chli usschau nach souveniers ghalte, aber so richtig glücklich sind mir niened worde. d starbuckstasse isch eifach total übertüred gsi und zudem hät s operehuus druf gfählt. mir händ denn no s alti postgebäude, a offizielli zentrum vo sydney am martin place aglueged und briefmarke kauft. d post beansprucht hützutag aber nur no en sehr chline teil vom gebäude. eher tür ussehendi boutique, restaurant und es hotel bsetzted de grössti teil. vom eine edle gebäude sind mir zum andere cho: is victoria building. deht händ zwar d läde scho langsam gschlosse, isch üs aber recht gsi. mir händ üs es tischli gschnappt, di letschte postcharte gschriebe, zwei asiatische hochziitspaar zueglueged, wie's vonere professionelle crew sich abliechte lah händ (mindestens drü crew members pro paar) und no chli plaudered. die hochziitsfotene schiened scho fasch chli volkssport z sie in sydney, gseht me das doch a jedem halbwegs schöne ort. bsunders beliebt isch de hyde park.

de letschti morge isch denn wenig spektakulär gsi. nach dem mir packt händ, händ mir no macademias kauft für s eine oder andere familiemitglied di hei und denn hät's nomal brunch bi de swiss bakerz gä, zur istimmig uf's läbe di hei. am flughafe händ mir no probiert tax refunds z kriege. d freud über di churzi schlange (mir sind vor lange queus gwarnt worde) isch aber schnell verbi gsi: es git nur rückerstattig, wenn me für mindestens 300$ i einem lade ichauft. so türi sache händ mir aber keini gha. so sind mir denn schneller als planet am gate ghöckled und händ uf d verpackig inere sardinebüchs für etlichi stunde gwartet. dasmal isch leider nüt me mit free upgrade id business class gsi.