köln, 2. bis 4. oktober 2009

e wieteri verregneti usland-premiere: nach berlin isch au min erschte köln marathon viel füecht und wenig fröhlich gsi.

fritig, 2. oktober 2009
am mittag am 12i isch s letschti abentür vo de inline saison 2009 los gange. de zug richtig mannheim isch no leer gsi und de jan, de matthias und ich händ üsi reserviete plätz eifach gfunde. lang isch es gmüetlich gsi uf de fahrt. mir händ üs mit läse vo reisefüerer und paper und natürlich mit plaudere unterhalte.

erscht bim umstiege in mannheim. händ mir gmerkt, wieviel lüt mittlerwile uf em zug gsi sind. im zug vo mannheim nach köln isch es en rechte kampf gsi, bis mir bi üsne plätz gsi sind. und deht sind mir echt froh gsi um d reservation. nid wenigi händ müesse stah.

am 5i sind mir in köln acho. starch bewölkt und recht chüel hät üs die stadt empfange. z fuess sind mir denn über d "Hohenzollerbrücke", e sehenswürdigkeit(?) vo dere stadt. da üs die brugg ?direkt is messegländ gfühert hät, händ mir üs entschiede, direkt go d startnummere abhole.

de weg is hotel hät sich denn nid grad als eifach use gstellt. aber nach me grössere umweg sind mir denn im radisson acho. gmüetlich händ mir s üs deht aber nid gmacht. de hunger hät üs wieder i d stadt triebe. i de u-bahn hät üs eine mit hund und bierfläsche i de hand de tipp gäh, gar keis ticket z löse, es kontrollieri sowieso niemert. au en restaurant-tip hät er üs no gha: "der Bieresel". wäri au im reisefüerer gsi. deht hät s richtig kölschs esse gä.

samschtig, 3. oktober 2009
de tag hät gmüetlich mit me usgibige brunch agfange. s buffet i üsem 4-sterne hotel laht würklich kei wünsch offe. gstärcht sind mir denn uf erkundigstour. zersch sind mir zum stadion, wo mir vo üsem zimmer us gsehnd. leider isch das aber zue gsi. si händ für e anderi verastaltig grad umbaue. eine hät üs aber doch en churze blick genehmigt...

nach dem mir s startgländ inspiziert händ sind mir zum dom. de händ mir vo inne und usse bestuuned. natürlich händ mir au welle vom turm abe luege. dadezue händ mir aber 509 stägetritt bewältige müesse. fasch siebe mal de weg id wohnig vo berlin. d ussicht vo deht obe isch aber super gsi!

nacher sind mir dur d hohe-strass spatziert. d läde händ aber alli zue gha wägem dütsche "Tag der Einheit". d restis händ aber offe gha. im KFC händ mir ikehrt. z fuess sind mir denn zum kolumba und händ no d WDR-arkaden agluegt. denn händ sind mir langsam gnueg umegstieflet. da aber kei sightseeing-tour-büs me gfahre sind, händ mir üs im hotel erholt, bis es zum z'nacht gange isch.

zum ässe händ mir de franz mit sinere frau und de paul mit familie und no eine mit frau und tochter, wo mir nid kennt händ.

update, 04.10.09, 23.17
sunntig, 4. oktober
7:30 tagwach. hüt isch schliesslichz de grossi tag. läde ue uuuuuund? es rägnet! nach em z'morge s wärweisse: chunnt d sunne no, oder bliebt s nass? de jan und de matthis händ sich für rägeredli entschiede. ich han us fuulheit und optimismus mini redli vo letscht wuche druf la. ich han aber wohl z hoch pokered.

scho bim ifahre isch klar gsi: es isch ziemlich rutschig. ich han fasch nid beschleunige chönne. s tempo halte isch einigeasse gange. denn isch es los ganget. da ich eigentlich i me block z wiet vorne gstarted bin, han ich mich vo afang a eher hine igreiht. am afange isch es chli chaotisch gsi und schwierig, e gruppe z finde. irgendwenn bin ich aber inere foifergruppe gsi. deht han ich aber eine vor mir gha, wo huere chlini schrittli gmacht hät und au susch nid grad sicher uf sine schuhe usgseh hät. so bini nid bös gsi, wo de d füherig a mich abgäh hät ?wo üs denn churz druf abe di erschte vom hintere startblock überholt händ han ich a mine mitfahrer schnell kei freud me gha: sie händ mich eifach stah la und sind mit de andere mit. wo ich s gschnallt han, isch es z spat gsi. ich han die gruppe nüme ihole chönne.

