24 heures du mans rollers

am fritig morge am 8i händ mir üs troffe für es ganz es neus abentür. mit me büsli mit platz für 9 lüt und me ahänger voll material isch es los gange: 760km autobahn händ mir under d räder gno. abgseh vo

mit händ üs für en zeltplatz relativ wiet "hine" entschiede. und chum deht gsi, sind au de dani (reinhart) und d nici cho, üsi betreuer und quasi gastgeber für di folgende knapp zwei täg. schnell sind zelt ufbaut worde. vier chlini zum schlafe, zwei grossi zum ässe. zwei fästbänk inklusive tisch sind üse wohnruum gsi. wo alles fertig gsi isch, sind mir no zäme go z'nacht ässe. das isch s wahre desaster vom wuchenendi gsi: über anderthalb stund sind zwüsched bstellig und esse serviere vergange. und d salät händs au vergässe...

denn de versuech nomal e nacht mit viel schlaf überzcho. nid ganz eifach. ich han im zelt zwar besser gschlafe als erwartet, aber d atmosphäre uf em zeltplatz hät scho erahne la, dass es nid alli so sportlich gsehnd wie mir viellich, und eher a me art open air uf rolle gsi sind.

am nächste morge hät's s erschte mal esse im "chez nici" gä. denn händ mir üs langsam parat gmacht. am 11i isch d rollerparade gsi, wo offiziell obligatorisch für all teilmehmer isch. das isch denn s nächschti volksfäscht uf rolle gsi! und die masse a lüt!? und s erschti mal di berüemti rennpiste vo nächem gseh, de rundkurs zwei mal abfahre, und zig föteli überall. unendlich viel iidrück i so churze ziit. wahnsinn.

denn isch es zrugg uf de zeltplatz gange. im handumdreie händ mir eis vo de beide partyzelt abbroche und üsi "stube" um d hälfti reduziert. de robert und ich händ das zelt mit enre liege und drü klappstühel zu de rennpiste bracht. am zeh vor eis sind mir deht gsi und händ üs id schlange gstellt. irgendwie isch mir bis hüt noni so ganz klar, warum gwüssi, chum isch tür ufgange, grennt sind, um di erschte i de box z sie. jedem team isch nämlich glich viel platz zur verfüegig gstande: acht quadratmeter. 10 teams sind jeweils i einere box gsi, me hät also no es bizeli de platz wähle chönne. nur, welles sind di guete plätz? mir händ üs für de zweitvordersti entschiede und sind mit dem z'friede gsi. s zelt händ mir vor de box ufgstellt, isch schlussendlich aber kein faktor gsi.

zrugg bim camping hät's z'mittag gä, während für di eine scho chli s renne los gange isch: de roman isch für üs um en guete startplatz gsprintet, aschlüssend sind no es paar as technical meeting. was deht verzählt worde isch, weiss i bis hüt noni.

uf di vieri sind mir denn alli ad strecki gange. d startläufer barfuess uf de eine siete vo de strass, ihri skates uf de andere. d tribüne und d boxegass voll vo betreuer und teamkamerade. e rechti gänsehuut-stimmig. und denn isch es los gange, punkt vieri isch d frankriechfahne gschwenkt worde. d tribüne hät bebt und d startläufer sind über d strass gseckled, händ ihri schuhe azoge und sind losgstürmt uf ihri erste mindestens zwei runde.

de zwei-runde-rythmus händ mir vorerst bibhalte. je nach skater händ mir ziite vo guet sibenehalb bis chli über zeh minute gha für die 4.1..km. mit zuenehmender renndur natürlich eher länger. so sind jedefalls all knapp 20 minute im isatz gstande und händ denn guet zwei stund pause gha. nach dem all emal en isatz gfahre sind, sind mir uf em monitor i de box a de 45. stell uftaucht. das hät denn emal es erschts ziel gä: under de erschte 50 bliebe.

nach dem alli zwei mal zwei runde gmacht gha händ, händ mir uf drü runde pro isatz umgstellt. so isch pause dur d nacht dur e chli länger gsi. si isch dennoch churz gsi, da de weg uf de zeltplatz no recht lang gsi isch, me deht zersch no ässe müesse hät und ja no chli schlafe agseit gsi wäri. ich han zwar i keinem vo mine drü versüech würklich gschlafe. aber immerhin drü mal für 3/4 bis ei stund anliege isch drinn gsi.

i de nacht isch d bahn belüchtet gsi, me hät bim skate erstuunlich guet gseh. und zum fahre isch es wunderbar gsi, wil schön chüel. ich han sogar eimal es langs liebli drunter azoge, obwohl's de tag dur hochsummerlichi temperature gha hät.

