es tagebuech vo mim erste bsuech in berlin. de zweiti folgt sicher no, denn was mich würklich gnervt hät: ich han de berlin (inline) marathon um genau 2 wuche verpasst!
sunntig, 01:55
fritig 8.10.04:
 de berliner dom und de fernsehturm im hintergrund |
in berlin mit einere stund verspätig acho, händ mir zersch mal es billet für de öV für di ganzi wuche und di ganzi stadt glöst und üs uf de wäg zum hotel gmacht. s zimmer deht isch aber noni bereit gsi, s gepäck händ mir immerhin chönne abstelle. denn sind mir halt mal los zoge. s tram wo direkt vor em hotel fahrt, bringt üs i 15 minute zum "Hackescher Markt". deht sind mir denn mal chli ume glaufe, händ als erschts viel bekannts troffe wie s starbucks und s häagen-dazs. im zweite sind mir denn gsi go z'mittag ässe, bevor mir z fuess zum "Alexander Platz" und em fernsehturm sind. vo deht us reiht sich praktisch sehenswürdigkeit a sehenswürdigkeit: ratshuus, dom, nationalgallerie und anderi museeä, "Neue Wache" und "humboldt-universität". das alles händ mir aber mal nur vo usse gseh. für mich isch es aber mega idrücklich gsi. es sind alles alti, schöni hüser, hüfig mit süüle wie zu de römer-ziit. denn sind mir mal zrugg is hotel, wo mir s zimmer bezoge, recht luxuriös, s internet usprobiert und üs chli igrichted händ. zum z'nacht sind mir wieder zrugg an "Hackescher Markt", händ deht i me resti gässe und im irish pub trunke.
sunntig, 11:34
samschtig:
 siegessäule |
d U-bahn hüt äs an Kurfürstendamm bracht. direkt vor em grösste ichaufszentrum europas hät si üs abglade. lang sind mir aber im KaDeWe nid gsi, z viel lüt und alles ziemlich tür. aber au da, wenn me ine chunnt, zersch wieder es stürkli schwiiz: swatch und omega. am "ku'damm" sind mir wieter no im "nike tower", es paar chlinere lädeli und i de "Kaiser-Wilhelm-Gedächtniskirche" gsi. das alles isch teil vonere tour us em mario sinem reisefüerer gsi. da mir i dene läde(li) zum teil chli lang verwieled sind, isch es bald füfi gsi und es isch en döner vo nöte worde. denn isch es uf di zweiti tour gange. am zoo verbie, en stuck dur de tiergarte, entlang de "Strasse des 17. Juni", wo amig d love parade statt finded (gfunde hät?), direkt zu de "siegessäule". die isch herrlich vo de abigsunne belüchted worde. natürlich sind mir denn no id süle ine und uf d usichts-plattform ue, vo deht us hät me en herrliche überblick über di ganzi stadt. d süle isch überigens ca. 1870 vor em reichstag erbaut und vo me stadtplaner vom hitler denn versetzt worde.
 Brandenburger Tor |
entlang de spree isch es wieter gange bis zu de schwiizer botschaft, wo mitte im regierigsquartier liet. e mischig vo extrem neuer und moderner architektur und wieder dene uralte gebäude us de kaiser-ziite. bis mir deht gsi sind, isch es aber scho dunkel gsi. so händ mir de Reichstag "by night" gseh. aber das hät sich glohnt. vor allem bi de neue gebäude rund ume und denn au bim "Brandenburger Tor" isch starch uf d belüchtig gachted worde. ich han mir jedefalls nid chönne vorstelle, dass die baute bi tag schöner wäred.
nach enere längere odysee und me umwäg dur en wietere CD/DVD/buech-lade, sind mir denn am halbi zehni endlich i me macdonald's glanded. no chli später händ mir de gebruch vom berliner nachtnetz gmacht. d u-bahne und d s-bahne verchered i de nächt vom fritig uf de samschtig genau glich wie am tag, ohni dass en zueschlag nötig wäri. da chönnti sich d ZVV mal es vorbild nä!
