cairns

vom chalte, trochne landesinnere direkt a di füecht-warmi, nördlichi küste isch scho chli e umstellig gsi. das händ mir scho nach de akunft, bi me spatziergang rund um's motel gmerkt.

nach dem mir üs usgibig mit toast, cornflakes und touri-infos ideckt händ, sind mir mal chli uf cairns ine. s motel isch en schöne fuessmarsch usse dra gläge. d lagoon, d badi hafe, isch zue gsi. mir sind trotzdem chli am hafe ghöckled und händ di diverse touri-Angebot und tour-variante diskutiert. schwierig! später sind mir no bis ganz zum hafe, wo mir es schöns restli entdeckt händ, und chli id stadt. die hät üs aber nid so us de schuhe ghaue. alles sehr, sehr touristisch. souvernir-shop an souvenir-shop... i me wolwoorth händ mir denn z'ässe kauft und üs uf de langi heiweg de strandpromenade entlang gmacht.

nach dem mir am zweite morge üsi toure für di nächste beide täg am tour-desk im motel bueche la händ, sind mir id badi, wo näch bim motel gsi isch. i me freiluft 50m-becki händ mir üsi bahne zoge, jedes hät eini für sich gha, wil für öppe füf bis sechs lüt acht zur verfüegig gstande sind. und das a me samschtig nomittag. isch es für di iheimische tatsächlich z chalt, oder hät's immer so wenig lüt? für üs isch es uf jedefalls en agnehme, aber nid heisse summertag gsi.

nach dem mir im motel no d reschte vom abig devor zum z'nacht gässe händ, sind mir no id stadt, genau gno an hafe i di cooli bar zwei drinks und es mövepick glacé uf em heiweg händ de ferietag abgrunded.

am nächst morge hät's denn aber gheisse frühe ufstah. am zeh ab siebni sind mir vom tour-bus abgholt und wieder nördlich gfahre worde. d erkundig vom rägewald isch agstande. ich bin aber irgendwie sehr, sehr müed gsi und han vom ganze tag recht wenig mitübercho, wie ich später han müesse merke, wenn mi d yasmin amig öppis gfräged hät. nach me wili fahre händ mir en halt für en walk gmacht. dadezue sind mir vom tourbus in en shuttel-bus umgstiege, bis an afang vom pfad. de guide hät unterwegs no paar interessanti sache verzählt, über Pflanze und tier. aber susch han i für mich denkt, hett i grad so guet id masoala halle im zürizoo ga chönne.

denn isch es im bus wieter gange, lang und nid sehr spannend. usser, wo mir mit de fähre über de daintree river sind. d strass isch aber schmal gsi und kurvig, so sind mir denn glich froh gsi, händ mir nid es auto gno und sind sälber gfahre. nach gfühlte ewigkeite händ mir denn mitte im busch ghalte und sind usgstiege. nach paar fuessminute (über betonierti strass) sind mir zu me resti cho, wo's z'mittag gä hät. das isch no lässig gsi. und was me deht fasch nid gmerkt hät, quasi um d egge isch s meer und en schöne sandstrand gsi. usser de lüt vo üsem tourbus, isch wiet und breit niemert gsi. dass de strand aber zu de sehenswürdigkeite ghört het, wo de tourbus agstüred hät, han i ersch später checked. so stränd git's doch no a meh ort uf de welt, nid?

wil paar lüt (native speakers!) zeh vor und zeh ab nid unterscheide chönnd, sind mir ziemlich z spat uf de rückweg und mir händ am nächste ussichtspunkt nid viel ziit gha. getreu em motto "take a picture and watch it at home" sind mir nach nur paar minute wieder wieter gfahre. mir sind fäng chli enttüscht gsi vo de tour, aber s wahri high-light isch no cho: uf em daintree river hät's no es boots- und nid nur es führefährtli gä. und de kapitän hät sich echt guet uskennt. ziemlich zielgrichtet isch er i gwüssi sietekanäl gfahre, wo mir richtigi läbigi krokodil gseh händ. zersch e drü meter langi dame, denn es zwei bis drü jährigs, und es ganz es chlises, wo das jahr uf d welt cho isch. au vögel händ mir no gseh, aber d krokodil händ dene chli d show gstohle.

de abig händ mir denn mit flüg und hotel bueche verbracht. nach dem mir townsville, darwin und sogar melbourne in betracht zoge händ, händ mir üs für brisbane als letschti station entschiede.

erneut isch es frühe los gange. dasmal an hafe, uf d seastar, mit schwiizer crew-mitglied. e gueti stund sind mir quer über s meer gfahre, bis zunere sand-insle, mitte im greate barrier reef. die insle ghört offensichtlich vögel. die isch total voll gsi. aber mir sind nid deswege deht use gfahre, sondern zum schnorchle. mit brülle, schnorchel, flosse, wetsuit, pool noodle und uf wunsch no life West sind mir usgstattet worde. dass deht öpper unter gaht, isch praktisch unmöglich. scho mit em wetsuit ällei bin ich uf em salzwasser obe ufgschwumme, ohni selber aktiv schwümme z müesse. öppe anderthalb stund händ mir d umgebig vom reef chönne erkunde. e bunti und ganz anderi welt! fisch i allne farbe und grösse sind z bestuune gsi. isch mir chli vorcho wie im zoo. und das, obwohl deht täglich ganzi bootsladige a touriste uskippt (und denn wieder igsammled) werded. mir sind um di 11i uf's boot zrugg beorderet worde, wo's z'mittag gä händ. erneut relativ gsund, was d yasmin und mich dezue veranlasst hät, z witzle, dass es z australie nur uf touri-tours gsunds esse git.

nach em ässe sind mir no zu me zweite teil vom riff gfahre, em hastings reef. s wasser isch deht chli tüfer aber au klarer. mir händ eigentlich sehr lang ziit gha, zum deht z schnorchle. aber irgendwenn isch es üs z chüel worde, und mir händ uf's glasbodeboot umstiege müesse. vorher aber händ mir nomal unzähligi fisch und als highlight vom tag e riesigi turtle gseh. so e grossi wasserschildkrot han i glaub no nie i minem läbe gseh! leider nid gseh händ mir en chline hai. und zum glück au kein grosse.

s reef, oder besser gseit d küste, händ mir denn uf em flug nach brisbane no vo obe chönne gnüsse. de fensterplatz hät sich definitiv glohnt! knütschbaus wasser, dezwüsche immer wieder insle und am strand en schöne hellbeige sandstreife.