rollserie niederbipp

irgendwie hät's mi chli as letschte jahr erinnered. trotz dass scho mai isch, isch es chüel und grau gsi. aber es isch no viel besser cho!

es isch nume chüel und grau gsi, wo mir acho sind, d startnummere gholt händ, üs parat gmacht händ, üs iglaufe händ... bim skates aziehe sind es paar rägetröpfli gfalle. viertel vor vieri, am vieri isch es los gange, macht de petrus d schleuse uf... statt iifahre isch chli under s dach stah agseit gsi. was wohl falsch gsi isch. churz chli grollt sind mir glich no, aber wohl z'wenig. wo's los gange isch, bin i irgendwie überhaupt nid parat gsi. weder im chopf, geschweige denn i de bei. scho frühe, no uf de erschte oder ersch uf de zweite rundi? egal! hät mir de rechti oberschenkel weh tue. de linki hät irgendwie hüt besser möge...

mir händ am afang eigentlich es guets grüppli zäme gha, han i denkt. bald aber hät sich das uf e vierergruppe reduziert. die vier händ denn eigentlich recht guet harmoniert. en füfte, nenned mir en "de gäli", hät chli weniger guet mitgmacht. uf de zweite oder dritte rundi isch er füre gfahre, hät füherig überno und hät gfühlt s tempo ziemlich azoge. für e sehr langi ziit. fasch e ganzi rundi. denn hät er sich ablöse la und isch hinder üs gfahre. aber mit gwüssem abstand. irgendwenn später isch er wieder führe, mir händ ihm nid folge chönne, wird wohl uf de vierte rundi gsi si, und ab deht isch er so öppe 30 bis 50 meter vor üs gfahre.

während ich uf de erschte drü rundene ziemlich glitte han, uf de zweite au gfrore bi dene sintfluetähnliche bedingige, sind di vierti und füfti rundi relativ guet gange. es hät denn wohl au ufghört rägne. d strasse sind aber total nass und teils rutschig bliebe. und deht wo sich s wasser i löcher agsammled hät, händ di chlinere und grössere seeä ungliebti hindernis dargstellt.

gege s endi vo de füfte rundi händ mir chli vor üs zwei uftauche gseh. eine isch so verdächtig blau kleidet gsi. wohl de chräbu, en usriesser vo ursprünglich üserer gruppe. jetzt isch s ziel klar gsi: die beide holed mir no. und dass mir denn de "gäli" unterwegs au no fressed (isch zwüsched üs gsi) isch nur no di logischi folg devo gsi. mir händ denn di ganzi letschti rundi lang ziemlich kämpft. vor allem de kurt hät mächtig gas gä. i de letschte linkskurve, churz vor em ufstieg is ziel, isch s ziel denn praktisch tatsach gsi. mir händ meh oder weniger glichziitig de gäli und de chräbu und sin begleiter igholt. wobi "mir" nid richtig isch, d gruppe hät sich deht meh oder weniger ufglöst und mir sind nur no paar skater gsi, wo innerhalb weniger sekunde hinter oder näbedenand gfahre sind. bis is ziel hät's bi mir nur no für de "gäli" glanged, de chräbu hät paar sekunde chönne rette. was ich mir den prompt au alose la han müesse. (scho guet, chräbu, s nächsti mal denn! ;-))

ziit isch praktisch identisch gsi mit em letschte jahr. de rang einiges besser. stellt sich d frag, ob ich jetzt glich guet resp. schlecht gsi bin. angesichts dessen, dass de sieger gegenüber em letschte jahr fasch vier minute verlore hät, isch wohl di glichi ziit ha wie s letschti jahr nid all zu schlecht. d wassermasse wo mir unterwegs atroffe händ, isch uf jede fall um einiges grösser gsi als letscht jahr.