ab öppe em 8i am morge sind mir wieder uf chürzeri iisätz aber gange, sprich zwei runde. zwei drittel sind deht gschafft gsi, aber de längsti und härtischti teil isch üs no bevorgstande. d sunne isch wieder cho und hät herrlichsts badi-wetter bote. badi isch für üs aber wiet weg gsi. je länger s gange isch, desto meh hät sich s ganzi au in es richtigs renne verwandelt. d stiegig uf de "dunlop-hill" ue isch jedes mal härter worde, d bei händ brennt und de druck, "schnelli runde" z fahre isch gstiege: de monitor i de box hät üs immer wie wieter vorne azeigt: overall sind mir längstens i de 30er-plätz gsi, i de kategorie uf em 14. oder gar 13. platz. mit 3 runde vorsprung.

gege de schluss sind no einrundeiisätz planet gsi. no ein durchgang "zweier" isch abgmacht gsi, wo ich uf mini zweitletschte isatz gange bin. nach einere rundi hät mich am afang vo de wechselzone de jan usebeordered, e chli wieter vorne isch au scho de robert parat gsi. anschienend isch hät üse "gegner" die drü runde rückstand ufgholt und hät üs de 13. kategorierang welle strietig mache. darum isch entschide worde: nur no jewiels ei rundi und die vollgas. so hät s für mich leider nid di erhoffte 20 rundene gä, aber ein isatz isch no bliebe. no eimal i de bruethitz vo de nomittagssunne de berg, wo mir mittlerwile würklich wie en berg vorcho isch, ue, denn di langi abfahrt gnüsse, bis im flache nomal chli skate agseit gsi isch. uf de zielgerade, wo's scho wieder liecht ue gange isch nomal chli uf zäh biesse und denn s letschte bizeli chraft isetze zum de robert aschiebe.

denn han ich nur no zueluege chönne. nach dem di letschte isätz abgsproche worde sind, händ mir i de box bereits afange ufruume. das hät, han ich gfunde, chli d stimmig und au s gemeinsame erlebe vom schluss und s "mir händs gschafft" gfühl e chli gno. später sind mir aber alli froh drum gsi, dass das schnell erlediget gsi isch.

s renne isch aber noni fertig gsi. und au das hät komisch geendet. vor allem hät niemer so genau gwüsst, wenn bzw. wie's endet. dezue isch cho, dass mir no ei rundi später s letschti mal wechsle hetted chönne. s endi vom renne isch so definiert: wenn de, bzw. die mannschaft mit de meiste rundene s erschti mal nach 24h dur s ziel fahrt, isch fertig. im konkrete fall isch de powerslide-skater churz vor 24:00 nomal dur s ziel. üse letschti fahrer aber isch bi 24 stund und öppis cho und hät denkt, er seigi fertig. dem war aber nicht so, die rundi hät no voll zählt. und wil mir das nid gwüsst händ, üsi direkti konkurenz aber scho, händ mir am schluss de 13. platz doch wieder verlore. mit dem unwüsse sind mir aber nid di einzige gsi. de speaker hät i dene minute zwüsched 24:00 und de endgültige zieldurchfahrt vom yan guyader unermüdlich "encore une tour" müesse verkünde, wil di ganz ziit jubelndi, sich im ziel wähnendi skater cho sind.

nach dem d chips zruggbracht, d liebli abgholt, d box gruumt, üses zeltdorf uf es minimum abbaut gsi isch und mir dusched händ, sind mir emal no go städli le mans erkunde. bi dem herrliche summerwetter hät sich's geradezue abote, uf me ruhige platz under en sunneschirm z sitze und es chüels bier (cola) z trinke. aschlüssend hät's für di meiste e pizza oder es rechts stuck fleisch gä, nach all dene pasta und röschti i de letschte zwei täg. zrugg uf em camping-platz händ mir bis es z dunkel gsi isch no frisbee gspielt und vie, viel glacht. trotz wenig alkohol isch d stimmig liecht "agheitered" gsi, wohl dank em wenige schlaf.

bereits am sechsi am morge isch es uf de zruggwäg gange. s auto hät schliesslich am 6i am abig wieder z züri si müesse. das händ mir au gschafft. am halbi füfi sind alli wieder i di verschiedene himmelsrichtige verschwunde und s gemeinsami abentür hät geendet.

statistik:
mir sind 24:12:30.813 skatet.
händ's i dere ziit 166 rundene gmacht,
was 694.7 km entspricht
und en schnitt vo 28.7km/h ergit.
"over all" sind mir 35. worde.
i de kategorie "general" 14.
ebefalls vor üs sind 9 "seniore", drü frauemannschafte und 7 (männlichi) 5er-teams.