köln marathon 2010

nur grad ei wuche nach berlin isch es scho wieder is nördliche nachberland gange. das mal uf köln.

nach dem s s letschti jahr gregnt hät, isch das jahr scho alles besser gsi was nid rege gsi isch. d prognose isch au guet gsi! bis zu 23 grad. aber i de nacht hät s no gregnet und am morge isch es frisch gsi. so han ich mich für langi hose und es langs liebli entschiede. aber für d 110er redli wo n i nur bi trocheheit fahre.

bim ilaufe han i aber bald müesse merke, das mini chleiderwahl e chli pessimistisch gsi isch. ich han ziemlich warm gha. d hose abzie wäri chli ufwändig gsi. d skates, d schoner und s dress hett i defür ab und wieder azie müesse. aber wo s üs denn im startblock e chli "schmore" la händ, wie übergens au scho s letschti jahr, han ich mich entschiede, s langi liebli no ab z zie und im startgländ liege z la. es isch später leider nüme deht gsi. isch zwar nur es alts gsi, aber ich han s dennoch chli schlecht vo de organisatore gfunde, dass es die alli weggruumed händ. ob und wo me s abhole chönne hetti, han i au nid gwüsst und de arbeiter, wo mit abbaue vo de startinfrastruktur beschäftigt gsi isch, hät au kei uskunft welle gä.

churz nach em start han ich mini chleider- und rollewahl nomal chli bereut: d strass isch nass und de wind uf de deuzerbrugg ziemlich chüel gsi. ich bin wie scho in berlin em markus gfolgt. er hät, ebefalls wie scho vor einere wuche, ziemlich viel lüt überholt. isch nid immer eifach gsi, ihm z folge. nid jedi lugge zwüsched de lüt dure isch gnueg gross für zwei gsi. und irgendwenn han ich s au ziemlich astrengend gfunde. aber grad no rechtziitig isch er denn inere grössere gruppe bliebe. i dere gruppe händ mir au no de paul und de franz atroffe. bald aber sind mir z forderscht a de gruppe gsi. und denn isch es passier: de markus isch in me loch i de strass hänge bliebe und gstürzt. ich muss mehreri schutzengel gha ha, dass ich, unmittelbar hinter ihm skatend, dra verbie cho bin. was jetzt? ich han churz zögered und zrugg gluegt. d gruppe isch verbiezoge und hine isch leeri gsi. ich han mich entschide, de gruppe nah z renne und wieter z fahre. aber s schlechti gwüsse hät scho chli druckt. das ganzi isch wohl öppe nach siebe oder acht kilometer gsi. langsam han ich mich i de gruppe wieder füre garbeitet, bis ich hinter em paul und em franz gsi bin.

bis deht isch es ziemlich hüfig no nass und rutschig gsi. inere sunnige rechtskurve, wohl öppe um di 10km ume, isch de jan uftaucht. er isch ällei skated und vorne id gruppe igstiege. oder hät gruppe ihm aghänkt? mis nächsti ziel isch klar gsi, no wieter i de gruppe füre z cho. am liebste wäri natürlich direkt hinter en jan gfahre. er hät en guete rythmus wo ich zudem au kenne. aber er hät vo dem moment a, wo mir ufgschlosse händ, bis fasch zum schluss gfühert. ganz z forderscht han ich nid möge mithebe. es hät ziitewies rechte wind gha.

trotzdem isch vo dem moment a, woni i de gliche gruppe gsi bin wie de jan, alles guet gsi. ich han nur no eis ziel gha: mit ihm is ziel z cho. mir isch scho klar gsi, dass das renne für ihn keis guets isch. aber es wäri s erschti, wo ich mit ihm fahre han chönne. zudem isch es au immer wie sunniger und trochner worde.

de paul und de franz sind irgendwenn anschienend verlore gange. wenn und wo weiss ich nid. aber bi viellicht öppe 29 kilometer händ de jan und de zweitvorderschti e chlini lugge zum dritte gschaffet. woni gmerkt ha, dass de nid nah mag, bini use und han die beide igholt. zäme mit me wietere fahrer händ mir denn es vierergrüppli bildet. en moment lang häts eso usgseh, wie wenn mir de break away schaffe würded. ich bin mir zwar nid eso sicher gsi, ob ich das guet gfunde hetti. im vierergrüppli wäri wohl nid um füherigsarbeit ume cho und ziitewies bini scho im windschatte am limit gsi.?

nach 31km hät s e spitzcheri gha. nach dere händ mir bim zruggfahre d skater hinter üs gseh. d erliechterig isch recht gross gsi, wo ich deht de markus entdeckt han.

nach dem de nächsti, sehr windigi teil hinter üs gsi isch, isch es bald richtig ziel gange. d tafle vo 36, 37, 38 und 39 kilometer sind wie im flug verbi gange. nach dem s am rudolfplatz nomal üsi technik prüeft händ (e kurve uf plfasterstei) han ich mit em grosse schlussspurt grechnet. wie aber scho uf em kilometer devor isch es aber eher langsam gange, han ich s gfühl gha. trotz enere grosse hektik. ich bin nid so richtig drus cho. ich hetti deht aber nomal chli energie mobilisiere chönne. bi de deuzerbrugg hät sich denn d gruppe ufglöst. die brugg isch relativ stark gwölbt. ich han mir gseit, no da ue und denn eifach hine abe usrolle la. ich han denn no es paar überholt und grad öppe uf em kulminationspunkt zum jan ufgschlosse. ich hett en deht wohl chönne überhole. hett ich aber chli frech gfunde, nach dem ich fasch 30 kilometer lang vo ihm profitiert han. so bini denn hinter ihm bliebe und han uf en grossartige schlusspurt verzichtet. uf de ?churze zielgerade händ mir nomal de einti oder anderi überholt. denn isch es gschafft gsi.

update, 8. oktober, 14:55 nach em studium vo de rangliste isch das renne grad nomal i besserem liecht erschine: i de fitness-kategorie (was am SIC de speed-breitesport-kategorie entspricht) bin ich 15! im wesentliche hät s no ei grossi gruppe, sowie die drü wo de sieg unter sich usgmacht händ, vor üs gha. stellt sich d frag, ob mir mit dene mithebe möge hetted, wenn mir vo afang a vorne igstande währed. mit 799 pünkt isch es zudem au im verhältnis zu de spitze s besti bisherige resultat. jedefalls bi dene renne, wo en grossteil vo de international spitze-skater awesend gsi isch.