outback

de nomittag in alice springs händ mir für's vorbereite vo üsere drütägige camping-tour is outback brucht.

mir händ im wesentliche wasser und warmi chleider kauft, gwäsche und gepäck umglade, da mir di grosse koffere nid händ chönne mitnäh. ä xs-north face täsche hät müesse usreiche. für e laufrundi hät's aber au no glanged. zwüscheziitlich isch si zu me ol ohni bruchbari charte worde. aber am schluss händ mir de heiweg wieder gfunde und ersch no es känguru in wildnis troffe.



erneut isch frühe ufstah agseit gsi, die vo de emu run tours hetted üs am 5:35 abhole sölle, sind aber ersch gege di 6i cho und bim erschte stopp uf enere "camel farm" händ mir denn no s büsli wechsle müesse.

de nächsti halt händ mir bi me ussichtspunkt uf de ?fuluru? (oder eher fooluru?) gmacht. de nenned d tour guides so, wil di meiste touris meined, das seigi de ayers rock (uluru). er gseht aber eher us wie de table mountain und isch au e foti wert gsi.

nach dem mir no "fire wood" gsammled händ, hät's denn lunch im camp vor em nationalpark gä. denn isch es in park (offiziell: uluru - kata tjuta national park) gange, zersch in es museum über d kultur vo de aborigines, entschuldigung anangu, und denn uf en walk rund um de ayers rock ume. nach es paar unterhaltende erklärige zum rock und de aborigines und dene ihrem frühenerige läbe, isch es zum sunset gange. anschienend DIE touri-attraktion: tour-büs händ sich in reih und glied ufgstellt. alli händ, näbed de touris, no es tischli mit snacks und champagner usglade. naja. s naturschauspiel hät mi denn nid so sehr us de socke ghaue und isch für mich fasch d näbeattraktion gsi.

zrugg im camp händ mir d swags und d schlafsäck usgrollt und de guide hät koched. bald sind mir am wärmende füür ghocked. d wettervorhersag für die nacht isch bi drü grad celsius gsi. dementsprechend guet hät di warmi duschi tue. und entsprechend chalt isch es denn i de nacht gsi, wo'n'i uf's wc müesse han. und mit in schöne stärnehimmel lüge bim ischlafe isch au nüt gsi, d chappe han i lieber bis wiet über d auge is gsicht zoge.

di klirrendi chälti isch natürlich au i de frühene morgestunde nid weg gsi, wo mir no im dunkle z'morge gässe händ, um denn zum sunrise z ga. de händ mir a me ort gnosse, wo me glichziitig de uluru und de kata tjuta gseh händ. minere meinig nah isch es schöner gsi, als de sunset am abig vorher. und es hät ersch no viel weniger lüt gha.

wieter isch es uf en hike dur's valley of the winds, wo sinem name alli ehr gmacht hät, gange. de hike isch au würklich en hike gsi. es isch über stock und stei, steil ue und wieder abe gange. aber d natur, dur die me sich bewegt hät, isch de hammer gsi. unterwegs hät üs de guide erklärt, wie d berge da entstande sind, wieso s i dere wüesti trotz sältenem rege wasser hät und no chli über d bemalig vo de aborgines. aschlüssend isch es zrugg zum camp gange, wo's z'mittag gä hät, bevor mir alles ufglade und d region verla händ.

de nomittag isch hauptsächlich mit auto fahre druf gange, abgseh vo wc-stopps und neuerlichem "fire wood kollekte". um di füfi sind mir im nächste camp gsi. das mal händ mir de luxus vo zelt und enere art feldbett gha, uf das mir de swag mit em schlafsack gleit händ. definitiv wärmer, als i de nacht vorher. während mir uf enere erhöhig grad näbed em camp de sunneuntergang aglueged händ, hät de guide wieder koched. es "aussie bbq?: würschtli, poulet spiessli und känguru plätzli. dezue mashed potatos und es frisches, über em füür gmachts brot und salät. erneut sehr fein gsi und definitiv s besti brot vo australie!

de dritti tag hät "ersch" am füfi am morge agfange. am sechsi sind mir los gfahre um üse canon rim walk z starte. als ziemlich erschts isch es steil de berg uf gange. isch eigentlich e art stäge gsi. de rescht vom weg isch mehrheitlich entlang em "top" vom kings canyon gange. natürlich nid immer entlang de klippe. aber me isch immer wieder a ort cho, wo me id schlucht abe luege hät chönne. aber au susch isch das gestei absolut sehenswert und de walk es erlebnis. de guide hät zudem au immer wieder interessanti sache über d pflanze wo's gha hät, z verzähle gwüsst. hauptsächlich, wie d aborigines die frühener (oder au hüt no?) z nutze gwüsst händ. au en chline abstecher in garten eden händ mir gmacht. das isch eis vo vier(?) permanente wasserlöcher i dere wüesti. wie viecher zu dem chömmed, isch mir aber chli es rätsel, usser natürlich de vögel. denn de garten eden isch inere tüfe, steile schlucht, wo's für touris zum teil extra stäge und holzweg hi baut händ. susch würd me als mensch, als mitteleuropär sowieso, deht gar nid ane cho.

nach öppe drü stund sind mir rund ume gsi, und es isch fäng agnehm warm gsi. nüt me ume, vom skiferie-feeling, wo mir am morge frühe d chappe, d sunnecreme und de iisigi wind gä händ. druf abe sind mir is camp go ufruume und z'mittag ässe. und denn scho vor em mittag im eigentliche sinn wieder los. für gueti vier stund isch wieder busfahre agseit gsi, alles a einem riehme, abgseh vo me wc-halt und me stopp, wil mir en riese eagle a de strass gseh händ. das viech heigi e flügelspannwieti vo bis zu drü meter, hät de guide gmeint. bim igang zu alice springs händ mir denn au nomal gstoppt. deht händ mir no es gruppefoti gemacht, und denn sind alli ?hei? bracht worde, und händ under d duschi chönne und frischi chleider aziehe. es hät sich tatsächlich e chli wie ?heicho? agfühlt. nach dem mir ?laundary? gmacht händ, sind mir normal is städli, zum mit de andere vo de gruppe, inklusive guide, i me pub z ässe und bier (ich natürlich nid) z trinke. zudem isch no s origin game (rugby) glaufe, was da e diese sach isch. de guide isch würklich en guete typ gsi, und d tour hät sich glohnt und isch z empfehle. da sind sich alli einig gsi.

nach enere nacht i me richtige, warme bett sind mir nomal uf d laufrundi, das mal händ mir de weg kennt, und denn no id stadt go postcharte chaufe, chilled choc mint und chilled choc mud mocca trinke. s wetter isch mittlerwiele wieder ziemlich summerlich (t-shirt) für üsi verhältnis, und wohl e gueti aklimatisierig für cairns.