mäntig, 00:49
sunntig:
 Potsdamer Platz mit dem DB-Tower |
da ich recht spat ufgstande bin, han ich s exklusivi früestücks-buffet nid so richtig chönne gnüsse, sondern han ziemlich schnell müesse ässe. defür isch de sunntig nacher um so andächtiger worde. mir sind uf em "Dorotheenstädischer Friedhof" gsi, wo de mario d grabstätte vo diverse bekannte philosophe und autore bsueche welle hät. de berchtold brecht isch aber di einzig person gsi, wo ich kennt han. aschlüssend sind mir an "Potsdamer Platz", in modernste teil vo berlin. hochhüser, wie mir s susch nur vo bilder us New York kenned: viel stahl und glas. passend zu dere stadt isch es wieder mit me krasse gegesatz wieter gange: de bsuech vom "Schloss Sanssouci" in potsdam, chli usserhalb vo berlin, isch agseit gsi. s schloss sälber isch nid so impossant. d parkalag defür um so me! bis mir die 300ha grossi alag durquert händ und uf de andere siete zum "Neuen Grossen Palais" cho sind, isch sicher e halbstund vergange. das grossi palais, isch denn au würklich gross und erstuunlich gsi! uf em wäg zrugg sind mir no a de "orangerie" verbie cho, wo e längi vo 300m hät. wie die vor über 200 jahr sotigi bauwerk erstelle chönne händ, isch für mich unfassbar. zrugg am "Hackschen Markt" hät s z'nacht gä und später no e rundi billiard, richtig Cape-Town-like.
mäntig, 20:14
mäntig:
 Reichstag |
wieder hett ich fasch s früestück verschlafe! aber es hät denn doch no glanged. denn sind mir ufbroche, is guggenheim-museeum. ("Robert Mapplethorpe und die klassische Tradition: Vergeleich zwischen modernen Fotografien und manieristischen Druckgrafiken aus dem 16Jh.") das hät vor allem de mario interessiert. ich han nur d bilder i schön und nöd schön unterteilt. z fuess sind mir d "Unter den Linden"-strass durabe, bis zum "Brandenburger Tor". so händ mir das au mal no am tag gseh. aber d nacht-asicht hät mir tatsächlich besser gfalle. d suechi nach em "Max Liebermann"-huus hät denn i me wietere, russische museum gänded. nach de asicht vom "Reichstag" bi tag und volliecht, sind mir wieder z fuess an "Potsdamer Platz", wo s im "DaymlerCrysler-Quartier" e usstellig für ziitgenössischi kunst ("Minimalism and After") gha hät. de mario hät s wiederum fasziniert, für mich hät s halt wieder eifach schöneri und weniger schöni bilder gha. au für en zweite blick is "SonyCenter" hät s glanged. zrugg am "Hackscher Markt" händ mir gässe und CD-läde durchstöbered. eigentlich uf de suechi nach de neue hosen-CD, wo hüt erschine isch. im dritte lade händ mir die gfunde. han si denn aber doch nid kauft, da das de felix i de schwiiz mittlerwile für mich erlediget hät, wie ich per SMS erfahre han. han denn no lang zwei sampler mit alte punk-hits, sowie e ramones-CD i de händ gha, und au no dri glosed. aber am schluss denn doch nid posted.
zieschtig, 18:43
zieschtig: hüt sind mir de ganzi tag im "Hamburger Bahnhof" gsi, wo zur ziit und viellich für immer, d "Flick Collection" beherbergt. de friedrich flick isch wäge de nazi-vergangeheit vo sinere familie e sehr umstritteni figur. insbesondere wil d familie ihren riechtum wärend de hitler-ziit erlangt hät. de herr hät mit em gerbte gäld eini vo de grösste ziitgenössische kunstsammlige zämekauft, bis zu 2500 exemplar. us dere sammlig chann me jetzt verschideni werk ebe im hamburger bahnhof aluege. keine leichte kost! am nomittag am drü bin ich jedefalls tot kapputt gsi, obwohl mir erscht öppe d helfti gseh gha händ. ich han mich denn entschide, nur no de ruum vo de pipilotti rist a z luege. für die öppe 5 werk han ich nomal fasch e stund brucht. denn bini vorziitig is hotel, no go charte schriebe. aber als nicht-kunst-liebhaber hät das au me als glanged, oder?
