once again. and once again faster!

wem bringt 13 unglück? hand hoch! und wem bringt s glück? mir! jedefalls i minem

zum 13te mal han ich mich also uf de weg rund um de zürisee gmacht. rechtziitig dezue bin ich in hochform cho. di neue skates, resp. di neue, grosse rädli bringed s würklich! aber au langi trainings. uf einere vo dene 70 bis 100km lange usfahrte han ich mal folgendi berechnig agstellt: 2 stund bruched mir für s 50km langi achti um de griefesse, über egg, mönchaltdorf, gossau wetzige und uster. zudem enthalted die tour no zwei heftigi stiegige. di folgendi griefeseerundi hät sich au i 41 minute mache la. was denn 2:40 für öppe 5km und gfühlt hunderti vo höhemeter meh als d rundi um de zürisee git. so müssti doch de zürisee i 2:30 z schaffe si, oder!?

de jan isch offesichtlich au dere meinig gsi. er hät üs, de roman, de markus und mich, scho bim parat mache so sehr pusht, dass mir fasch e viertel stund frühner als planet los fahre händ chönne. es schient üs aber au di nötigi agressivität gä z ha, zum vo afang a mit vollgas i das renne stiege z chönne. das mal isch es würklich es renne gsi!

trotz em hoche starttempo händ mir aber uf de erschte kilometer au di herrlichi summernacht chönne gnüsse. de landschaftlichi höhepunkt vo dem event isch jewiels zweifelsohne zwüsched üerike und feldbach, wo d seestrass direkt am see verbie gaht. so chann me buechstäblich us de erschte reihe de vollmond und d liechtli vom seedam im wasser spiegle gseh.

nach 36 minute sind mir z rappi acho. di erschte "bergpriese" sind scho gmeistered gsi und d luune no allsiets hervorragend. agspornt vo de guete ziit händ mir üsi fläsche so schnell wie möglich unter de wasserhane ghebed und sind direkt wieter gfahre. nach dem mir de seedam gmeistered händ und de müesahmi abschnitt dur schwyz mit enere wietere bergpries-wertig und hupende autofahrer hinter üs gsi isch, händ mir so gege richterswil di ruhigere strasseverhältnis gnosse und zum verpflege gnutzt famerstängel und energieriegel sind hindere und füre greicht worde. für jede hät s en biss gä. s erschti mal hät sich üses gueti team-work zeigt.

uf de folgende strasseabschnitt ohni liecht hät de roman, üse "meister-lampe", mit em mond um d wett gstrahled und für fahrbari verhältnis gsorged. als nette nebedeffekt händ mir e gueti usred gha, zum länger als bim normale wechselrythmus vom roman, eme berg vo me ma, sin windschatte z gnüsse. denn händ mir wieder z horge en berg bezwinge müesse. de verdienti lohn isch e neuerlichi super zwüscheziit gsi: 1:22. chann mich nid erinnere, unter 90 minute horge erreicht z ha.

während mir mit horrendem tempo wieter richtig züri grased sind, hät bim markus wohl definitiv igsetzt gha. er hät zwüscheziitlich emal afange flueche ich han mich aber no guet gfühlt und ziemlich lang gfüerd. i de stadt ine hät denn de jan d rolle vom kapitän überno und e super ideallinie gfunde. am bellevue händ mir üs sofort uf di beide vorhandene brüne verteilt um d fläsche möglichscht schnell z fülle. jetzt hetted nach minerer griefesee-rechnig öppe 2 stund ume si müesse, han nämlich d strecki bis uf züri öppe mit em 50km-achti vergliche. mir händ allerdings denn d baustell zwüsched stadelhofe und operehuus bereits gmeistered gha und sind längstens wieder ihm rugere fahrwasser vo de dufourstrass skated, wo d uhr 2 stund azeigt hät. das müssti doch lange, zum unter 2:30 z cho...

im tüfebrunne sind mir a verdutzte bsuecher vom "kino am see" verbigrollt, denn händ mir üs über de schlechtischti strassebelag i de riechste gmeind vo de ganze rundfahrt ufgregt und denn hät s nur no eis gä: tempo, tempo tempo! bald sind d positione fix vergä gsi. de roman und ich händ abwechsligswies füerigsarbeit gmacht, de jan isch hinter em markus gfahre und hät ihn wohl ziitewies no chli agschobe, wärend de wiederum wohl still vor sich higlitte hät. aber er hät dure- und mitghalte. chapeaux!!

je nächer mir a meile cho sind, desto schneller sind mir wohl gfahre, aber au dütlicher sind d stärcheverhältnis worde. mir händ jetzt jedefalls d bei au brennt und ich bin froh gsi, wenn de roman amig vor mir gsi isch. er sienersiet isch aber jewiels aktiv vo z'hinderst füre gfahre, zum mit windschatte z gä, und denn wieder hindere gange, sich go "usruebe". am schluss hät er mich sogar no chli gstosse. (wieso eigentlich, roman? häsch mir d "ehr" vom als erschte über d ziellinie fahre zue ha?). so hät jede nomal das gä wo er chönne hät und em team am meiste bracht hät.

z erlebach hät de jan "no 15minute" verkündet, de einzigi moment, wo ich zwiefel gha han, das es lange chönnti. bim bahnohf feldmeile sind s no 10 minute gsi. ich han gwüsst, dass me vo deht us aber weniger als 10minute hät. und mit dem tempo wo mir das jahr druf gha händ, erscht recht. mir sind scho z feldmeile gsi, wo en chline stolperer und en fast-sturz üs us de bahn z werfe droht hät. viellicht hät s aber au de nötigi adrenalinschub gä, zum vo deht us en lang zogne schlussspurt bis an fährestäg z mache.

mit vollgas sind mir in warteruum am fähresteg igfahre. alli händ deht mehreri runde usfahre la müesse. d uhre sind bi 2:26 stah bliebe, d freud und d gnuegtuig isch id gsichter gschriebe gsi. und s highlight vom abig isch üs ja no bevor gstande: s schuhe abzie...

nach me bad im see, für di eine uf jede fall, händ mir die super nacht, mit optimalem wetter, lässige lüt, super team-spirit und sensationeller ziit no chli gfiired. bier, salzstängel, später süesses, und de usblick uf de see und di anderi (endlosi erschienendi) seesiete händ de puls wieder abe cho und d z'friedeheit würke lah.

ich chann s gschaffte no immer chum glaube. au jetzt, 48h später, han ich mini uhr nonig wieder uf "null" zrugg gstellt. s wohl einzige negative a dem abig isch, dass er chum meh z toppe si wird. oder doch?