berlin marathon 2013

guet gluunt aber mit chli wenig schlaf isch es an start vom 40. berlin marathon gange. für mich isch es de siebti start gsi. de füfti bi schönem wetter.

bim ifahre isch dezwüsche en chüele wind gange und ich bin nid immer sicher gsi, ob d wahl "churzärmlig" di richtigi isch. aber wo mir denn im startblock gstande sind, hät d sunne gschunne und es isch warm gsi. bald scho isch temperatur keis thema me gsi. top athlete sind los und mir ad startlinie vorgruckt. hells bells erklunge, und de count down glaufe. the same procedure as every year.

denn isch es los gange. bin recht wiet hine gstartet, hät de vorteil gha, dass i scho uf de erschte meter han überhole chönne. nach de siegessüüle, wo di beide fahrspure zäme cho sind, di erschti heikli stell. einigi skater händ sich am bode wieder gfunde. zum glück keine so churz vor mir, dass i nid uswieche hetti chönne.

mit de ziit sind positione chli bezoge gsi, de markus und de roman han i immer wieder gseh. de versuech, üs drü zäme z bringe und so es "ITL-team" z mache, isch aber nie erfolgriech worde. zu gross d masse vom feld, zu viel verschiebige innerhalb. je nach dem, wenn d strass breit gsi isch und sich alli skater chli verteilt händ, han i gseh, dass mir no immer "vorne" debi sind und vor dere gruppe d strass leer gsi isch. wenn sich s feld dezwüsche wieder id längi zoge hät, bin i eifach eine irgendwo i me grosse huufe vo skater gsi.

irgendwenn rüefed d lüt "matte", isch wohl öppe halbmarathon gsi. zwüscheziit isch chli enttüschend gsi, für das, dass ich teil vo de breitesport-spitze gsi bin. aber mir egal, s ziel isch gsi, mit dene is ziel z cho. und das isch recht easy gange. es hät wenigi moment gä, i dene ich uf zäh bisse han müesse. di grössti gfahr isch vo stürz us gange. die sind aber meistens recht wiet wäg vo mir gsi. eimal isch es knapp worde, plötzlich stönd so rotwiessi töggeli vor mir. ich han grad no s rechte bei lupfe chönne. einbeinig isch es drüber und dra verbi gange. es sind no meh töggel cho und sie händ letschtendlich e strasseverengig akündet. de hinter mir hät d situation nid gmeistered. für mich isch es nur zunere ungewollte show-iilag worde. glück? oder könne? uf jede fall guet für's selbstvertraue.

nach dem mir mit über me 40er am kilometer 30 verbi grauscht sind, und ich mich wie jedes jahr gfräged han, warum's eigentlich immer a de schnellste stell wasserbecherli abgä probiered, isch s ziel denn mit grosse schritt nächer cho. em schmale teil entlang vom fluss, aschlüssend en mini(!)-ufstieg, d linkskurve und scho gaht's uf de podsamer platz zue. jetzt nur nüt me abrenne la, uf de verbliebende 4km. isch im nachhinein viellich di falschi taktik gsi, wil deht s letschti mal s feld zämedruckt worde isch und s nomal w glägeheit gä hetti, zum chli füre fahre. denn, zwei linkskurve, i dene sich s feld scho wieder recht id längi zoge hät. jetzt eifach dra bliebe! rechts ume, am markus verbi und wieder links und scho sind mir "unter den linden" gsi. wieviel gas chann i no resp. scho gä? uf dem letschte stuck bin i bi minem erschte berlin-marathon mal no jämmerlich igange. das erlebnis chunnt jedes jahr a dere stell füre. irgendwenn, vor oder nach em brandenburger tor(?), seit e bekannti stimm hinter mir "ziesch hüt au no". das hät mir sämtlichi entscheidige abgno. ab deht vollgas! naja, voll isch immer relativ, bei hetted wohl no meh her gä, aber denn hett i recht slalom fahre müesse, i dem massesprint. d risikobereitschaft, mis bisher klar besti berlin-resultst no buechstäblich uf de zielgerade kapputt z mache, isch beschränkt gsi. immerhin bliebt so no es bizeli "room for improvement" für s nächsti jahr.