berlin, 24. bis 28. september 2008

min dritte bsuech in berlin isch de erschti ohni räge gsi!

mittwuch
nach ziemlich genau füf stund sind mir churz vor mitternacht z berlin a de schievertstrasse 19 acho. mir wohned im gliche huus, aber eme andere apartment, wie s letschti jahr. dass mir da inere weltstadt und nüme i de provinz-schwiiz sind, händ mir aber scho gmerkt: au am halbi 12i z'nacht händ d läde no offe und üs öppis z'nacht verchauft.

dunnstig
nach me usfüerliche z'morge i de beckerei grad uf de andere strassesiete vo üsem apartment sind mir zersch an Gendarmenmarkt gfahre. deht stönd de dütschi und de französischi dom. dezwüsched isch d Konzerthalle. de platz mit dene drü baute zäme isch würkli sehenswert. wenns chli wärmer isch, lohnt sich s bestimmt au i einem vo de vielne kaffis deht ä pause i z lege. mir sind aber wieter, i d Friedrichstadtpassagen. das sind drü ichaufskomplex a de friedrichstrass. vor allem s mittlere vo dene drü unterirdisch verbundene gebäude treit stark dezue bi, dass d friedeichstrass hüt wieder zu de exklusivste ichaufsmeile vo berlin zählt: im zentrum hät s e schöni, gschwungni stäge mit goldigem gländer, de bode isch us marmor und d läde rundume sind gucci, prada und co.

am Kurfürstendamm, de zweite grosse ichaufsmeile vo berlin, hät üs de zweiti weltchrieg wieder ihgolt. d Kaiser-Wilhelm-Gedächtniskirche isch en idrückliche züge und es idringlichs mahnmal.

wesentlich fröhlicher isch es denn im berliner in-viertel Kreuzberg zue und her gange. mir sind deht dur d Bergmannstrasse(?) flaniert. die isch bekannt für ihri viele chline lädeli und kaffis, ähnlich em niederdorf z züri. i so me kaffi händ mir denn au halt gmacht.

denn isch no s dütschi jüdische museum dra gsi. mir hät s ohnehin nid so viel gseit. aber i dene anderthalb stund wo mir no ziit gha händ bis zur schlüssig, händ mir grad emal eis vo drü stockwerk aluege chönne...

fritig
wärend d olivia s olympiastadion go aluege isch, bin ich ad Berlin Vital go mini startnummere hole. das isch en mega kampf gsi, es hät sooo viel lüt gha!

bim Schloss Charlottenburg händ mir üs wieder verabredet gha. wil ich de olivia ihres sms z spat gseh han, han ich s alti schloss agluegt, wärend si im neue flügel gsi isch...

nacher hät s aber klapped mit em treffe und mir händ zäme chönne dur de grandiosi schlosspark spaziere, de lüt bim entli füettere zueluege und s Schloss Bellvedere bestuune.

denn sind mir an Alexanderplatz gfahre und händ üs 9.50 euro us de täsche zie la, zum uf de Fernsehturm ue z fahre. defür händ mir denn vo 203 meter obe abe uf berlin ide dämmerig und berlin by night gluege chönne.

samschtig
wärend d olivia go shoppe gsi isch, bin ich de marathon skated. damit d reise-freaks sich nid müend mit sportlichem abgä, und umgekehrt, isch das i me eignige bricht fest ghalte. und zwar da!

sunntig
da händ mir müesse packe und zrugg flüge. es isch nüme alles so riebiglos gange, wie uf em hiewäg. de flüger hät verspätig gha, und zrugg reise isch ja sowieso nie lässig. am halbi vieri bini di hei gsi, es wäri schönstes inline-wetter und de slow-up vor de huustür gsi. es hetti es herrlichs usfahre gä. aber leider isch uspacke und no züg erledige uf em programm gstande.