berlin, 18. bis 21. september 2009

au 2009 sind mir nach berlin greist zum am marathon z skate. debi han ich berlin bim bisher beste wetter erlebe dörfe.

dunnschtig, 17.9.09
am abig am halbi 8i han ich de jan und De markus z züri im HB troffe. zäme sind mir uf de nachtzug uf berlin. nach me bsuech vo de zug-bar, i dere üs de jan amüsanti stories us sinere jugend verzählt hät, sind mir uf d britsche gläge. bsunders guet gschlafe händ mir aber nid uf dene wackeldne dinger. so sind mir denn am morge am 6i mit chline äugli wieder unter de decki füre kroche.

fritig, 18.9.09
am morga am viertel ab 7i sind mir z berlin im hauptbahnhof acho. nach dem mit deht e chli ratlos umegirrt sind, händ mir üs nahvercherstickets bsorgt und sind uf d suechi nach üserer wohnig. die händ mir halbi 9i gfunde gha und händ denn deht uf de erwin gwarted, wo mit em flüger cho isch.

nach dem s quartett komplett gsi isch, sind mir uf de weg richtig flughafe tempelhof. z fuess. wil d mess erscht am 12i ufgmacht hät, sind mir vorher no i de nächi vom "Platz der Luftbrücke" go z'mittag ässe.

de umfunktionierti flughafe us de nazi-ziit isch es recht speziells erlebnis gsi. zersch quert me d Halle mit de ehemalige check-in-schalter und nach langem laufe chunnt me uf di ehemalige rollfelder abe. deht isch s inline-village gsi. d läufer-mess und d startnummere-usgab sind i me ehemalige hangarp gsi. de bsuech isch eher asträngend gsi: millione lüt, zig flyer wo me abwimmle hät müesse und langi schlangene bi de nummereusgab. wo mir denn mit sack und pack und neue rolle us em sonderangebot wieder dusse gstande sind, isch schnell klar gsi: zrugg gaht's mir öv.

nach dem mir üsi inline- und rennuntensilie i de wohnig abgleit händ, sind mir no uf e chlini sightseeing-tour. vom potsdamer platz us sind mir dur s regierigsviertel i s museum "Mythos Germania" spaziert. deht händ mir üs über di grössewahnsinnige bauplän vom hitler und em speer informiert. vieles wäri gar nid machbar gsi, da de untergrund uf dem baut werde sölle hetti z'wenig stabil gsi isch.

aschlüssend sind mir am brandenburger tor und em reichstag verbie glaufe, wo d vorbereitige für de marathon voll im gang gsi sind. nach de inspektion vom startgländ sind mir dur de tierpark zrugg an potsdamer platz. im sony center händ mir i me resti z'nacht gässe und sind denn mit de u-bahn zrugg a d kurfürstenstrasse. um d huusecke händ mir i me türkische(?) kaffi de abig usklinge la.

samstig, 19.9.09
de tag isch ganz im zeiche vom renne gstande. de jan und ich händ bis öppe am halbi 11i usgschlafe, während de erwin und de markus go z'morge ässe sind. denn sind di erschte vorbereitige troffe worde: s benötigte material händ mir i de wohnig usbreited, d redli bi de skates no gwechslet wo nötig, d notfalladresse bi de startnummere usgfüllt und alles nomal kontrolliert. denn sind mir mit de u-bahn an wittenbergplatz gfahre und im oberste stock vom KaDeWe go z'mittag ässe.

am halbi zwei sind mir zrug i de wohnig gsi und händ üs afange uf s renne vorbereite. mir sind denn grad mit de skates vo de wohnig us an start. bim igang zum startgländ händ mir de roman troffe. de paul und de franco sind nid uftaucht. so hät s halt es reduzierts gruppeföteli "davor" gä. im gländ inne händ mir beidi troffe und irgendwo han ich denn alli andere wieder verlore. so bin ich denn ällei an start.

ich bin z forderst im startblock C gstande und au als erschte deht use. di ganzi strasse des 17. juni und d siegessüle vor mir. genau so han ich mir das vorgstellt. plötzlich rüefti öppert "dani"! ich luege übere, uf de andere strassehälfti i de genau gliche positionen wie ich sinkt mir de franz...

