d spannig und d vorfreud isch gross gsi, s wetter bestens und di vier gladiatore in form. es isch irgendwie allne klar gsi, en neue rekord muss ane! de ander isch immerhin scho drü jahr alt.
churz vor em zehni isch es los gange. mit guetem tempo em seh nah durue. in reih und glied, fliessigi wechsel und mehrheitlich guete asphalt händ immer wieder tempi jensiets vom 30er zuelah. di chline hügel vor rappi sind wie im flug verbie gange, i de abfahrt in richtig städtli händ mir mit me 42er d spitzengeschwindigkeit erreicht.s päuseli isch churz usgfalle, chum eine hät bis deht hie drunke. bald sind mir uf em seedamm gsi und händ di "ander" seesiete in agriff gno. s tempo isch wieterhin flüssig gsi, d wechsel händ aber afange weniger regelmässig werde. gege horge hät s gemötzle über dies und das uf de hindere positione afange zuenäh, vorne isch fliessig tempo gmacht worde. z horge sind mir scho am fährestäg verbie und somit über de hälfti gsi, wo plötzlich e unliebsami pause nötig worde isch: es polizeiauto überholt, und halted churz vor üs, mir händ abrupt müesse brämse. nach me dumme spruch ("sind ihr chli usser atem?") händ üs di uniformierte herre erklärt, uf de strass fahre isch verbotte (wer hätte das gedacht). e azeig hetti fahruswiesentzug zur folg und so wieter. üs allne isch nur eis dur de chopf gange: "shit, de rekord isch wäg!" nach dem si üs wieterfahre lah ("uf em trottoir und mit de nötige vorsicht!"), hät me d verunsicherig gspürt. chömmed's nomal go "kontrolliere"? sölled mir jetzt uf em trottoir fahre? gaht meistens gar nid wil z schmal und us üsere sicht z gfährlich. was, wenn eine ohni luege us sinem gartetürli chunnt? je länger desto meh sind mir uf de strass gfahre. "sicher" han ich mich ehrlich gseit aber erscht nach züri gfühlt.
am bellevue hät d uhr 1:55 azeigt. eigentlich genial! 3min schneller als 2009. trotzdem han ich s gfühl gha, de glaube, unter 1:26 z schaffe isch chli weg gsi. d wahl vo de seefeldstrass han ich au als falsch agluegt, defür isch de holperbelag z zollike schneller verbie gange als au scho...
gfühlsmässig hät s tempo nach ehrlebach eher ab als zuegno. au han ich deht s gfühl gha, wär's für mich no schneller gange. d pulsuhrdate bestätiged das zwar überhaupt nid und fairerwies muess me säge, händ ab züri nur no de jan und de matthias gfühert.
z feldmeile nomal en chline schock, polzei uf de andere strassesiete isch aber zu sehr mit me suv-fahrer beschäftiged gsi, um üs i ihrem rugge z bemerke. und denn isch es gschafft gsi! schlussendlich händ mir vo de drü minute vorsprung no eini is ziel gretted. mit 1:25:22 (brutto) sind mir am schluss z'friede gsi. ohni polizei und mit eme schnellere schlussspurt wäri sicher no e minute oder zwei meh drinne gläge. aber so bliebed no ziel für di nächste jahr.
Und wenn Matthias das nächste Mal das ITL-Dress trägt, werden wir nochmals schneller sein!