ein tag im flüger und a flughäfe
21:15 MESZ, 15:15 EDTfrühe isch es im rägnerische züri los gange. zu frühe. fasch zweiehalb stund vor em abflug am flughafe sie!? au ohni web-check-in sind no 40min starbucks vor em zoll drinne gläge. nach ätzender sicherheitskontrolle (inklusive schuhe usziehe, worüber sogar de sicherheitsbeamtigschmunzlet hät) am gate nomal e halb stund warte. im flüger denn nomal. d bei händ mir afange weh tue, susch isch de flug aber relativ agnehm gsi. es spannends buech (Die dunkle Seite des Mondes, martin suter, danke claudia) hät s erträglich gmacht.
in NY seigis anschiebend über 30 grad. dadevo merkt me aber im flughafe nüt. au mit jeans und langärmlig schwitz i nid. defür hät mi di schlechti organisation vom flughafe gärgered. ich han tatsächlich us embsicherheitsbereich use und paar 100 meter später nomal dur de ganzi prozess dure müesse. laptop uspacke, schuhe abzie... und denn chli im gang vor em gate ue und abe laufe. me muss di wenigi bewegigsfreiheit nutze, bevor s is nächste sardinechischtli gaht...
06:27 MESZ, 21:27 PDT
s buech isch gege de schluss super spannend worde. so han ich praktisch im ganze flug vo new york nach l. a. gläse. bis s buech fertig gsi isch. so isch kei ziit bliebe, zum mich über s i dem flug nid servierti ässe z ärgere.
nach de landig in l. a. händ mir denn ewig uf s gepäck warte müesse, nach churzem sueche han ich au de "super shuttle" gfunde, i dem s gfühlt nur SIGGRAPH-teilnehmer gha hät.
s hotel isch sowiet guet. s zimmer isch s grössti wo ich je i me hotel gha han, und das ironischerwies bim bisher einzige mal, wo ich s für mich ällei gha han. aber es isch uf e lärmigi strass use. hüt macht mir das sicher nüt us, wil ich bin scho über 24h uf und wirde sicher schnell tüf schlafe. aber ob ich s i de andere nächt au luschtig finde?
und das alles so oder ähnlich han ich inere Wuche denn au vor mir!
Wünsche dir e spannendi Wuche mit guet durepfusete Nächt.
Bis am Fritig Abig, wenn i denn min Jetlag han, in SF.
Machs guet, Mami