defür hät mich bald de paul igholt gha. mit ihm zäme sind mir irgendwie in e relativ gueti gruppe cho. die hät aber recht ghanorgeled. so isch es irgendwenn um üs gscheh. ich han deht chli gflueched, wil s wohl e gueti gruppe gsi wäri, han ich s gfühl gha. mit de nächste gruppe händ mir de nächsti alauf gno. de hät au klapped. und de paul hät sich chli erhole chönne. churz nach dem er s erschti mal vo mir positioniert gsi isch, isch e linkskurve cho. wie s gange isch, weiss ich nüme, aber ich bin genau so uf de nasse strass gläge wie in berlin. de schuhe isch a de gliche stell jetzt no chli me abgschabed... no am bode liegend überholt mich de franz. so tüf bin ich buechstäblich gfalle!

en zueschauer hät gholfe ufstah und i mim chopf hät s gfröged: wo isch di nächst u-bahn-station? nach dem ich öppe en kilometer unmotiviert und unemtschlosse wieter grollt bin, han ich mich doch entschiede wieter z fahre. a de nächste gruppe han ich mich aghänkt. ab deht händ mich nur no d ruggeschmerze und d kilometertafle interessiert. uf de paar trochne oder griffige stelle han ich amig locker chönne de gruppe entlang füre fahre, denn hät s au chli spass gmacht. sobald s wieder nass und rutschig gsi isch, isch das aber au wieder verbie gsi.

am schluss bini nur no froh gsi, dass es verbie gsi isch. bi trochenem wetter wär s aber sicher es cools renne. technisch aspruchsvoll und mit stellewies fantastische zueschauer.

wo mir denn am nomittag am halbi drü mit rolle, lager und schuhe putze und tröchne, dusche und chli erhole us em hotel cho sind hät üs d sunne höhnisch usglachet. d strasse mittlerwile wieder troche und s erschti mal sit mir da sind, nid dick wolke bedeckt.

nach dem mir üs gstärcht und chli laufmarathon gluegt händ, händ mir no chli de süde vo de altstadt erkundet. hauptsächlich sind mir im rhii entlang uf de alte hafemuur spatziert, wo es neus quartier entstaht und firmene wie microsoft und EA sich niederlah händ. inere bar händ mir no en kaffi gno bevor mir mit em tram an rudolfsplatz sind. vo deht us sind mir wieder z fuess wieter. verbie a de st. aposteln chille und em sehr spezielle peek & cloppenburg gebäude bis an heumarkt. deht hät s denn z'nacht gä.

update, 05.10.09, 22:39
mäntig, 5. oktober 2009
de tag hät nomal mit me herrliche radisson-frühestücksbuffet agfange: brezel, scrumbled egg, brötli mit honig und nutella, ananas und melone, orangesaft und heissi schoggi.

denn händ mir packe und uschecke müesse. üsi täschene händ mir denn am hauptbahnhof iglagered i me moderne und erstuunliche schlüssfachsystem.

denn sind mir uf bus-sightseeing-tour, s richtige für üsi müede bei. viel neus händ mir debi aber eigentlich nüme gseh. bestefalls händ mir no uf dütsch und englisch ghört, wie all die gebäude heissed und wenn s erbaut worde sind, wo mir i de letschte täg dra verbiegschuened sind.

nach me churze ichaufsbummel, wobi s nüt für mich gä hät, isch de abschied vo köln nid schwer gfalle: es hät mittlerwile wieder afange rägne.

im ICE nach basel hät s denn no de mitbrachti dunkin domut und es merzenich-sandwich gä. vo beidne läde wimmlets nur so in köln. und über di 300km/h wo de ICE anebracht hät, händ mir au nid schlecht gstuuned...

allne kritiker vo dere reis säg ich no folgendes: de marathon isch sehr guet organisiert und bi schönem wetter d reis sicher wert. und wer glaubt, i dere stadt gäb s nur en dom z gseh, isch entweder no nie da gsi, mit zuene auge dur d stadt galufe oder total uninteressiert und wäri sowieso gschieder di hei bliebe.