SIC Zürich 2008

nach de weniger berauschende trainigs vo de letschte ziit, uf die ich da nid genauer iga möchti, isch d motivation für s hütige renne nur mittelmäsig gross gsi. de start isch aber nie in frag gstande.

han mich bemühed, mich recht uf z wärme vor em renne, da ich ja nid eso de schnellstarter bin. guet füf kilometer, zum teil zügig gfahre, damit ich mini bei scho es ersts mal gspürt han. denn häts no glückwünsch vom matthias (danke, und überigens bruchi no immer dini chugellager!) gä. es hät also nüt schief ga chönne...

denn isch es los gange. am start hani mi chli verlore gfühlt, wili niemert bekannts gseh han, wo öppe ähnlich starch isch. churz nach em start, glaube bi de erschte wendi am zürihorn han ich de erwin troffe, eine vo üsne zwei clubseniore. das isch nid abschätzig gmeint! wenn ich mit 60i no uf dem niveau skate wirde, wird ich sacke stolz uf mich si! aber jetzt bini noni emal ganz halb so alt. für hüt hani aber denk, isch er sicher en guete pacemaker. so bini denn bi ihm bliebe. mir sind recht wiet hine anere grosse gruppe gsi. ich bin meisten hinter ihm gsi, wil ich gwüsst han, dass er mega angscht vor em umgheie hät. ich han mich am afang gar nid sicher uf de rolle gfühlt und han uf kein fall welle a me sturz vo ihm (mit)schuld si.

d gruppe isch für mich ganz okay gsi. es hät zwar ziitewies mega ghandorgeled. hüt isch mir das aber glich gsi. wenn me dezwüsched au wieder richtig usruebe chann, isch mir das au ganz recht. ich chann mich no guet churz am rieme risse, wenn s nacher au wieder richtigi erholig git. nur nach de erschte rundi, wo s vo de quaibrugg abe e miniabfahrt hät, händ s mi fasch abghänkt. deht hani recht gflueched und scho fasch welle ufgäh. han zu mir gseit, dass das hüt s letschti renne vo dere saison gsi seig.

d wendi isch denn ziemlich genau zwei runde später cho. iguana hät s wieder emal nid für nötig ghalte üs unterwegs z drinke z gä. mini vereinsgspänli händ da aber usgholfe. am schluss vo de dritte rundi, vor de quaibrugg, wo s liecht durue gaht, sind de markus als vorakünder, de franco und d sonja mit fläsche für de erwin und mich, parat gstande. zum die übercho, händ mir us de gruppe use müesse. zum de aschluss nid z verpasse, han ich en zwüschespurt higleit. d fläsche vo de sonja packt und wieder id gruppe zrugg welle. zum an ursprüngliche platz zrugg z cho, hett ich mich jetzt aber recht zruggfalle la müesse. ich han mich denn churzum entschiede, de schwung us z nütze und bin öppe a di füfti stell füre gfahre. de adrenalinstoss und energieafall hät denn grad alles sofort verändered: vo deht a isch es e rundi lang fasch vo ällei gange, au deht, wo ich han müesse d füherig übernä.

gege s endi vo de rundi sind no es paar anderi ad spitze gfahre. das hät zwar mini usgangsposition für de schlussspurt verschlechtered, defür aber windschatte bis am schluss garantiert.

ziemlich genau deht, wo ich uf de erste rundi mühe gha han, hani denn au am schluss nomal bisse müesse. aber so churz vor em ziel isch denn nüme as ufgäh z denke gsi. anschienend hät sich d gruppe no teilt, aber das han ich nid mitübercho. das hät mir denn de erwin im ziel verzählt. er hät s pech gha, deht i de hintere gruppe gsi z sie. teilt heig sich d gruppe am alonzo. mit dem han ich welle am schluss um d ehr spurte. aber ich han ihn denn nüme gseh, wohl darum. :-)

nach em renne sind d strapaze schnell vergässe gsi. jedefalls überleg ich mir scho wieder, ob ich nid doch no uf biel well... ziit isch zwar nid grad de hammer, aber a das han ich mich mittlerwiele gwöhnt. nächscht jahr wirds sicher wieder besser. wenn ich mich denn as schaffe gwöhnt han, wird sicher wieder meh ziit und energie fürs skate überig sie.

amerkig zu de resultat: es wieters müsterli vo de iguana-organisationskunst: d teams sind denn plötzlich über füf runde gfahre, und somit mit de breitesportkategorie nüme z vergliche gsi... so tüsched rang und ziit massiv im verglich mit de andere jahre, wil s das jahr ohni d elite grechnet sind!