certina inline race 2011

berlin in biel, oder so.

d bedingige vorgester abig in biel händ mich sehr a berlin erinnered. zweimal deht han ich die 42km scho im rege absolviert. in biel isch es jetzt zum guete glück nur halb so lang gsi. negativ igstellt bin ich aber keineswegs gsi. nach dem de berlin-marathon trotz räge letscht jahr recht guet glaufe isch, han ich mir nid viel us em wetter gmacht. trotzdem isch für mich aber s renne scho glaufe gsi, bevor s agfange hät.

cho bin ich eigentlich um e gueti ziit, anderthalb stund vor em renne bini z biel am bahnhof gsi. aber wil alles chli unorganisiert gsi isch minersiets, isch einiges schief glaufe: wo git's d startnummere? wer trifft wenn wo? und ich hetti ja no müesse mini rege-rädli montiere. nur wie, ohni torx-schlüssel? de han i nämli vergässe. de urs vo de thunliners hät mir denn eine usglehnt (danke!).

bis ich denn parat gsi bin, isch au scho fasch de start gsi. ifahre: fehlazeig! das hät sich dopplet grächt: erstens bruch ich bekanntlich lang, bis min motor warm isch. und i de schwiiz, vor allem uf so e eher churze distanz, hät me dadezue im renne kei ziit. uf los gaht's los, und zwar wie verruckt. und s zweite isch, an rege muss me sich gwöhne. han ich nüme so in erinnerig gha! dass ich de start völlig verpennt han, isch denn nur no e randnotiz gsi: ich han no mit em chräbu plaudered, wo's plötzli klöpft hät und alli gseckled sind...

am afang hät's aber grad mal noni so schlecht usgseh, usser dass ich meh dur d kurve gschlidered bin, als erwartet. vor allem sind alli ITLer no recht zäme gsi und ich han denkt, vielleich chönnd mir hüt zäme fahre. da drus isch aber definitiv nüt worde. won i denn, ich glaub scho uf de zweite rundi, inere kurve recht grutscht bin und de aschluss chli verlore han, han i ufgä und bin en rechte stuck ällei gfahre. denn isch di nächschti gruppe cho, mit em franz und em paul drinne. unmittelbar nach de spitzcheri händ s mi igholt. leider han ich deht chli uf s falsche pferdli gsetzt: ich han denkt, ich fahri mit em paul, de hät aber genau i dem moment di gruppe zie la. janu, so isch am schluss sogar no de franz schneller gsi als ich, aber d gruppe mit em paul isch defür susch agnehm gsi. de robert isch au no deht gsi. schnell isch es so gsi, dass en vierte d gruppe agfüehrt hät, denn de robert, ich und de paul cho sind. und das hät sich lang nüme gänderet! de vorderschti isch anschienend e rechti maschine gsi, jedefalls isch es nie in frag gstellt gsi, dass er emal wechslet.

eigentlich optimali verussetzige, zum mich erhole. aber es isch nüme gange. ich han scho am mittwuch im training schlechti bei gha und de chaltstart isch denn de tot gsi. deht wo normalerwies mini oberschenkel sind, sind nur no schmerzendi bleichlötz gsi. defür han ich ab de dritte rundi recht guete halt uf de strass gha und kurve sind keis problem me gsi.

bis uf di sechsti rundi isch eusi gruppe irgendwie agwachse, kei ahnig ob vo "vorne" oder "vo hine". s tempo isch schneller worde und ich han chli mühe übercho, mit z hebe. uf de lange gerade hät de robert abriesse la. ich han ihn überholt, mich anekämpft, s fasch gschafft, anderne "überholigsopfer" müesse uswiche und denn isch de abstand doch wieder grösser worde. d spitzcheri isch cho und ich han ghofft, deht viellich no chli bode guet mache z chönne. ich bin e chli aggressiver dri gange und prompt nid ganz rund ume cho: han uf s trottoir uswieche und hinter es paar bäum dure müesse, bis ich wieder zrugg uf d strass han chönne. uf de "rückgerade" han ich vorher eigentlich immer guet mithebe chönne, i dem fall isch d gruppe aber eifach nüme nächer cho. irgendwenn han ich s ufgeh und endi gerade sind di andere "abghänkgte" denn wieder bis zu mir cho. nach de gerade sind drü heikli kurve cho, wo ich aber gwüsst han, dass ich si meistere chann. denn de schlussspurt. ich bin ziemlich rechts uf de strass gsi, han no zwei anderi überholt und han paar mal nach links hintere gluegt. han nid s gfühl gha, dass da irgend jemand no e chance hät oder chli ufhole chann. ich han so nid alles gä, aber au nid usrolle la. i dereziit isch aber no eine rechts a mir verbi und hät mich wohl vom unbedütende platz 61 verdrängt. jetzt lach ich natürlich drüber, im moment isch es aber chli es ärgernis gsi. s hauptärgernis isch aber gsi, und das han ich scho vor em start gwüsst, dass ich (wieder!) nid richtig iglaufe han. au im 68. renne immer no di gliche afängerfehler. aber im 69. alauf mach ich's sicher besser... (hahaha)