mittwuch, 00:??
am abig sind mir no am "sparta"-konzert gsi. isch no guet gsi. aber es hät sich wieder mal bestätiged, dass di beste konzert die sind, wo me d band und ihri stuck scho vorher kennt.
dunschtig, 00:42
mittwuch:
 blick dur s stadion uf de "Marathon Eingang" und de "Glockenturm" |
ich han unbeding no zum olympia-stadion welle. so bini denn mit de U2 as endi vo de stadt gfahre und es stückli glaufe. denn bini vor dem typische nazi-bau gstande. es bessers biespiel für d architektur us dere ziit git s chum me. dass drinne eini vo de modernste arene europas steckt, hani bis deht noni gwüsst. drum hani au uf e früeig verzichted, wo über e stund gange wäri, aber grad agfange hetti. so han ich halt d VIP-loge nid vo inne gseh und au kei spieler-kabine. wobi d heimat vo so verweichlichte fuessballer interesiert mich ja e nid. ;-) aschlüssend bini no guet 20 minute um di ganz alag ume glaufe, um am andere endi uf de "Glockenturm" ufe z ga. das hät sich aber glohnt. me hät vo deht e würkich gueti ussicht, über s ganzi gländ,
 |
wo näbed em olympia-stadion au no es schwümm-stadion mit 8 bahne und me sprungturm, jenschti trainingsplätz, es landhockey-stadion, es rietstadion und "die Waldbühne" umfasst. uf de waldbühne händ sowohl d hosen als au d ärzte scho legendäri konzert gä. d hosen sind im nächste juni überigens wieder deht. uf dere siete vom gländ hät d S-bahn ghalte, wo mich zrugg an "Hackscher Makrt" bracht hät. deht han ich mich nomal um mini crumpler-täsche kümmered. es isch e rechti zange-geburt gsi, aber ich han jetzt eini!
am abig sind mir zäme go ässe und aschlüssend is "häagen-dasz", wil ich deht unbedingt no d "Choco Colada" probiere han welle. und es hät sich glohnt. wenn me si sich uf de zunge zerga laht, schmöckt me abwechsligswies ihri hauptbestandteil kokosnuss, rum und natürlich schoggi. herrlich!
dunnschtig, 19:53
dunnschtig
 wachhüüsli am Checkpoint Charlie |
am letschte tag han ich s super-morge-buffet am längste chönne gnüsse. ässe han ich wäge dem natürlich nid me möge (scrambled egg, lachsbrötli, pfannkuchen, desser gebäck). denn isch packe a gseit gsi, extra so, dass di kaufti täsche z oberst isch, ebe so d DVD. denn händ mir üs nomal uf e letschti erkundigstour gmacht. "Chekpoint Charlie" wäri agseit gsi. s wachhüüsli händ mir gseh, is musem sind mir aber nid, obwohl s mich extrem interessiert hetti. es hät eifach viel z viel lüt gha. schient en richtige touriste-treffpunkt worde z sie! so sind mir denn nomal chli uf "Berlin Mitte", nomal a de Humboldt-Uni verbi spaziert und no in Dom ine gange. Durchus sehenswert. Aber au da, viel z viel touriste. für e chile isch es eifach z luut! händ die all kei respekt!? zum schluss isch natürlich nomal en CD-lade dra cho. für mich hät s es wieters exemplar id ramones-sammlig gä (5.50 euro!) und es "best of"-album vo "shame 69" ("if the kids are united"). denn händ mir zrugg is hotel müesse go s gepäck hole und mit de S-bahn und em bus an flughafe use. ich han no welle für alli mini ichäuf d MwSt zrugg fordere. das isch aber nid gange, wäri super-kompliziert gsi. so viel zum tax-free-shoping im usland (hahaha!). nach me burgerking bsuech isch es denn zügig zrugg gange, das mal hät de flüger fasch kei verspätig gha. bim warte uf de abflug hani no di letschte charte gschriebe, wo ich denn z chloote abgschickt han. jetzt bini im zug uf meile, und chli später wohl scho wieder ganz im läbe da: es git no es raclette mit em hockey-club.
schoeni fotene!!