rollserie niederbipp

endlich isch es wieder los gange. endlich? naja nach em ewige schlechte wetter und me starche "undertraining" han ich s renne nid eso herbeigesehnt.

rege isch denn au s meh oder weniger grosse thema gsi. chunnt er, oder nid? er isch no cho, aber scho recht frühe. es isch glich alles nass gsi. und scho fasch wieder troche. obwohl's weh tue hät, nur d "schönwettergarnitur" mit de "guete chugellager" debi z ha, isch es viellich au guet gsi. es hät mir s hin- und her erspart.

für eimal relativ guet iglaufe, isch es pünktlich los gange. betont defensiv. ich han mich an markus ghalte, wo hüt nid so fit gsi isch. susch hett ich das mit sinere jetzige form nid gwagt. nach paar hundert meter hät sich es loch vor üs uftue und ich bin ganz z'friede gsi. es hät sich e gruppe vo viellich 10 skater bildet. i dere isch es mir eigentlich recht wohl gsi. di erschti rundi isch zwar recht schnell gsi, das hät sich denn gändered. isch zwar nid so spannend aber ok gsi.

gege s endi vo de zweite rundi isch denn nomal en chline regesprutz cho. nur en chline, aber er hät glanged. mir sind genau anere stell gsi, wo d strass, mindestens mit mine redli, super-rutschig gsi isch. es paar sind just deht wäg. es isch mir sofort klar gsi, dass ich mit müsst. aber ich han uf em rutschige belag eifach nid beschleunige chönne. das isch denn au d entscheidig gsi. a dere stell isch d gruppe denn usenand gheit. zu dene, wo nach vorne wäg sind, sind es paar cho, wo hine abgfalle sind. überig bliebe isch es vierergrüppli mit em kurt, eme vereinskolleg und no einem. de eini isch denn später mit enere frau wo üs überholt hät, wäg gfahre. defür händ mir eine vo de ursprüngliche usriesser wieder gholt. was mi nid überrascht hät. s tempo isch fortan vom kurt sinere pulsuhr diktiert worde, was für mich nid herusfordernd aber au nid langwielig gsi isch.