rollserie neuendorf

s erschti inline renne vo de erste post-sic-saison isch in neuedorf gsi. de inline club mittelland organisiert scho zum dritte mal d rollserie, e chlini inline-rennserie.

s format vom renne isch mindestens für mich au neu gsi: e halb stund lang fahre, bi de erste ziel-durchfahrt vo de spitze isch di letschti rundi iglütet worde. i de rangliste hät als erschts zählt, wer am meiste rundene hät, und denn bi dene wo glich viel gha händ, wer am wenigste ziit defür brucht hät. so gseh also e gueti vorbereitig für s 24h-renn-format.

bi herrlichem wetter, sunnig und summerliche temperature sind de ronny und ich z neuedorf itroffe. mir händ no diskutiert, ob mir i de volkslauf-kategorie richtig sind, oder doch scho eher is elite-feld ghöred. wo mir am start gstande sind, händ mir aber gwüsst, das mir di richtigi wahl troffe händ: rund um üs ume alles skater mit speed- wenn nid gar massschuhe und dress vo bekannte schwiizer clubs.

los gange isch es relativ gemächlich und ich bin ziemlich wiet vorne gsi. uf de erschte öppe drü rundene han ich d spitze vom feld immer gseh und bin gfühlsmässig no immer i de spitzegruppe gsi. wil ich s immer mega schwer finde, mich i'z schätze han ich e bewährti taktik agwändet: mich vo afang a hinter en mir bekannte fahrer i z reihe. i dem fall isch es eine vo de vielne "andere" daniels vo de thunliners gsi. es hät sich denn wohl als e eher defensivi taktik usegstellt.

überhaupt bini lang defensiv, sprich immer guet im windschatte versteckt, gfahre. aber au mit em risiko, da wieter hine i de gruppe, abghänkt z werde, wenn wieter vorne es paar abriesse lönd. so isch es wohl gscheh. jedefalls isch mit de ziit d gruppe chliner worde, wie genau s passiert isch, han ich nid immer mitübercho. aber scho uf de dritte rundi han ich emal realisiert, dass de ronny nüme i minem blickfeld isch. später hät er mir verzählt, dass er mit zwei andere recht lang vorne weg gfahre isch.

mit de ziit han ich sowieso chli d übersicht verlore. wieviel rundene händ mir? wie lang gaht's ächt no? kei ahnig han ich gha. wo emal es paar a üs verbi sind, isch mir au nid klar gsi, ob die üs jetzt überholed oder überrundet. jedefalls bin ich uf de letschte drü oder vier rundene denn insofern aktiver gsi, als dass ich au gfühert han und zum teil denn nid wenig. irgendwenn sind no zwei rundene azeigt worde, und denn isch di letschti iglütet gsi. ich han nomal uf de erschte hälfti gfühert, uf de zweite probiert mich z verstecke, was nid so richtig glunge isch. trotzdem bini recht guet us de letschte kurve cho und han de schlussspurt azoge. han en aber nid bis z'letscht dure zoge. ich han irgendwie s gfühl gha, di andere mached nid würklich mit (wieso eigentlich? sie sind ja glich schnell gsi wie ich!?) und han scho chli vor em ziel usrolle la, was mich sicher no de einti oder anderi platz kosted hät. aber wen interessierts? schlussendlich hät's spass gmacht und das isch d hauptsach! ich würdi's jedefalls als en glungene saisonuftakt bezeichne.