mittelrhein marathon

e neui strecki mit me quasi neue team bringed abwechslig in inline-alltag.

am 6i ufstah isch scho sehr frühe! aber es isch gange. am 7i isch de zug im HB gfahre. vorerscht sind zwei ITLer mini reisebegleitig gsi. im ICE vo basel uf mannheim han i glaub nomal gschlafe, jedefalls isch d fahrt schnell verbie gange. vo mannheim uf koblenz händ mir denn chli meh useglueged, schliesslich hät me deht en teil vo de strecki z gseh gä. z koblenz am bahnhof hät mi de urs vor de thunliners abgeholt und so han ich no schnell is hotel chönne go das us de täsche uspacke, wo'n ich am renne nid brucht han.

am eis sind mir wieder los, uf de zug vo koblenz nach boppard, wo de start gsi isch. in vielerlei hinsicht hät s renne an engadiner erinnered.

vor am start han ich no probiert tape uftriebe. ich han mis vergässe. aber das hät niemer debi gha. sit wenn bin ich de einzig wo das brucht?!

denn isch es los gange und zwar wie verruckt. ich bin leider nid so optimal wie gwünscht us em startblock cho und han entgege allne hoffnige mich relativ wiet hine, viellich a de 20. oder au de 40. position müesse ireihe. s ziel, möglichst alli thunliners zäme z fahre isch scho verfehlt gsi. ich han no probiert, vo ziet zu ziet e chli wieter füre z cho und mich zu de andere thunliners z gselle. s tempo isch aber für mich chli z hoch und de gegenwind z starch gsi. so bin i denn anere eigentlich chli blöde position festghange. blöd deswege, wil's halt deht "hine" recht "handorgeled" und so recht streng isch zum fahre.

eme sturz han ich, andersch als anderi, guet chönne uswieche und irgendwenn denn isch d wendi cho. deht isch es denn grad e chli durue gange, was chraft koschtet hät. ehrlich gseit weiss i nüme, ob i deht s erschti mal de aschluss verlore gha han. jedefalls han ich mir deht vorgno, mindestens bis zu dem punkt dure z hebe, wo mir gstartet sind. a dere stell, wo mir vo de wende-schlaufe zrugg uf d strass vom hieweg cho sind isch denn grad recht action gsi: es isch liecht durabe gange und hät e rechts-links-kurvekombi beinhalted. just i dem moment wo mir deht dri fahret chunnt üs es chrankenauto entgege. das kein skater frontal dri isch, grenzt an es wunder. d s-kurve isch denn wieder e sach für sich gsi: die dütsche chönnd eifach kei kurve skate! trotzdem bin i eigentlich guet us de kurve use cho und han eigentlich d sach scho als erlediget erachtet. doch dem war nicht so: de vor mir, en basilisker, hät uf gä. ich han en moment überleit, ob i no sölle hett oder nid, denn isch es aber scho z spat gsi, d bei z schlecht und de biss wäg. mit em basilisk-skater bin i denn zrugg bliebe. di ander gruppe vor üs händ mir no relativ lang gseh, bald scho sind aber vo hine füf, sechs anderi skater cho. unter anderem nomal zwei vo basilisk und eine vo thun, aber nid thunliner. das isch er denn wohl erscht ab abig worde, das isch aber e anderi gschicht...

de nächsti teil vom renne isch denn de besti gsi: i dere achtergruppe händ mir en guete und glichmässige rythmus gha. d kilometer sind gfühlsmässig nur so verbiegfloge. wenn nid irgendwenn d straf für s vergässe vom tape cho wäri, hetti me sogar vo gnüsse rede chönne. so hät aber bald jede schritt weh tue. mit de ziit isch au gruppe denn wieder gwachse, wieteri opfer vom horrende tempo i de spitzegruppe sind am horizont uftaucht. unter anderem au d sandra und ganz gege de schluss no de "langi" urs, wo dur en sturz us de spitzegruppe grisse worde isch. so isch es mit de ziit nüme ganz e so ruhig und im stetige, gliche rythmus wieter gange und ich bin gar nid unglücklich gsi, wo d km tafle am strasserand immer wie höcheri nummere azeigt händ, die eine sind langsam gege 10, di andere gege 21 und di dritte gege 42 gange...

just am schluss han ich nomal schlechti bei gha. das isch natürlich chli schad gsi, so han ich überhaupt müm möge mitspurte. dezue bin ich denn au vom endi chli überrascht gsi. ich han, trotz km-tafle s gfühl gha, es müssti no chli wieter si, als es no gange isch. wo denn chli wieter vorne e so en boge uftaucht isch, han ich mich ernschthaft gfräged, ob de de letschti kilometer azeigt, bis ich checked han, dass das s ziel gsi isch...

fazit:
- e schöni, neui strecki. si z kenne hetti aber vorteil gha.
- en bessere start hett mi wohl länger i de spitzegruppe mitfahre la, aber bis is ziel hetti's chum glanged.
- und: mit enere bessere technik, hett ich jetzt kei blatere am ferse. ich weis jetzt au, wie ich mir di richtig abstoss-technik bibringe chönnti. aber uf di so sehr harti tour wott ich's glaub nid lerne.