nach de siegessüle han ich mich a de spitze ablöse la. viellich hät ich das scho vorher mache sölle. jedefalls han ich mich deht scho chli wiet zrugg falle la. wil d strass bodewelle gha hät, isch es aber au schwer gsi zum istiege. jedefalls bin ich denn scho bald nüme a de spitze gsi, was s ursprüngliche ziel gsi isch und wohl au nötig gsi wäri zum dütlich unter 1:23, am liebste unter 1:20 z fahre. es isch aber no schlimmer cho. nach öppe 4 kilometer han ich mir wohl sälber bi me möchte-gerne-double-push-schritt ighänkt und bin bruchteili vo sekunde später uf en berliner asphalt gläge. wie s genau gange isch han ich nid mitübercho, aber ich han glück gha: mir hät s nüt gmacht. s dress isch chli dreckig worde und hät es chlises löchli übercho. ich hetti aber für di nächst saison sowieso es neus brucht. de rechti schuhe isch aber recht starch in mitleideschaft zoge worde. das han ich aber erst später, bim abzie, genau gno, gmerkt. ich bin sofort wieder ufgstande und de nächste gruppe nahgrennt. i dere han ich nämlich de markus gseh. s renne isch aber im nachhinein betrachted deht glaufe gsi. die gruppe hät nid s vo mir gwünschti tempo druf gha und us dere gruppe use cho isch nüme möglich gsi. ich han mehreri aläuf gno, aber es hät nüt gfruchted. jedes mal wenn ich wieder es paar positone füre gfahre bin, wobi mir da nid vo füf bis zäh redet, sondern vo 20, 30 oder no meh, und ich mich wieder igreiht gha han, isch es es wili gange und es hät gmacht "wuuuuuusch" und links oder rechts isch e gruppe verbie und plötzlich isch amig de markus wieder vor mir gsi...

de letschti sotigi versuech han ich nach öppe 30 km unterno. deht han ich s sogar gschafft d gruppe z verla und in e gruppe wieter vorne z cho, wo zu dem ziitpunkt öppe 20 meter vorsprung gha hät. aber alles hät nüt gnützt. au deht händ s üs wieder igholt gha...

so hät im ziel kei grossi zfriedeheit gherrscht. defür händ mir s gschafft, e kompletti gruppefoti "danach" z mache.

nach dem mir zrugg zu de wohnig skated sind, hät priesfrag gheisse, wer meistered die 74 stägetritt am lockerste. au deht hät de jan klar gunne. s iPhone hät denn mini entüschig komplet gmacht: s SMS wo uf mich gwarted hät, hät e laufziit vo 1:25.15 verkündert. zwei minute langsamer statt schneller wie s letschti jahr, de schnitt unter 30km/h.

nach enere erfrischende duschi sind mir an bahnhof friedrichstrasse und deht i s gliche resti go z'nacht ässe wie s letschte jahr. de roman, de franco und d andrea sind au cho. nach enere feine pizza sind mir no, au wie s letschti jahr, go dessert ässe und de fruscht mit me cuba libre abespüele.

sunntig, 20.9.09
am sunntig morge bin ich zwar scho wach gsi, wo de markus und de erwin sind go z'morge ässe, aber noni so unternehmigluschtig, geschweige denn parat. so sind s ohni mich los zoge und ich bin de tag ruhig agange. trotzdem hät s aber no glanged, zum de haile gebresselasie am km 37, wo praktisch vo üserer huustür gsi isch, live verbiespurte z gseh. unglaublich das tempo! und mindestens so unglaublich das publikum, wo nid näbed de strass, sondern uf de strass, am liebste uf de blau izeichnete idealline gstande isch!

no vor em 12i sind mir denn alli vier mit sack und pack uf de weg. am hauptbahnhof händ mir s gepäck igstellt und es sandwich vertruckt. de erwin, de markus und ich sind denn uf e boot-sightseeing-tour, wärend de jan nomal e architekturusstellig go aluege isch.

nach de bootsfahrt uf de spree händ mir üs vom erwin verbaschiedet. er hät denn langsam wieder uf de flughafe müesse. de markus und ich händ no de letschte und allerletschte marathonläufer zuegluegt, wie s is ziel gumpled, gkroche, spatziert oder gwalkt sind. zum teil truurigi bilder gsi. aber si händ s ziel erreicht! das im gegesatz zum markus und mir: mir händ nämlich am halbi 5i bim olympiastadion mit em jan abgmacht gha. wägem reduzierte s-bahn-vercher und de enorm viele lüt sind mir fasch e halbstund z spat cho. trotzdem hät s no problemlos es gratisbillet im tusch gege d startnummere gä. und im halbleere olympia stadion hät s au no gnüegend gueti plätz i üsem sektor gha. s "fuessballerlebnis bundesliga" isch tendenziell eher entüschend gsi. s gekicke wo de letscht gege de zweitletscht bote händ, isch wohl chum viel über em super league niveau gsi. herta isch zudem sang- und klanglos 0:4 unter gange...

zum schluss hät s denn im bahnhof berlin i me resti no "Pommes - Currywurst" gä. am 22:22 isch denn de nachtzug zrugg uf züri gfahre.